ސައިކަލަކަށް ލައިގެން ރޭ ހޮސްޕިޓަލަށް ގެންދަން ޖެހުނީ ކޮވިޑުގައި ކުއްލިއަކަށް ހާލު ސީރިއަސްވި ކުއްޖެއް ކަމަށް އާއިލާ އިން މިއަދު ބުނެފި އެވެ.
ކޮވިޑު ޖެހިގެން 12 އަހަރުގެ ފާތުމަތު މިޝްކާ މަރުވެ، ފަރުވާ ލަސްވުމުގެ ތުހުމަތު އެޅިފައި ވަނިކޮށް ސައިކަލެއްގައި ރޭ ކުއްޖަކު އައިޖީއެމްއެޗަށް ގެންދާ މަންޒަރާ އެކު ސޯޝަލްމީޑިއާގައި އޮތީ ތަފާތު ގޮތްގޮތަށް ވާހަކަ ފަތުރައިފަ އެވެ. އެގޮތަށް އެ ކުއްޖާ ގެންދަން ޖެހުނީ އެމްބިއުލަންސަށް ގުޅައި ލަސްވެގެން ކަމަށް މިޝްކާގެ މަރުގައި ދިމާވި ހިތާމަވެރި ހާދިސާއާ ގުޅުވައި ތުހުމަތު ކުރި އެވެ.
އެކަމަކު އާއިލާ އިން ވާހަކަ ދެއްކި މީހަކު "އަދަދު"އަށް ބުނީ 11 އަހަރުގެ ފިރިހެން ކޮއްކޮ އެގޮތަށް ގެންދަން ޖެހުނީ ހޭނެތިގެން ވެއްޓިފައި އޮއްވައި ފެނިގެން ކަމަށެވެ. އޭނާ ހުރީ ކޮވިޑަށް ޕޮޒިޓިވްވެ މީގެ ތިން ދުވަސް ކުރިން ފެށިގެން ކޮޓަރިއެއްގައި އެކަހެރިކޮށްފަ އެވެ.
އެ ކުއްޖާ ޓެސްޓްކޮށް އެކަހެރިކުރީ އެ ގޭގައި ދިރިއުޅޭ އޭނާގެ ކާފަ ބައްޔަށް ހުށަހެޅި ސާމްޕަލް ނެގިއިރު ޕޮޒިޓިވްކަން އެނގުމުންނެވެ.
"ދޭތެރެއަކުން އޭނަ މަންމަ ކޮޓަރިއަށް ވަދެ ހާލު ބަލާނެ. އެހެން އުޅެފައި އަޑެއް ބަޑެއް ކޮޓަރިން ނީވޭތީ ދޮރުހުޅުވާފައި ބެލީ. އޭރު ފެނުނު އިރު އޮތީ ވެއްޓިފައި. އެއްވެސް ކަމެއް ނެތް މީހާގެ،" އާއިލާ މީހާ ކިޔައިދިނެވެ.
"އަަވަހަށް ސައިކަލަށް ލައިގެން ގެންދިޔައީ ހޮސްޕިޓަލަށް. އެމްބިއުލާންސަކަށް ނުވެސް ގުޅަން ގެއާ ވަރަށް ކައިރިވީމަ ހޮސްޕިޓަލް."
އާއިލާ އިން ބުނިގޮތުގައި ކުއްޖާގެ ހާލު މިހާރު ރަނގަޅެވެ. އޭނާ އެޑްމިޓްކޮށްފައި އޮތީ ކޮވިޑް ޖެހޭ ކުޑަކުދިންނަށް ހާއްސަ ވޯޑުގަ އެވެ.
"މާބޮޑަށް ސްޓްރެސްވީ ކަމަށް ވަނީ. އަހަރެމެން ބޮޑެތި މީހުން މި ބަލީގައި އެކަހެރިވެގެން ތިބޭއިރު، އެހާ އުނދަގޫވޭ. ކުދިންނަށް ކިހާވަރެއް ވާނެ."
"ކުޑަކުދިން ވަރަށް ބަލިވާން ފަށައިފި"
ކޮވިޑުން ރައްކާތެރިވެ ތިބުމަށް ބެލެނިވެރިންނާއި އާއްމުން ހޭލުންތެރިކުރަން ގިނަ މައުލޫމާތުތަކެއް ހިއްސާކުރައްވާ ކުޑަކުދިންގެ ޑޮކްޓަރު އަހްމަދު ފައިސަލް ވަނީ "ކުޑަކުދިން ވަރަށް ބަލިވާން ފަށައިފި" ކަމަށް، ވިދާޅުވެ މީގެ ދެ ދުވަސްކުރިން ކަންބޮޑުވުންފާޅުކުރައްވައިފަ އެވެ.
އޭނާ ވަނީ ބަލީގައި ބޮޑުވަރުވެދާނެ ކުދިންގެ ތަފްސީލްތައް ދެއްވައިފަ އެވެ. އޭގެތެރޭގައި ހިމެނެނީ ދިފާއީ ނިޒާމްދަށް ކުދިންނާއި، ކިޑްނީ ބަލީގެ ކުދިންނާއި ބަރުދަން މާމަތީ ކުދިންނާއި އެނދުމަތިވެފައި ތިބޭ ކުދިން ވެސް ހިމެނެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ހިސާބުތަކަށް ބަލާއިރު ކޮވިޑް ފެތުރުން ބޮއްސުންލައި ކޮންމެ ދުވަހަކު އެ ބަލިޖެހޭ މީހުންގެ އަދަދު 1000 މަތީގައި އުޅުނުއިރު ދުވާލަކު 80 ވަރަކަށް ކުދިންނަށް އެ ބަލި ޖެހުނެވެ. އެ ހިސާބުތަކުން ދައްކާ ގޮތުގައި، މިދިޔަ މަހު އެކަނި ވެސް އުމުރުން އެއް އަހަރު ނުވާ 381 ކުދިންނަށް ކޮވިޑް ޖެހުނެވެ.
ކޮވިޑަށް ހުށަހެޅޭ ކުޑަކުދިން ގިނަވެފައިވާ އިރު ހިތާމަވެރި ހާދިސާއެއް އިއްޔެ ހިނގާފައިވާ އިރު އިމާދުއްދީން ސްކޫލުގައި ކިޔަވަމުން އައި މިޝްކާ މަރުވީ ކޮވިޑުގައި ހާލު ސީރިއަސްވި ވަގުތު އެކަށީގެންވާ ފަރުވާ ދިނުމުގައި ލަސްވެގެން ކަމުގެ ޝަކުވާ ބޮޑެވެ. އާއިލާ އިން ބުނަނީ އެމްބިއުލަންސަށް ގުޅައިގެން ތިން ގަޑިއިރު ވެސް ނާންނަ ކަމަށެވެ. އެކަން ހިނގައިދިޔަ ގޮތުގައި އިހުމާލުތަކެއް ހުރި ކަމަށް ހެލްތު މިނިސްޓަރު އަހްމަދު ނަސީމް ވަނީ އެއްބަސްވެވަޑައިގެންފަ އެވެ.
އެ ތަހުގީގެއް ހިންގަމުންދާއިރު، އެޗްއާރުސީއެމުން ވެސް މައްސަލަ އެބަ ބަލަ އެވެ.
