މާދަމާއިން ފެށިގެން ތައުލީމީ ދާއިރާއިން މަތީ ތައުލީމު ހާސިލުކޮށްފައިވާ ދަރިވަރުންނަށް ދަސްވެނިވުމުގެ ސެޓެފިކެޓު ދޫކުރަން ފަށާނެ ކަމަށް ގައުމީ ޔުނިވާސިޓީ (އެމްއެންޔޫ) އިން ބުނެފި އެވެ.
ދަސްވެނިވުމުގެ ސެޓްޕިކެޓް ލިބުން ލަސްވެ، ޓީޗަރުންނާއި ޓީޗަރު ކަމަށް ކުރިމަތި ލާފައިވާ ފަރާތްތަކުން ދަނީ އެކަމާ ނުރުހުން ފާޅުކުރަމުންނެވެ. ބައެއް ޓީޗަރުންނަށް އެލެވެންސް ނުލިބުމާއި ކިޔަވާ ނިންމާފައިވާ ދަރިވަރުންނަށް ވަޒީފާ ލިބުން ދަތިވެފައިވާ ކަމުގެ ޝަކުވާ ބޮޑެވެ.
"އަދަދު"އަށް މައުލޫމާތު ދެއްވަމުން އެމްއެންޔޫގެ އޮފިޝަލަކު ވިދާޅުވި ގޮތުގައި، މާދަމާއިން ފެށިގެން ސެޓްފިކެޓު ދޫކުރަން ފަށާނެ އެވެ.
އޭނާ ވިދާޅުވި ގޮތުގައި، ސެޓްފިކެޓު ދޫކުރެވި ލަސްވެގެން ދިޔައީ ދިމާވި ޓެކްނިކަލް މައްސަލައެއްގެ ސަބަބުންނެވެ. އަދި، ރާއްޖޭގައި ވެސް ހަލުވި ކަމާއެކު ފެތުރެމުންދާ ކޮވިޑަށް އެ ޔުނިވާސިޓީގެ މުވައްޒަފުން ޕޮޒިޓިވްވުން ވެސް މަސައްކަތަށް ބުރުއެރިކަން އޭނާ ފާހަގަ ކުރެއްވި އެވެ.
އަޅުގަނޑުމެން މާދަމާއިން ފެށިގެން ސެޓްޕިކެޓްތައް ދޫކުރަން ފަށާނެ، މިހާރުވެސް ބައެއް ދަރިވަރުންނަށް ދޫކުރެވިފަ ވަނީ، ލަސްވެފައިވާ މައްސަލައަކީ ދިމާވި ޓެކްނިކަލް މައްސަލައެއްގެ އިތުރުން މިތަނުގެ މުވައްޒަފުން ކޮވިޑަށް ޕޮޒިޓިވްވުން
ސެޓްފިކެޓް ނުލިބި ލަސްވެގެން ސޯޝަލް މީޑިއާގައި އެ ކަންބޮޑުވުން ފާޅުކުރި މީހަކު ބުނި ގޮތުގައި ކޯސް ނިންމިތާ ފަސްވެފައިވާއިރު ސެޓްފިކެޓް ލަސްވުމަކީ އޭގެ ސަބަބުން ގިނަ ގެއްލުންތަކެއްވަމުންދާ ކަމެއް ކަމަށެވެ.
"ސެޓްފިކެޓް ނެތި އެޑިއުކޭޝަން ކޮލިފިކޭޝަން އެލެވެންސްއެއް ނުލިބޭ، މިކަމުގެ ސަބަބުން މި ވަމުންދާ ގެއްލުމުގެ ޒިންމާ ނަގަނީ ކާކުބާ؟،" އޭނާ ބުނެފައިވެ އެވެ.
އޭނާ ބުނި ގޮތުގައި، ސެޓްފިކެޓް ލަސްވުމުގެ ސަބަބުން އެލެވެންސް ނުލިބި ދިޔުމުގެ ސަބަބުން މިހާތަނަށް ވެސް އޭނާ ވަނީ 10،550 ރުފިޔާގެ ގެއްލުންވެފަ އެވެ. އޭނާ ސިފަ ކުރި ގޮތުގައި، ޓީޗަރެއްގެ މުސާރައަށް ބަލާއިރު އެއީ ވަރަށް ބޮޑު ގެއްލުމެކެވެ.
ސެޓްފިކެޓް ލަސްވެގެން ގުޅުމުން ކޮންމެ ފަހަރަކު ވެސް "މި މަސް ނިމުމުން ލިބޭނެ" ކަމަށް އަންގާ ކަމަށެވެ. ނަމަވެސް، ފަސް މަސް ވެގެން ދިޔައިރު ވެސް ސެޓްފިކެޓް ލިބޭ ގޮތް ނުވާ ކަމަށެވެ.
"އެންމެ ބޮޑު ޔުނިވާސިޓީގައި ޓެކްނިކަލް އިޝޫއެއް ރަނގަޅު ނުކުރެވި މިހާ ގިނަ ދުވަސް ނަގަނީ ކީއްވެ،" އޭނާ ސުވާލު އުފެއްދި އެވެ.
