އަފްގާނިސްތާނުގެ ސަރުކާރާއި ތާލިބާނުންގެ މަންދޫބުން ސުލްހައިގެ މަޝްވަރާތައް އަލުން ފަށައި، ގަތަރުގައި ފުރަތަމަ ބައްދަލުވުން ބާއްވައިފި އެވެ.
ގިނަ ދުވަސްތަކެއް ވަންދެން ހުއްޓިފައި އޮތް ސުލްހައިގެ މަޝްވަރާ އަލުން ފެށިއިރު، ތާލިބާނުން ވަނީ އީދާ ދިމާކޮށް އަފްގާން ސިފައިންނަށް ތިން ދުވަސް ވަންދެން ހަމަލާ ނުދޭނެ ކަމަށް ބުނެފަ އެވެ.
ތާލިބާނާއި އަފްގާން ސަރުކާރާ ދެމެދު ހިނގަމުންދާ ދިގު ހަނގުރާމަ ނިންމުމާ ގުޅޭ ގޮތުން ސުލްހައިގެ މަޝްވަރާތައް ފެށީ މިދިޔަ ސެޕްޓެމްބަރު މަހު އެވެ. ނަމަވެސް ހަމަލާތަކަށް ހުއްޓުމެއް ނައުމުން ސުލްހައިގެ މަޝްވަރާތަކަށް ވެސް ހުއްޓުން އެރި އެވެ. ސެޕްޓެމްބަރު 11 ގެ ކުރިން އެމެރިކާ އާއި ނޭޓޯގެ ސިފައިން އަފްގާނިސްތާނުން ފައިބަން ތައްޔާރު ވާތީ އަނެއްކާވެސް ހަމަނުޖެހުން ވަނީ ބޮޑުވެފަ އެވެ.
"ދެ ފަރާތުން ވަނީ ގައުމުގެ ހާލަތާ މެދު މަޝްވަރާކޮށް، ސުލްހައިގެ މަޝްވަރާތައް ހަލުވިކަމާ އެކު ކުރިއަށް ގެންދިޔުމުގެ މުހިއްމުކަން ފާހަގަކޮށްފައި،" އަފްގާން ސަރުކާރުގެ ފަރާތުން މަޝްވަރާގައި ބައިވެރިވާ ޓީމުން ޓްވިޓާގައި ބުންޏެވެ.
ތާލިބާނުންގެ ސިޔާސީ އޮފީހުގެ ތަރުޖަމާނު މުހައްމަދު ނައީމު ވެސް ޓްވިޓާގައި ވިދާޅުވީ އީދަށް ފަހު މަޝްވަރާތައް ގަވާއިދުން ކުރިއަށް ގެންދަން ދެ ފަރާތުން އެއްބަސްވެފައިވާ ކަމަށެވެ.
ތާލިބާނާއި އަފްގާން ސަރުކާރު އެއް ގަލަކަށް އަރުވައި، ސުލްހަ ގާއިމް ކުރުމަކީ ހުޅަނގުގެ ގައުމުތަކުން، ވަކިން ހާއްސަކޮށް، އެމެރިކާއިން ވަރަށް ބޭނުންވާ ކަމެކެވެ. އެމެރިކާއިން އަފްގާނިސްތާނުގައި ތާލިބާނުންނާ ދެކޮޅަށް ކުރި 10 އަހަރުވީ ދިގު ހަނގުރާމަ ނިންމާލައި، އެނބުރި ގައުމަށް ސިފައިންތައް ދާއިރު، ސުލްހަ ގާއިމްވެފައި ނެތުމަކީ ނާކާމިޔާބެއްގެ ގޮތުގައި ގިނަ ފަރާތްތަކުން ސިފަ ކުރެ އެވެ.
މިދިޔަ މަހު އެމެރިކާއިން އިސްނަގައިގެން ތުރުކީގައި ބާއްވަން މަސައްކަތް ކުރި ސުލްހައިގެ މަޝްވަރާގައި ތާލިބާނުން ބައިވެރިވެފައެއް ނުވެ އެވެ. އެހެންކަމުން އެ ބައްދަލުވުންތައް ވަނީ މުއްދަތެއް ނެތް ގޮތަށް ފަސްކޮށްފަ އެވެ.
