މެޑްރިޑް (މެއި 12) - ސްޕެނިޝް ލީގުގައި މިރޭ ފަހު ވަގުތު ލެވަންޓޭއާ 3-3 އިން އެއްވަރުވެ ބާސެލޯނާ އިން ލީގު ހޯދުމުގެ ރޭހުގައި ބޮޑު ފުރުސަތެއް ގެއްލުވާލައިފި އެވެ.
މިރޭގެ މެޗުން މޮޅުވެގެން ބާސެލޯނާ އަށް އެއް ވަނަ އަށް އަރައި އެތުލެޓިކޯ މެޑްރިޑާއި ރެއާލް މެޑްރިޑަށް ޕްރެޝަރު ކުރުމުގެ ފުރުސަތު އޮތެވެ. އެކަމަކު ބާސެލޯނާ އިން ދެ ގޯލުގެ ލީޑެއް ނަގައި ފަހު ވަގުތު މެޗުގެ ދެ ޕޮއިންޓް ވެސް ގެއްލުވާލީ އެވެ. މި ނަތީޖާ އަށް ފަހު ލީގުގެ އެއް ވަނަ އަށް ބަދަލެއް ނާދެ އެވެ.
އެތުލެޓިކޯ އެއް ވަނައިގައި އޮތީ 35 މެޗުން 77 ޕޮއިންޓް ހޯދައިގެންނެވެ. ބާސެލޯނާ ދެ ވަނައިގައި އޮތީ 36 މެޗުން 76 ޕޮއިންޓާ އެކު އެވެ. ތިން ވަނައިގައި އޮތް ރެއާލަށް 35 މެޗުން ވަނީ 75 ޕޮއިންޓް ލިބިފަ އެވެ. ސެވިއްޔާ ހަތަރެއްގައި އޮތީ 35 މެޗުން 71 ޕޮއިންޓާ އެކު އެވެ.
މާދަމާރޭ އަމިއްލަ ދަނޑުގައި ރެއާލް ސޮސިއެޑާޑް ބަލިކޮށްގެން އެތުލެޓިކޯ އަށް އެއް ވަނައިގައި ހަތަރު ޕޮއިންޓުގެ ލީޑެއް ނެގޭނެ އެވެ. އެތުލެޓިކޯ އަށް އެންމެ ފަހުން ލީގު ލިބުނީ 2014 ވަނަ އަހަރު އެވެ. މި ފަހަރު މިއީ އަލުން ލީގު ހޯދަން އެ ޓީމަށް ރަނުގެ ފުރުސަތެކެވެ. ބުރާސްފަތި ދުވަހުގެރޭ ރަށުންބޭރުގައި ގްރަނާޑާގެ މައްޗަށް ކުރިހޯދައިގެން ރެއާލަށް ދެ ވަނަ އަށް އެރޭނެ އެވެ.
މެޗުގެ 25 ވަނަ މިނިޓްގައި ލިއޮނަލް މެސީ ބާސެލޯނާ އަށް ގޯލެއް ޖަހައި ހިތްހަމަ ޖެހުމެއް ހޯދައިދިނެވެ. ފުރަތަމަ ހާފު ނިމުމުގެ ކުރިން އޮސްމާން ޑެމްބެލޭ ދިން ބޯޅައަކުން ޕެޑްރީ ވަނީ ބާސެލޯނާ ލީޑުފުޅާކޮށްދީފަ އެވެ. ދެ ވަނަ ހާފް ފަށައިގެން ފުރަތަމަ 15 މިނިޓް ތެރޭ މަންޒަރު ބަދަލުވި އެވެ. ތިން މިނިޓް ތެރޭ ދެ ގޯލު ޖަހައި ލެވަންޓޭ އިން ނަތީޖާ ހަމަހަމަކުރި އެވެ. އެ ޓީމުގެ ފުރަތަމަ ގޯލު 57 ވަނަ މިނިޓްގައި ގޮންޒާލޯ މެލޭރޯ ޖަހާފައި ވަނިކޮށް އޭގެ ދެ މިނިޓް ފަހުން ހޯސޭ ލުއިސް މޮރާލޭސް ގޯލެއް ޖަހައި ނަތީޖާ ހަމަހަމަކުރި އެވެ.
ބާސެލޯނާ އަށް އަލުން ލީޑުނަގައިދިނީ 64 ވަނަ މިނިޓްގައި ޑެމްބެލޭ އެވެ. އެކަމަކު ލެވަންޓޭ އިން އަނެއްކާ ވެސް ހިތްވަރުކޮށް ނަތީޖާ ހަމަހަމަކުރީ މެޗު ނިމެން ހަތް މިނިޓަށް ވެފައި ހުއްޓަ އެވެ. މި ގޯލު ޖެހީ ސާޖިއޯ ލެއޯން އެވެ.
މި ފަހަރުގެ ލީގު ނުލިބިއްޖެނަމަ ބާސެލޯނާގެ ކޯޗު ރޮނާލްޑް ކޫމަން އަށް ވަޒީފާ ގެއްލިދާނެ ކަމަށް ފާއިތުވި ދުވަސްތަކުގައި ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ. މިރޭގެ މެޗަށް ފަހު ކޫމަން ބުނީ މިއީ އޭނާގެ އަމިއްލަ ވާހަކަތައް ދައްކަން ބޭނުންވާ ވަގުތެއް ނޫން ކަމަށާއި ކުރިއަށް ހުރި މެޗުތަކަށް ފޯކަސް ކުރަން ބޭނުންވާ ކަމަށް ބުނެފަ އެވެ.
ބާސެލޯނާ އަށް ދެން އޮތް ދެ މެޗަކީ އަމިއްލަ ދަނޑުގައި ސެލްޓަ ވިގޯ އާއި ރަށުންބޭރުގައި އެއިބާއާ ބައްދަލުކުރާ މެޗެވެ.
