ކޮވިޑް-19ގެ ދިފާއެއްގެ ގޮތުން ޖަހަމުން އަންނަ ވެކްސިން ވީ އެންމެ އަވަހަކަށް ރާއްޖެ އަށް ހޯދަން މަސައްކަތް ކުރަމުން އައި ނަމަވެސް ސީދާ ތާރީހެއް އަދިވެސް ނޭނގޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބުނެފި އެވެ.
ރާއްޖޭގައި ކޮވިޑް ވެކްސިނޭޝަން ޕްރޮގްރާމް މިދިޔަ ފެބުރުއަރީ މަހު ފެށީ، އާބާދީގެ ބޮޑު ބަޔަކަށް ދެ ޑޯޒު ޖެހޭ ވަރަށް ވެކްސިން ހަމަޖެހިފައިވާ ކަމުގެ ޔަގީންކަމާ އެކުގަ އެވެ. އެކަމަކު ރާއްޖޭގައި އެންމެ އާއްމުކޮށް ދެމުން ދިޔަ ކޮވިޝީލްޑް ޖެހުން މީގެ ހަފުތާއެއްހާ ދުވަސްކުރިން ވަނީ ހުއްޓާލައިފަ އެވެ. އެއީ ވެކްސިން ހޯދުމުގައި ދަތިތަކެއް ކުރިމަތިވެފައިވާތީ އެވެ.
ވެކްސިން ޕްރޮގްރާމް ފެށީ އިންޑިއާ އާއި ޗައިނާ އަދި އެހެން ގައުމުތަކުން ހަދިޔާކުރި ވެކްސިނުންނެވެ. އެކަމަކު ރާއްޖެ އިން ވަނީ ސިންގަޕޫރުގެ އެސްޓްރާޒެނިކާ އިން 700،000 ޑޯޒަށް ފައިސާ ދައްކައިފަ އެވެ. އެ ވެކްސިން ލިބުން ލަސްވެގެން އިންޑިއާގެ ސިރަމް އިންސްޓިޓިއުޓަށް 300،000 ޑޯޒު ގަތުމަށް ފައިސާ ދެއްކި އެވެ. އޭގެތެރެއިން މިހާތަނަށް ރާއްޖެ އަށް ލިބުނީ 100،000 ޑޯޒެވެ. ބާކީ 200،000 ލިބޭނެ ދުވަހެއް ނޭނގެ އެވެ.
އެޗްއީއޯސީގެ ޕްރެސް ކޮންފަރެންސްތަކުގައި ސަރުކާރުގެ ފަރާތުން މައުލޫމާތު ހިއްސާކުރައްވާ ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ މަސައްކަތްތަކެއް ކުރަމުން އަޔަސް ބޭނުންވާ ވަރަށް ސްޓޮކް އަދި އުޅެނީ ހަމަނުޖެހިގެން ކަމަށެވެ. އިންޑިއާގެ ސިރަމް އިންސްޓިޓިއުޓަށް ފައިސާ ދެއްކި ވެކްސިން ނުލިބުނީ ބަލީގެ ހާލަތު އެ ގައުމުގައި ގޯސްވެ، އެކްސްޕޯޓް ނުކުރެވުމުން ކަމަށް ވިދާޅުވި އެވެ.
ސިންގަޕޫރުގެ ކުންފުންޏަށް ފައިސާ ދެއްކި 700،000 ޑޯޒުގެ ވެކްސިން އަންނާނެ ކަމަށް ލަފާކުރަނީ އަންނަ މަހުގެ ތެރޭގަ އެވެ.
"އޭގެ ކުރިން ވެސް ވެކްސިން ހޯދަން އެކުވެރި ގައުމުތަކާ އެކު މަސައްކަތްތަކެއް އެބަކުރެވޭ،" މަބްރޫކް ވިދާޅުވި އެވެ.
އެކަމަކު ސީދާ ވެކްސިން ލިބޭނެ ދުވަހެއް އަދި ނޭނގެ އެވެ.
މަބްރޫކް ވިދާޅުވި ގޮތުގައި ރާއްޖެއަށް ވެކްސިން ހޯދުމަކީ ރައީސް އިބްރާހިމް މުހައްމަދު ސޯލިހް މިވަގުތު އެންމެ އިސްކަންދެއްވާ ކަންތައްތަކުގެ ތެރޭގައި ހިމެނެ އެވެ. އެންމެ އަވަހަށް ވެކްސިން ހޯދޭނެ ގޮތްތަކެއް ވެސް ބަލަމުން އަންނަ ކަމަށް ވިދާޅުވި އެވެ.
ރާއްޖޭގައި މިހާރު ހުރި ކޮވިޝީލްޑުގެ ސްޓޮކުން ވެކްސިން ދެމުން އަންނަނީ ބަލީގައި ބޮޑުވެދާނެ މީހުންނާއި ކޮވިޑުގެ އިސް ސަފުގައި މަސައްކަތް ކުރާ މީހުންނަށެވެ.
ރާއްޖެއިން ވެކްސިން ހޯދަން ފައިސާ ދައްކައި ނުލިބި ލަސްވަމުން ދިއުމަކީ ކޮވިޑް-19 އަށް ހޯދަން އުޅުނު ވެންޓިލޭޓަރަށް ވީ ގޮތް މެދުވެރިވެދާނެ ކަމެއް ކަމުގެ ތުހުމަތު ދަނީ އަޅުވަމުންނެވެ. މިކަމަށް ރައްދު ދެއްވަމުން މަބްރޫކް ވިދާޅުވީ އެކަމުގައި މައްސަލަތަކެއް އުޅޭ ކަަމަށް ހީވާ ނަމަ ކަމާބެހޭ އިދާރާތަކަށް ހިއްސާކުރަންވީ ކަމަށެވެ.
