ބާސެލޯނާ (މެއި 8) - ސްޕެނިޝް ލީގުގައި މިރޭ އެއް ވަނައިގައި އޮތް އެތުލެޓިކޯ މެޑްރިޑާއި ދެ ވަނައިގައި އޮތް ބާސެލޯނާ ކުޅުނު މެޗު ލަނޑެއް ނުޖެހި 0-0 އިން އެއްވަރުވުމުން ލީގުގެ ތިން ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް ލީގުގެ އެއް ވަނަ އަށް އެރުމުގެ ފުރުސަތު ލިބިއްޖެ އެވެ.
އެއް ވަނައިގައި އެތުލެޓިކޯ މި ވަގުތު އޮތީ 35 މެޗުން 77 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް 35 މެޗުން ވަނީ 75 ޕޮއިންޓް ލިބިފަ އެވެ. ތިން ވަނައިގައި މި ވަގުތު ރެއާލް އޮތީ 34 މެޗުން 74 ޕޮއިންޓާ އެކު އެވެ. ހަތަރެއްގައި އޮތް ސެވިއްޔާ އަށް 34 މެޗުން ވަނީ 70 ޕޮއިންޓް ލިބިފަ އެވެ. މާދަމާރޭ ސެވިއްޔާ އަތުން މޮޅުވެގެން ރެއާލަށް އެއް ވަނަ އަށް އެރޭނީ އެތުލެޓިކޯއާ ޕޮއިންޓުގެ ގޮތުން އެއްވަރުވި ނަމަވެސް ހެޑް ޓު ހެޑް ގަވާއިދުން ކުރި ލިބޭނެތީ އެވެ. އެހެންކަމުން ލީގުގައި ބާކީ އޮތް ތިން މެޗުން މޮޅުވެގެން ރެއާލަށް ލީގު ތަށި ދިފާއުކުރެވޭނެ އެވެ.
ބާސެލޯނާ ދަނޑުގައި މިރޭ ކުޅުނު މެޗުގައި ޖުމްލަކޮށް ބަލާއިރު ދެ ޓީމުގެ ފަރާތުން ވެސް ފެނުނީ ދާދި ހަމަހަމަ ކުޅުމެކެވެ. ބާސެލޯނާގެ ކެޕްޓަން ލިއޮނަލް މެސީ ގޯލު ޖަހަން ފުރުސަތު ތަނަވަސްކުރަން ކުރި މަސައްކަތްތައް އެތުލެޓިކޯ ޑިފެންޑަރުންނާއި ގޯލްކީޕަރު ޔެން އޮބްލަކް ވަނީ ހުއްޓުވައިފަ އެވެ. އަނެއްކޮޅުން އެތުލެޓިކޯގެ ފޯވާޑް ލުއިސް ސުއަރޭޒް ޖެހި ބޯޅަތައް ބާސެލޯނާގެ ކީޕަރު ޓާ ސްޓެގެން ވަނީ މަތަކޮށްފަ އެވެ. މިއީ ބާސެލޯނާ ދޫކޮށް އެތުލެޓިކޯއާ ގުޅުނު ފަހުން ބާސެލޯނާ ދަނޑުގައި ސުއަރޭޒް ކުޅުނު ފުރަތަމަ މެޗެވެ.
ދެ ވަނަ ހާފްގައި ބާސެލޯނާ އިން އެޓޭކް ވަރުގަދަކުރި ނަމަވެސް ގޯލެއް ޖެހޭ ގޮތެއްނުވި އެވެ. އެ ގޮތުން އެންޓޮއިން ގްރީޒްމަން އާއި އޮސްމާން ޑެމްބެލޭ އަށް ލަނޑު ޖަހަން ލިބިގެންދިޔަ ފުރުސަތުތަކުގެ ބޭނުމެއް ނުހިފުނެވެ. ގޯލާ ސީދާކޮށް ފޮނުވާލެވޭ ގޮތްނުވީ އެވެ. ބާސެލޯނާގެ ރޮނާލްޑް އަރައުހޯ ބޮލުން ގޯލެއް ޖެހި ނަމަވެސް އޭނާގެ ގޯލު ބަލައިނުގަތީ އޮފްސައިޑްވުމުންނެވެ.
މި މެޗުން މޮޅެއް ނުލިބުމުން ލީގުގެ ރޭހުގައި ބާސެލޯނާ އަށް ގެއްލުނު ފުރުސަތު ބޮޑެވެ. އެ ޓީމު ވަނީ އެތުލެޓިކޯ އަތުން ލީގުގެ ކުރީކޮޅުގައި ބަލިވެފަ އެވެ. އެހެންވެ ދެ ޓީމު ޕޮއިންޓް އެއްވަރުވެއްޖެ ހިނދެއްގައި ހެޑް ޓު ހެޑް ގަވާއިދުން ކުރި ލިބޭނީ އެތުލެޓިކޯ އަށެވެ.
ބާސެލޯނާގެ ކޯޗު ރޮނާލްޑް ކޫމަން ސަސްޕެންޝަނެއްގައި ހުރުމުގެ ސަބަބުން މި މެޗުގައި ވެސް ޓީމަށް އިރުޝާދުދޭން އޭނާ އަށް ބެންޗުގައި ނީނދެވުނެވެ.
