އޮސްޓްރޭލިއާގެ ބައިނަލްއަގްވާމީ ބޯޑަރުތައް ހުޅުވާލަން ވިޔަފާރިތަކުން ޕްރެޝަރު ކުރި ނަމަވެސް، މިއީ އެކަން ކުރަން ރައްކާތެރި ވަގުތު ނޫން ކަމަށް އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވިދާޅުވެއްޖެ އެވެ.
މޮރިސަން ވިދާޅުވީ ވެކްސިން ފުރިހަމަކޮށްފައިވާ އޮސްޓްރޭލިއާގެ ރައްޔިތުންނަށް ވެސް ގައުމުން ބޭރަށް ދަތުރު ކުރުން އަދި ރައްކާތެރި ނޫން ކަމަށެވެ. އެކަމަކު ވިޔަފާރިތަކުން އަންނަނީ ސަރުކާރަށް ޕްރެޝަރު ކުރަމުންނެވެ.
"އަޅުގަނޑަށް އެނގޭ ހުރިހާ އެންމެން ވެސް އާއްމު ދިރިއުޅުމައިގެން ކުރިއަށް ދާން ބޭނުންވާ ކަން. އެކަމަކު ހަގީގަތަކީ މިއަދު މި އުޅެނީ ބަލިމަޑުކަމެއްގައި. އަދި މިއީ މިދިޔަ އަހަރަށް ވުރެ މާ ހާލަތު ގޯސް އަހަރެއް،" ނޫސްވެރިންނަށް މައުލޫމާތު ދެއްވަމުން މޮރިސަން ވިދާޅުވި އެވެ.
މޮރިސަން ވިދާޅުވީ ވެކްސިން ފުރިހަމަކޮށްފައިވާ މީހުންނަށް ލުއިދީގެން ދަތުރު ކުރެވޭނެ އިންތިޒާމެއް ހަމަޖެއްސޭނީ "ރައްކާތެރި ވަގުތު އައުމުން" ކަމަށެވެ.
އޮސްޓްރޭލިއާ އިން އިއުލާންކޮށްފައިވަނީ އަންނަ އަހަރުގެ މެދެއްހާ ހިސާބުގައި ބޯޑަރު ހުޅުވާލުމަށެވެ. އެކަމަކު އޭގެ ކުރިން ޒަރޫރީ ހާލަތްތަކަށް ވަކި އިންތިޒާމްތަކެއް ހަމަޖެއްސުމުގެ ވިސްނުން ސަރުކާރުން ގެންގުޅެ އެވެ. އޮސްޓްރޭލިއާ އިން މަސައްކަތް ކުރަމުން ދަނީ މި އަހަރު ނިމުމުގެ ކުރިން އާބާދީގެ 26 މިލިއަން މީހުންނަށް ވެކްސިން ދީ ނިންމާލުމަށެވެ.
ބޯޑަރުތައް ބަންދުކޮށްފައި އޮތުމުގެ ސަބަބުން އެންމެ ބޮޑު އަސަރެއް ކުރަމުންދާ އެއާލައިންތަކާއި، ޓޫރިޒަމް އޮޕަރޭޓަރުންނާއި ޔުނިވާސިޓީތަކުން އަންނަނީ އަލުން ގައުމު ހުޅުވާލުމަށް ސަރުކާރަށް ޕްރެޝަރު ކުރަމުންނެވެ.
ކޮވިޑްގެ ހާލަތު ގޯސްވަމުންދާތީ އޮސްޓްރޭލިއާގެ ބައިނަލްއަގްވާމީ ބޯޑަރުތައް ބަންދު ކުރީ މާޗް 2020 ގަ އެވެ. އެނބުރި ގައުމަށް އަންނަ އޮސްޓްރޭލިއާ ރައްޔިތުން ވެސް އަމިއްލައަށް ހަރަދުކޮށްގެން ހޮޓަލެއްގައި ކަރަންޓީން ވާން ޖެހެ އެވެ. ކޮވިޑްގެ ހާލަތު މި ފަހުން އެންމެ ގޯސްވި އިންޑިއާގައި ތާށިވި އޮސްޓްރޭލިއާގެ މީހުންނަށް އެނބުރި ގައުމަށް ދެވޭނެ އިންތިޒާމުތަކެއް އެ ގައުމުގެ ސަރުކާރުން ހަމަޖައްސައިދޭން ވަނީ އެއްބަސްވެފަ އެވެ.
އެ ގޮތުން އިންޑިއާގެ މަޝްހޫރު ކްރިކެޓް މުބާރާތް އިންޑިއަން ޕްރިމިއާ ލީގުގައި ކުޅެން ދިޔަ އޮސްޓްރޭލިއާ ކުޅުންތެރިންގެ އިތުރުން ކޯޗުންނާއި ކޮމެންޓޭޓަރުންނަށް އެނބުރި ގައުމަށް ދެވޭނެ ގޮތެއް ނުވުމުން ކަރަންޓީނު މުއްދަތެއްގެ ގޮތުގައި ރާއްޖެ ވެސް އަ އެވެ. އޭގެ ތެރެއިން ބައެއް މީހުން ވަނީ މިހާރު އެކި ގޮތްގޮތުން ހުއްދަތަކެއް ހޯދައިގެން އޮސްޓްރޭލިއާ އަށް ދިއުމުގެ އިންތިޒާމް ހަމަޖައްސަމުންނެވެ.
އޮސްޓްރޭލިއާގައި މިހާތަނަށް ފެނިފައިވަނީ ކޮވިޑުގެ 30،000 އެއްހާ ކޭސް އެވެ. މަރުވެފައި ވަނީ 910 މީހުންނެވެ.
