ކޮވިޑް ވައިރަސް އުފެދުނު ގޮތް ހޯދަން ކުރާ ދިރާސާއަށް ބޭނުންވާ އިތުރު މައުލޫމާތު ދޭން ޗައިނާއަށް މަޖުބޫރު ނުކުރެވޭނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯގެ އެމެޖެންސީ ޕްރޮގްރާމުގެ ޑިރެކްޓަރު މާކް ރަޔަންއާ ކުރި ސުވާލެއްގައި ނޫސްވެރިއަކު އަހާފައި ވަނީ މައުލޫމާތު ދޭން ޗައިނާއަށް މަޖުބޫރު ކުރާނީ ކިހިނެއްތޯ އެވެ. ޖަވާބުގައި ރަޔަން ވިދާޅުވީ އެކަމަށް މަޖުބޫރު ނުކުރެވޭނެ ކަމަށެވެ.
"އަޅުގަނޑުމެން ދެކެނީ ހުރިހާ ފަރާތަކުން ވެސް ފުރިހަމައަށް އެއްބާރުލުން ދޭން ވާނެ ކަމަށް،" ރަޔަން ވިދާޅުވި އެވެ.
ވައިރަސް އުފެދުނު ގޮތާ މެދު ތަފާތު ތިއަރީތައް ސައިންސްވެރިންގެ މެދުގައި ވެ އެވެ. އެގޮތުން ވައިރަސް ފެތުރެން ފެށީ ވޫހާންގެ ސީފުޑް މާކެޓަކުން ކަމަށާއި މިއީ ޖަނަވާރުންގެ ގައިން އިންސާނުންގެ ގަޔަށް އެރި ވައިރަހެއް ކަމަށް އެއް ބަޔަކު ދެކެ އެވެ.
ނަމަވެސް އެހެން ފަރާތްތަކުން ދެކޭ ގޮތުގައި ވޫހާންގެ ލެބުގައި ވައިރަސް އުފެއްދައިގެން ތަހުލީލުތަކެއް ކުރަނިކޮށް، ބޭރަށް ވައިރަސް ލީކުވެ ދުނިޔެއަށް ފެތުރެން ފެށީ އެވެ. މި ތިއަރީއަށް ބޮޑަށް ބާރު ލިބެން ފަށާފައި ވަނީ އަސްލު ދެނެގަންނަން ތަހުގީގު ކުރަން ސައިންސްވެރިން ބާރު އަޅަމުން ދާތީ އެވެ.
ބަލި ފެތުރެން ފެށި ދުވަސްވަރު ސައިންސްވެރިން ގަބޫލު ކުރީ ވައިރަސް ލެބުން ލީކުވުމަކީ ނާދިރު ކަމެއް ކަމަށެވެ. އެކަމަކު އެގޮތަށް ވެފައިވާ ކަމަށް ފެންނަ ހެކިތައް ހުރި ކަމަށް ބައެއް ސައިންސްވެރިން މިހާރު ބުނެ އެވެ. ނަމަވެސް އެ ވާހަކަތައް ޗައިނާއިން ދޮގުކުރެ އެވެ.
ވައިރަހުގެ އަސްލު ދެނެގަންނަން ޑަބްލިއުއެޗްއޯއިން މި އަހަރުގެ ކުރީކޮޅު ޗައިނާއަށް ގޮސް ހިންގި ތަހުގީގަށް ވެސް ޗައިނާއިން އެކަށީގެންވާ މައުލޫމާތު ފޯރުކޮށްދީފައެއް ނުވެ އެވެ. އެހެންކަމުން ދެފުށްފެންނަ ފުރިހަމަ ތަހުގީގެއް ހިންގިފައެއް ނުވެ އެވެ.
އެމެރިކާއިން އިސްނަގައިގެން އަވަސް ތަހުގީގެއް
ކޮވިޑް ވައިރަސް އުފެދުނު ގޮތް ހޯދަން ކުރާ މަސައްކަތް ދެ ގުނަކޮށް އަވަސް ތަހުގީގެއް ހިންގުމަށް އެމެރިކާގެ ރައީސް ޖޯ ބައިޑެން ޖާސޫސީ އޮފިޝަލުންނަށް ވަނީ އަންގަވާފަ އެވެ.
ވައިރަހުގެ ހަގީގަތް ހޯދަން ކުރާ މަސައްކަތަށް ދެ އަހަރު ވާން ކައިރިވެފައި ވާއިރު، ބައިޑެން އަމުރު ކުރެއްވީ 90 ދުވަހުގެ ތެރޭގައި ތަހުގީގު ނިންމައިގެން ރިޕޯޓު ހުށަހެޅުމަށެވެ.
އެމެރިކާގައި ހުންނަ ޗައިނާ އެމްބަސީން ބުނީ ވައިރަހުގެ ހަގީގަތް ހޯދަން ކަމަށް ބުނެ، މިކަން ސިޔާސީ ނުކުރުމަށް ގޮވާލާ ކަމަށެވެ.
އޭގެ އިތުރުން މި ތަހުގީގުގައި ޗައިނާއާ މެދު އެމެރިކާއިން ދެކޭނީ "ގުރުބާން ކަންބަޅިއެއްގެ" ގޮތުގައި ކަމަށް ޗައިނާ ފޮރިން މިނިސްޓްރީން ވަނީ ބުނެފަ އެވެ.
"ޖުލައި 2019 ގައި އެމެރިކާގެ އުތުރު ވާޖިނިއާގައި ނޭވާލާ ނިޒާމަށް ޖެހޭ ގޮތް ނޭނގޭ ބަލިތަކެއް ފެނުނު. ވިސްކޯންސިންގައި އިވާލީ ބަލި ވެސް ފެތުރުނު. އެކަންކަމުގެ މައުލޫމާތާއި ގުޅޭ ކޭސްތަކު ޑޭޓާ އެމެރިކާއިން ހާމަކުރިތަ؟،" ޗައިނާގެ ފޮރިން މިނިސްޓްރީގެ ތަރުޖަމާނު ޒާއޯ ލިޖިއާން ވިދާޅުވި އެވެ.
ޗައިނާއިން ތުހުމަތު ކުރި ގޮތުގައި އެމެރިކާގެ ހަމައެކަނި މަގްސަދަކީ ބަލިމަޑުކަމުގެ ތެރެއިން ސިޔާސީ ގޮތުން ތުހުމަތުތައް ކޮށް، ބައިބައިވުން އުފެއްދުމެވެ.
އޭގެ އިތުރުން އެމެރިކާގެ ޖާސޫސީ އިދާރާތަކުން މީގެ ކުރިން އަމަލުކޮށްފައިވާ ގޮތްތަކާ މެދު ސުވާލު އުފެދޭތީ އެއީ އިތުބާރު އޮތް ބައެއް ނޫން ކަމަށް ވެސް ޗައިނާ ފޮރިން މިނިސްޓްރީގެ ތަރުޖަމާނު ވިދާޅުވި އެވެ.
