މެލޭޝިއާގައި ކޮވިޑް ޖެހިގެން މަރުވާ މުސްލިމުންގެ ޖަނާޒާގެ ކަންކަމުގައި އުޅޭ ވޮލަންޓިއަރުންގެ މަސައްކަތް މީގެ ކުރިން ދުވަހަކު ވެސް ބުރަ ނުވާ މިންވަރަށް ބުރަވެފައިވާ ކަމަށް އެ މީހުން ބުނެފި އެވެ.
މެލޭޝިއަން ފިޔުނަރަލް މެނޭޖްމަންޓް ސްކޮޑުގެ މެމްބަރުން ތިބެނީ ޕީޕީއީއާ އެކު އަބަދުވެސް ތައްޔާރަށެވެ. އެ މީހުން ހޮސްޕިޓަލްތަކަށް ދާން ޖެހެނީ ކޮވިޑުގައި މީހަކު މަރުވުމުން އާއިލާތަކަށް ޖަނާޒާގެ ކަންކަން ހަމަޖައްސައި ދިނުމަށެވެ.
ވޮލަންޓިއަރުންގެ އެ ޓީމުގައި އިސްކޮށް އުޅޭ މުހައްމަދު ރަފީއުއްދީން ޒައިނަލް ރާސިދު ރޮއިޓާޒްއަށް ބުނީ މިދިޔަ އަހަރަށް ވުރެ 30 ގުނަ އިތުރަށް މީހުން މަރުވަމުންދާ ކަމަށާއި އެހެންވެ ވޮލަންޓިއަރުންގެ މަސައްކަތަށް ބާރު ބޮޑުވެފައިވާ ކަމަށެވެ.
އެ ޓީމުގެ މެމްބަރުންގެ އަދަދު 2000 އިތުރުވެފައިވީ ނަމަވެސް މަރުވާ ރޭޓް ދަށް ނުވާތީ ބުރަބޮޑުވެފައިވާ ކަމަށް އޭނާ ފާހަގަކުރި އެވެ.
"މީގެ ކުރިން މަހަކު ދެ ތިން ކޭސް އެކަމަކު މިހާރު ކޮންމެ ދުވަހަކު ވެސް ދެ ތިން ކޭސް އެބަ މެނޭޖް ކުރަން ޖެހޭ،" އޭނާ ބުންޏެވެ.
ވޮލަންޓިއަރުންގެ މަސައްކަތަކީ މަރުވާ މީހުންގެ ހަށިގަނޑު ހޮސްޕިޓަލުން މޯޗަރީއަށް ގެންގޮސް، ޖަނާޒާއަށް ތައްޔާރު ކުރުމެވެ. ބައެއް ހާލަތްތަކުގައި ޕީޕީއާ އެކު އާއިލާ މެމްބަރުންނަށް ޖަނާޒާގައި ބައިވެރިވުމުގެ ފުރުސަތު ދެ އެވެ.
މުސްލިމުންގެ ގިނަ އަދަދަކަށް ދިރިއުޅޭ މެލޭޝިއާގައި އިއްޔެ 7،857 ޕޮޒިޓިވް ކޭސް ފެނުނެވެ. އެއީ ޖެހިޖެހިގެން ތިން ވަނަ ދުވަހަކަށް ރިކޯޑް އަދަދެކެވެ. އިއްޔެ މި ބަލީގައި އެ ގައުމުން 59 މީހުން މަރުވި އެވެ.
