އިންސާނުންގެ ހަމާއި، އިސްތަށިގަނޑާއި، ނިޔަފަތީގެ ފޮޓޯ އަޕްލޯޑް ކުރުމުން ދިމާވެފައިވާ ސިއްހީ މައްސަލަ ދެނެގަނެވޭ އާޓިފިޝަލް އިންޓެލިޖެންސް (އޭއައި) ޓޫލެއް ގޫގްލް އިން ތައާރަފުކޮށްފި އެވެ.
"ޑާމަޓޮލޮޖީ އެސިސްޓް ޓޫލް" ދައްކާލާފައިވަނީ ގޫގްލްއިން ބޭއްވި މި އަހަރުގެ ޑެވެލޮޕާ ކޮންފަރެންސް "ގޫގްލް އައިއޯ" ގަ އެވެ. އެ އެޕްލިކޭޝަން ރަސްމީކޮށް ނެރޭނީ މި އަހަރުގެ ފަހުކޮޅު އެވެ.
އެ އެޕްލިކޭޝަނަށް ވަނީ ޔޫރަޕުގައި ބޭނުން ކުރަން "ސީއީ މާކް" ވެސް ލިބިފަ އެވެ. އޭގެ މާނައަކީ ޔޫރަޕުން ގަބޫލުކުރާ ފެންވަރުގެ ހިދުމަތް ފޯރުކޮށްދެވޭނެ ކަމެވެ.
ގޫގްލްއިން ބުނީ އެޕްލިކޭޝަންގައި ބޭނުން ކުރާ އޭއައި އިން 288 ސިއްހީ މައްސަލަ ދެނެގަނެވޭނެ ކަމަށެވެ. ނަމަވެސް, މިއީ ބަލި ޑައިގްނޯޒް ކުރުމާއި ފަރުވާ ހޯދަން އޮތް "ސަބްސްޓިޓުއުޓެއް" ނޫން ކަމަށް ބުންޏެވެ.
ގޫގްލް އިން "ޑާމަޓޮލޮޖީ އެސިސްޓް ޓޫލް" އުފެއްދީ ތިން އަހަރުގެ މަސައްކަތުންނެވެ. ހަމާއި، އިސްތައްޓާއި ނިޔަފައްޗަށް ދިމާވާ މައްސަލަތައް އޭއައި ޓޫލަށް ދަސްކޮށްދިނުމަށް 65،000 ފޮޓޯ ބޭނުންކޮށްފައިވެ އެވެ. އޭގެ އިތުރުން ވެސް ގުޅުން ހުރި އެތައް މިލިއަން ފޮޓޯއެއް ބޭނުންކޮށްފައިވެ އެވެ.
ސިއްހީ މައްސަލަ ދެނެގަތުމަށް ފޮޓޯ އަޕްލޯޑް ކުރުމުގެ އިތުރުން، ދިމާވެގެން އުޅޭ މައްސަލަ ސީދާކޮށް ހޯދުމަށް، ސުވާލުތަކަކަށް ވެސް ޖަވާބު ދޭން ޖެހެ އެވެ.
މީގެ ކުރިން ވެސް ގޫގްލްއިން ވަނީ ތަފާތު އެކި ބާވަތްތަކުގެ ކެންސަރުގެ އަލާމާތްތަކާއި ޓީބީ ދެނެގަންނާނެ އެޕްތައް ނެރެފަ އެވެ. ނަމަވެސް އެއްވެސް އެޕަކީ ޑޮކްޓަރެއްގެ ފަރާތުން ލިބޭ ޑައިގްނޯސިސްގެ ބަދަލުގައި ބޭނުން ކުރެވޭނެ އެއްޗެއް ނޫނެވެ.
ގޫގްލްއިން ބުނީ ކުންފުނީގެ ސާޗް އިންޖީނުގައި ކޮންމެ އަހަރަކު ވެސް ހަމާއި އިސްތަށިގަނޑާއި ނިޔަފައްޗަށް ދިމާވާ މައްސަލަތަކާ ގުޅުން ހުރި ކަންކަން ހޯދަން 10 ބިލިއަން ސާޗް ކުރާ ކަމަށެވެ.
"ޑާމަޓޮލޮޖީ އެސިސްޓް" ޓޫލަށް އެމެރިކާގެ ފުޑް އެންޑް ޑްރަގް އޮތޯރިޓީން އަދި ހުއްދައެއް ނުދެ އެވެ. ނަމަވެސް އިނގިރޭސި ކުންފުނި އޮޕްޓެލަމްއިން ފުއްޕާމޭގެ ކެންސަރު ދެނެގަންނާނެ ގޮތް ބުނެދޭން އުފެއްދި އެޕަކަށް ދާދި ފަހުން އެފްޑީއޭއިން ހުއްދަ ދިނެވެ.
