މިލާން (ޖޫން 3) - ހުސްވެފައިވާ އިޓަލީގެ ޗެމްޕިއަން އިންޓަ މިލާނުގެ ކޯޗަކަށް ދާދި ފަހުން ލާޒިއޯ ދޫކޮށްލި ސިމޯން އިންޒާގީ މިއަދު ހަމަޖަައްސައިފި އެވެ.
ކުރިން އޭސީ މިލާނަށް ކުޅުނު މަޝްހޫރު ފޯވާޑް ފިލީޕޯ އިންޒާގީގެ ކޮއްކޮ ސިމޯން އިންޒާގީ އިންޓައާ ހަވާލުވީ ދެ އަހަރުގެ ކޮންޓްރެކްޓެއްގަ އެވެ. އިންޓަގެ ކޯޗުުގެ މަގާމު ހުސްވީ 11 އަހަރު ތެރޭ ފުރަތަމަ ފަހަރަށް އެ ޓީމަށް އިޓާލިއަން ލީގު ކާމިޔާބު ކޮށްދިން ކޯޗު އެންޓޯނިއޯ ކޮންޓޭ މަގާމު ދޫކޮށްލުމުންނެވެ.
ކޮންޓޭ، އިންޓަ ދޫކޮށްލީ އެ ޓީމު ހިންގަމުން އަންނަ ޗައިނާގެ ކުންފުނި ސަނިން ހޯލްޑިންގްސް ގްރޫޕުން ކްލަބްގެ ހަރަދުކުޑަކުރުމުގެ ޕްލޭނެއްގެ ތެރެއިން ޓީމުގެ މުހިއްމު ގިނަ ކުޅުންތެރިންތަކެއް ވިއްކާލަން ނިންމުމާ އެކު އެވެ. އިންޓަ އިން ކޮންޓޭ ވަކިވީ އެ ޓީމާ އެކު ހަދާފައިވާ އެއްބަސްވުމުގައި ބާކީ އަހަރެއް އޮއްވައި ކޮންޓްރެކްޓް އުވާލުމަށް ފަހު އެވެ.
އުމުރުން 45 އަހަރުގެ އިންޒާގީގެ ކޯޗުކަމުގައި ލާޒިއޯ އިން ހޭދަކުރި ފަސް ސީޒަނުގައި ވަނީ އިޓާލިއަން ކަޕް އެއް ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްފަ އެވެ. މި ސީޒަނުގައި ޗެމްޕިއަންސް ލީގުގެ ނޮކައުޓް ބުުރުގައި 20 އަހަރު ތެރޭ ފުރަތަމަ ފަހަރަށް ވާދަކުރި ލާޒިއޯ އަށް އަންނަ ސީޒަނުގެ ޗެމްޕިއަންސް ލީގުން ފުރުސަތު ނުލިބުނެވެ. ލާޒިއޯ މި ސީޒަން ނިންމާލީ ލީގުގެ ހަ ވަނައިގަ އޮވެ އެވެ.
ކޯޗިން ކެރިއަރުގައި މިހާތަނަށް އިންޒާގީ މަސައްކަތްކުރީ ލާޒިއޯގައި އެކަންޏެވެ. ފުޓްބޯޅަ ކުޅުން 2010 ވަނަ އަހަރު ހުއްޓާލައި ލާޒިއޯގެ ޔޫތު ޓީމުގައި އިންޒާގީ ކޯޗިންގެ މަސައްކަތް ފެށި އެވެ. ލާޒިއޯގެ ސީނިއާ ޓީމާ ހަވާލުވީ 2016 ވަަނަ އަަހަރު ވަގުތީ ކޯޗެއްގެ ގޮތުގަ އެވެ. ފަހުން ދާއިމީ ކޯޗެއްގެ ގޮތުގައި އިންޒާގީ މަސައްކަތް ފެށީ މަޝްހޫރު ކޯޗު މާސެލޯ ބިއެލްސާ އެ ޓީމު ދޫކޮށްލުމުންނެވެ.
މި ފަހަރުގެ ޓްރާންސްފާ މާކެޓްގައި އިންޓަގެ ކުޅުންތެރިންގެ ތެރެއިން އެންމެ ޑިމާންޑް ބޮޑީ ބެލްޖިއަމްގެ ފޯވާޑް ރޮމެލޫ ލުކާކޫގެ އެވެ. އަންނަ ސީޒަނުގައި ވެސް އިންޓަ އަށް ކުޅެން ނިންމާފައިވާކަމަށް ދާދި ފަހުން ލުކާކޫ ވަނީ ބުނެފަ އެވެ.
އިނގިރޭސި މީޑިއާތަކުން ރިޕޯޓްކޮށްފައިވާ ގޮތުން މި ސީޒަނުގައި އިޓަލީ ލީގުގެ މޮޅު ކުޅުންތެރިއަކަށް ހޮވުނު ލުކާކޫ ހޯދަން އޭނާގެ ކުރީގެ ކްލަބް ޗެލްސީން މަސައްކަތްކުރެ އެވެ. އަދި އިންޓަ ދޫކޮށްލި ކޯޗު ކޮންޓޭ ދެން ހަވާލުވާ ޓީމަކާ ލުކާކޫ ގުޅޭނެ ކަމަށް ވެސް ބައެއް އިޓަލީގެ ބައެއް ނޫސްތަކުން ރިޕޯޓްކޮށްފައިވެ އެވެ.
