ރާއްޖޭގައި ކޮވިޑުގެ ހާލަތު އިންތިހާއަށް ނުރައްކާވެފައިވާ ދަނޑިވަޅެއްގައި، އެ ބަލިން ރައްކާތެރިވާން ރަޝިއާއިން އުފެއްދި "ސްޕަޑްނިކް ވީ" ވެކްސިން ރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެފްޑީއޭ)އިން ދީފި އެވެ.
ސްޕަޑްނިކް ވެކްސިން ރާއްޖޭގައި ބޭނުން ކުރަން ހުއްދަ ދިނީ އިމާޖެންސީ ހާލަތްތަކުގަ އެވެ. އަދި މި ވެކްސިން ޖަހާނީ 18 އަހަރުން މަތީގެ މީހުންނަށް އެކަންޏެވެ.
މި ވެކްސިނަކީ ރާއްޖޭގައި ބޭނުންކުރަން ހުއްދަ ދިން ހަތަރު ވަނަ ވެކްސިނެވެ. މީގެ ކުރިން ރާއްޖޭގައި ހުއްދަ ދީފައިވާ ވެކްސިންތަކަކީ އިންޑިއާގެ ކޮވިޝީލްޑް، ޗައިނާގެ ސިނޯފާމް އަދި އެމެރިކާގެ ފައިޒާ ވެކްސިނަށެވެ.
ވެކްސިންގެ ރައްކާތެރިކަން ކަށަވަރުކުރިން
މި ވެކްސިން ރާއްޖޭގައި ބޭނުންކުރަން ހުއްދަ ދިންކަން އިއުލާނުކޮށް އެފްޑީއޭއިން ނެރުނު ބަޔާނުގައި ބުނީ، މި ވެކްސިނަށް ހުއްދަ ދިނީ މިކަމުގައި ބަލަންޖެހޭ ކަންކަން ފުރިހަމައަށް ބަލައި ދިރާސާކުރުމަށް ފަހު ކަމަށް ބުންޏެވެ. އަދި އެއީ ނޭޝަނަލް ފާމަސޫޓިކަލް ބޯޑުގެ ލަފަޔާ މަޝްވަރާއާ އެކު ނިންމި ނިންމުމެއް ކަމަށް ބުންޏެވެ.
ރަޝިއާގެ ގަމާލެޔާ ނޭޝަނަލް ސެންޓާ އޮފް އެޕިޑާމޮލޮޖީ އެންޑް މައިކްރޯބައޮލޮޖީން އުފެއްދި މި ވެކްސިނަކީ ކޮވިޑުން ރައްކާތެރިވާން ދުނިޔޭގައި އެންމެ ފުރަތަމަ ބޭނުންކުރަން ފެށި ވެކްސިނެވެ. މިހާރު ދުނިޔޭގެ 66 ގައުމަކުން އަންނަނީ މި ވެކްސިން ބޭނުންކުރަމުންނެވެ.
އެފްޑީއޭއިން ބުނި ގޮތުގައި މި ވެކްސިނަކީ -18 ޑިގްރީ ސެލްސިއަސްގައި ބަހައްޓަން ޖެހޭ ވެކްސިނެކެވެ. އެހެންކަމުން ވެކްސިން ރާއްޖެ އެތެރެ ކުރުމުގެ ކުރިން ވާންޖެހޭ ތައްޔާރީތަކާއި، ވެކްސިން އެތެރެ ކުރުމަށް ފަހުގައްޔާއި، އަދި އެ ހިފާ ގެންގުޅުމުގެ ހުރިހާ މަރުހަލާއެއްގައި ވެސް "ކޯލްޑް ޗެއިން" ބެލެހެއްޓުމަށް ޝަރުތުކޮށްގެނެވެ. އަދި އެފްޑީއޭ، ހެލްތް ޕްރޮޓެކްޝަން އެޖެންސީ އަދި ހެލްތް މިނިސްޓްރީ ގުޅިގެން މިކަންކަން ބަރާބަރަށް މޮނީޓާ ކުރަމުން ދާނެ ކަމަށް އެފްޑީއޭއިން ބުންޏެވެ.
ރާއްޖޭގައި ސްޕަޑްނިކް ވީ ވެކްސިން ރާއްޖޭގައި ބޭނުންކުރަން ހުއްދަ ދިނީ ވެކްސިން ސަޕްލައި ހޯދުމަށް ދަތިތަކެއް ކުރިމަތިވެގެން އުޅޭ ދަނޑިވަޅެއްގަ އެވެ.
އެގޮތުން، ރާއްޖޭގައި އެންމެ ގިނަ އަދަދެއްގެ ބަޔަކަށް ފުރަތަަމަ ޑޯޒް ޖަހާފައިވާ ކޮވިޝީލްޑް ވެކްސިންގެ ސްޓޮކް ދަށަށް ގޮސްގެން އެ ވެކްސިން ޖެހުން ވަނީ ވަގުތީ ގޮތުން މެދުކަނޑާލާފަ އެވެ. ކޮވިޝީލްޑް ވެކްސިންގެ ބާކީ ހުރި ސަޕްލައި މިހާރު ބޭނުންކުރަނީ ފްރަންޓްލައިން ވޯކަރުންނާއި، އުމުރުން ދުވަސްވީ މީހުންގެ އިތުރުން ސިއްހީ ގޮތުން ނުރައްކަލަށް ހުށައެޅިފައިވާ ފަރާތްތަކަށް ޑޯޒް ފުރިހަމަކުރަންށެވެ.
ކޮވިޝީލްޑް ނަގާފައި ރާއްޖޭގައި އެންމެ ގިނަ ބަޔަކަށް ޖަހަމުންދާ ސިނޮފާމް ވެކްސިން ޖެހުމުގެ ކަންކަން އަދިވެސް ދަނީ ކުރިޔަށެވެ. ނަމަވެސް މި ވެކްސިންގެ ފުރަތަމަ ޑޯޒް ޖަހަން ތަރުހީބު ކުޑަކަމަށް އެޗްޕީއޭއިން ބުނެ އެވެ. އަދި އެ ވެކްސިންގެ ދެވަނަ ޑޯޒް ޖަހަން މުއްދަތު ހަމަވެފައިވާ މީހުންގެ ތެރެއިން 77 ޕަސެންޓު މީހުން ނާންނަ ކަމަށް ބުންޏެވެ.
ރާއްޖޭގައި ފައިޒާ ވެކްސިން މި ވަގުތު ޖަހަމުން ދަނީ ސިއްހީ ގޮތުން ނުރައްކަލަށް ހުށައެޅިފައިވާ މީހުންނަށް އެކަންޏެވެ.
