އެފްރިކާގެ ގައުމެއް ކަމަށްވާ ޑިމޮކްރެޓިކް ރިޕަބްލިކް އޮފް ކޮންގޯގެ އިރުމަތީ ގޯމާ ސިޓީގެ ބޮޑު އަލިފާން ފަރުބަދައެއް ގޮވުމުން އެތައް ހާސް ބަޔަކު ރައްކާތެރި ހިސާބުތަކަށް ބަދަލު ވާން ފަށައިފި އެވެ.
ނީރަގޮންގޯ އަލިފާން ފަރުބަދަ ރޭ ދަންވަރުގެ ވަގުތެއްގައި ގޮވުމާއެކު ދިޔާ އަލިފާން ނުވަތަ ލާވާ ދަނީ ބޮޑު ސަރަހައްދަކަށް ފެތުރެމުންނެވެ. ގޯމާ ސިޓީގައި ދެ މިލިއަން މީހުން ދިރިއުޅެ އެވެ.
ފަރުބަދަ ގޮވުމާއެކު ސިޓީގެ މަތީގައި ގަދަ އޮރެންޖު ކުލައިގެ ވިލާތައް ދުންތައް ބޯވެފައި ވާއިރު، ބިރުން ތިބި އާއްމުން ވަނީ ދަންވަރު ގެތަކުން ނުކުމެ ފައި މަގުގައި އެ ސިޓީ ދޫކޮށް ދާން ފަށާފަ އެވެ.
ގޯމާއާ ދިހަ ކިލޯމީޓަރު ދުރުގައި ހުންނަ އެ ފަރުބަދަ އެންމެ ފަހުން ގޮވީ 2002 ވަނަ އަހަރެވެ. އެ ފަހަރު 250 މީހުން މަރުވެ، 120،000 މީހުންގެ ގެތައް ގެއްލުނެވެ.
އަނެއްކާވެސް ފަރުބަދަ ގޮވުމުން ދަންވަރު ގެއިން ނުކުމެ އަވަހަށް ރައްކާތެރި ހިސާބަކަށް ދެވޭތޯ ގިނަ ބަޔަކު މަސައްކަތް ފެށީ ގޮދަޑި އާއި ހިފާ ގެންގުޅޭ ބައެއް ސާމާނާ ވެސް އެކު އެވެ.
އެ މީހުން މަސައްކަތް ކުރަނީ އިރުމަތީގައިވާ ރްވާންޑާގެ ބޯޑަރަށް ދެވޭތޯ އެވެ. އާއްމުން ރައްކާތެރި ހިސާބުތަކަށް ބަދަލު ކުރުމުގެ މަސައްކަތް ސަރުކާރުން ފެށީ ފަރުބަދަ ގޮވިތާ އެތައް އިރެއް ފަހުންނެވެ.
ރްވާންޑާގެ ސަރުކާރުން ބުނީ މިހާރު ވެސް ގޯމާ ސޓީގެ 3000 މީހުން ބޯޑަރު ހުރަސްކޮށް ރްވާންޑާއަށް ވަދެފައިވާ ކަމަށެވެ. އެމީހުން ބައިތިއްބާނީ ސްކޫލްތަކާއި، އަޅުކަން ކުރަން ހާއްސަ ތަންތަނުގަ އެވެ.
އަލިފާން ފަރުބަދަ ގޮވުމުން މުޅިން އަލަށް އުފެދުނު ރެނދެއްގެ ސަބަބުން ދިޔާ އަލިފާން ކޯރު ހެދެމުން ދަނީ ސީދާ ގޯމާ ސިޓީއާ ދިމާލަށެވެ. އެ ތަން ހުރަސްކޮށް ކައިރީގައިވާ އެއާޕޯޓާ ހަމައަށް ވެސް އަލިފާން ފޯރާނެ ކަމުގެ ބިރު އެބަ އޮތެވެ.
ނީރަގޮންގޯއަކީ ދުނިޔޭގެ އެންމެ ހަރަކާތްތެރި އެއް އަލިފާން ފަރުބަދަ އެވެ. އެ ފަރުބަދަ ގޮވުމުން އެންމެ ގިނަ މީހުން މަރުވީ 1977 ގަ އެވެ. އެ ފަހަރު 600 އަށް ވުރެ ގިނަ މީހުން މަރުވި އެވެ.
