މާލޭ ސިޓީ ކައުންސިލްގެ ޑެޕިއުޓީ މޭޔަރަކު ކަނޑައެޅުމުގައި ޕީޕީއެމްގެ ލީޑަޝިޕްގައި ހިޔާލުތަފާތުވުން ބޮޑުވެއްޖެ އެވެ.
އަލަށް އިންތިހާބުވި މޭޔަރުންނާއި ކައުންސިލަރުން މާދަމާ ހުވާކުރައްވާއިރު، ޑެޕިއުޓީ މޭޔަރުންނާއި ކައުންސިލްތަކުގައި ނައިބު ރައީސް ހޮވުމުގައި އަމަލުކުރާނެ ވަކި ގޮތުން ޕީޕީއެމްއިން ރަސްމީކޮށް ނިންމާފައެއް ނެތެވެ.
މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން އިންތިހާބު ކޮށްފައިވާއިރު އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އެ ކޯލިޝަނަށް ސިޓީ ކައުންސިލްގެ މެޖޯރިޓީ ލިބިފައިވާއިރު މިހާރު އެންމެ ބޮޑު ވާދަވެރިކަމެއް އޮތީ ޑެޕިއުޓީ މޭޔަރުގެ މަގާމަށެވެ.
ޑެޕިއުޓީ މޭޔަރުކަމަށް މިހާތަނަށް ޝައުގުވެރިކަން ފާޅުކުރައްވާފައިވަނީ ވިލިމާލެ ދާއިރާގެ ގޮނޑި ކާމިޔާބު ކުރެއްވި ނަހުލާ އަލީ އާއި މާފަންނު ދެކުނު ދާއިރާގެ ގޮނޑި ކާމިޔާބު ކުރެއްވި އަބްދުﷲ ނާސިރު (ހެރިންސް އައްލޮ) އެވެ. އޭގެ އިތުރުން ޕީޕީއެމްގެ ބައެއް ސަޕޯޓަރުން އަންނަނީ ހުޅުމާލެ ދާއިރާގެ ގޮނޑި ކާމިޔާބު ކުރެއްވި އަދި ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއު ޑެޕިއުޓީ މޭޔަރަކަށް ގެނައުމަށް ކެމްޕެއިން ކުރަމުންނެވެ.
ނަން އިއުލާނު ނުކުރެއްވި ނަމަވެސް، ޑެޕިއުޓީ މޭޔަރު ކަމަށް ލީޑާޝިޕްގެ ބައެއް ފެކްޝަންތަކުން ބޭނުންވާ ދެ ބޭފުޅެއް ހިމެނޭ ކަމަށް "އަދަދު" އަށް ވަނީ އެނގިފަ އެވެ.
ނަން ނުޖެހުމަށް ޝަރުތުކޮށް ވާހަކަ ދެއްކި ޕީޕީއެމްގެ އިސް ބޭފުޅަކު ވިދާޅުވީ ލީޑާޝިޕްގެ އެއް ބަޔަކު ޝުޖާއު ހޮވުމަށް ބޭނުންވާއިރު، ބައެއް މީހުން މާފަންނު މެދަށް އިންތިހާބުވި އަހުމަދު ނަރީޝް ހޮވަން ބޭނުންވާ ކަމަށެވެ. އަދި ނަން ހާމަކޮށްފައި ނެތް އެހެން ކައުންސިލަރަކު ވެސް ޑެޕިއުޓީ މޭޔަރު ކަމަށް ގެނައުމަށް ލީޑާޝިޕްގެ ބައެއް ބޭފުޅުން ބޭނުންވާ ކަމަށް އޭނާ ވިދާޅުވި އެވެ.
މި ހިޔާލު ތަފާތުވުމަށް އިޝާރާތް ކުރައްވައި، ޕީޕީއެމްގެ ނައިބު ރައީސް، ނައިފަރު ދާއިރާގެ މެމްބަރު ޝިޔާމް ވިދާޅުވީ "ހިޔާލު ތަފާތުވުންތައް އެއްގޮތް ކުރެވޭނެ" ކަމަށެވެ.
"ޕާޓީގެ އެތެރޭގައި ކަންކަމާ މެދު ހިޔާލު ތަފާތުވުން އުފެދުނު ނަމަވެސް، ކަންކަން ނިންމާނީ އެންމެ މަސްލަހަތު ހުރި ގޮތަށް. ރައްޔިތުންނަށާއި ޕާޓީގެ މަސްލަހަތަށް،" ޝިޔާމް ވިދާޅުވި އެވެ.
ކައުންސިލް އިންތިހާބުގައި ޕީޕީއެމްއަށް ރައްޔިތުން ވަރަށް ބޮޑު އިތުބާރެއް ދީފައިވުމާ އެކު، އެ ޕާޓީގެ މެޖޯރިޓީ އޮތް ކައުންސިލްތަކުގެ ޑެޕިއުޓީ މޭޔަރާއި ނައިބު ރައީސުން ހޮވުމުގައި ރައްޔިތުން ދިން އިތުބާރު ނުގެއްލޭނެ ގޮތަށް އަމަލުކުރުކީ އެންމެ މަސްލަހަތު އޮތް ގޮތް ކަމަށް ޝިޔާމް ވިދާޅުވި އެވެ.
"ރައްޔިތުންގެ އިތުބާރާ އެކު ހިދުމަތްކުރަން ނުކުމެ، [ޑެޕިއުޓީ މޭޔަރުކަމާއި ނައިބު ރައީސުން ހޮވުމުގައި] ރައްޔިތުންގެ އިތުބާރު ގެއްލުވާލައިގެން ނުވާނެ. އެހެންވެ، މިކަމުގައި ޕާޓީގެ ވިސްނުން ހުރި ގޮތް އެނގެން ރައްޔިތުން ވެސް ބޭނުންވާނެ،" ޝިޔާމް ވިދާޅުވި އެވެ.
"އެހެންވެ އަޅުގަނޑުމެން ލީޑާޝިޕުން ވިސްނާ ގޮތެއް މިއަދު ނިންމާފައި ހާމަކުރާނަން،" ޝިޔާމް ވިދާޅުވި އެވެ.
ލޯކަލް ކައުންސިލްތަކުގެ އިންތިހާބުގައި ވެރިކަންކުރާ އެމްޑީޕީން ވަނީ 400 ގޮނޑިއާ އެކު ކައުންސިލުތަކުގެ އަގުލަބިއްޔަތު ނަގައިފަ އެވެ. އިދިކޮޅު ޕީޕީއެމް/ޕީއެންސީ ކޯލިޝަނަށް ކާމިޔާބުވީ 325 ގޮނޑި އެވެ.
ނަމަވެސް، މާލެ ސިޓީ ކައުންސިލްގެ އަގުލަބިއްޔަތާއި ކުރިން އެމްޑީޕީގެ ތާއީދު ބޮޑު ބައެއް ރަށްތަކުން ވެސް މުހިއްމު ގޮނޑިތަކެއް އިދިކޮޅުން ވަނީ ކާމިޔާބުކޮށްފަ އެވެ. އެމްޑީޕީއާ ވާދަކޮށް މާލޭގެ މޭޔަރުކަމަށް އިންތިހާބުވީ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ.
މިއީ މާލޭން އިންތިހާބެއް އިދިކޮޅު ޕީޕީއެމް/ޕީއެންސީއަށް ކާމިޔާބުވި ފުރަތަމަ ފަހަރެވެ. މީގެ ކުރިން ހުރިހާ އިންތިހާބެއްގައި މާލޭގެ އަގުލަބިއްޔަތު ނަގަނީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީންނެވެ.
