އޮސްޓްރޭލިއާގައި ޑްރަގް ޓްރެފިކް ކުރުމުގެ ކުށް ސާބިތުވެފައި ހުރި ތައިލެންޑުގެ މިނިސްޓަރަކަށް އެ މަގާމުގައި ހުރެވޭނެ ކަމަށް ކޯޓުން ކަނޑައަޅައިފި އެވެ.
ތައްމަނަޓް ޕްރޮމްޕާއޯގެ މައްޗަށް ޑްރަގް އެތެރެ ކުރުމުގެ ކުށް ސާބިތުވެ، ހަތަރު އަހަރަށް ޖަލަށް ލާން އޮސްޓްރޭލިއާގައި ހުކުމް ކުރީ 1994 ގައެވެ.
އިދިކޮޅު ފަރާތްތަކުން ވަނީ އޭނާއަކީ މިނިސްޓަރު ކަމަށް ޝަރުތު ހަމަވާ މީހެއް ނޫން ކަމަށް ބުނެ ކޯޓަށް ގޮސްފަ އެވެ. ނަމަވެސް ކޯޓުން ވަނީ މައްސަލަ ބޭރުކޮށްފަ އެވެ.
ކޯޓުން ބުނީ ތައްމަނަޓްގެ މައްސަލަ ހިނގީ އޮސްޓްރޭލިއާގައި ކަމަށާއި އެހެން ގައުމެއްގައި ކުރި ހުކުމެއް ތައިލެންޑުގައި ބަލައިނުގަނެވޭނެ ކަމަށެވެ.
އެހެންކަމުން ތައިލެންޑުގެ ގާނޫނު އަސާސީގެ ދަށުން އޭނާއަށް މިނިސްޓަރު ކަމުގައި ދެމިހުރެވޭނެ ކަމަށް ކޯޓުން ވަނީ ކަނޑައަޅާފަ އެވެ.
ކޯޓުގެ ނިންމުމާއެކު އޭނާއަށް ޕާލިމެންޓު މެމްބަރެއްގެ ގޮތުގައި ދެމިހުރެވޭނެ އެވެ. އަދި ބޮޑު ވަޒީރު ޕްރަޔުތް ޗަން އޮޗާގެ ކެބިނެޓުގައި މިނިސްޓަރެއްގެ ގޮތުގައި ދެމިހުރެވޭނެ އެވެ.
ތައްމަނަޓްއަށް ކުރިން ކުރި ހުކުމް އާއްމުންނަށް ތިލަވީ 2019 ވަނަ އަހަރު ޑެޕިއުޓީ އެގްރިކަލްޗަރު މިނިސްޓަރުކަން އޭނާއަށް ދިނުމުންނެވެ.
އޮސްޓްރޭލިއާއިން ހުކުމް ކުރީ ރަނގަޅަށް ނޫން ކަމަށް އޭނާ ބުނެ އެވެ. އެގޮތުން 3.2 ކިލޯގެ ހިރޮއިން ފެނުނު ކަމަށް ބުނި ނަމަވެސް، އެއީ ފުށް ކަމަށް ބުނެފައި ވެއެވެ.
