ލަންކާގައި މިވަގުތު އިންތިހާއަށް ކޮވިޑް ފެތުރޭތީ އަޅާފައިވާ ފިޔަވަޅުތައް ވަރުގަދަކޮށް، މި މަހުގެ 21 އިން ފެށިގެން މަހުގެ ނިޔަލަށް ރާއްޖެއިން ލަންކާއަށް ދަތުރުކުރުން ލަންކާ ސަރުކާރުން މަނާކޮށްފި އެވެ.
ލަންކާ ސަރުކާރުން މިކަން ރާއްޖޭގެ ފޮރިން މިނިސްޓްރީއަށް އެންގުމާއި ގުޅިގެން އެ މިނިސްޓްރީން ވަނީ ކުރިއަށް ދުވަސްތަކުގެ ތެރޭގައި ލަންކާއަށް ދަތުރުކުރަން ގަސްތުކުރާ ދިވެހިންނާއި ބިދޭސީން އެކަމަށް ސަމާލުވުމަށް އެދިފަ އެވެ.
ލަންކާ ސަރުކާރުން ވަނީ ރާއްޖޭގެ އިތުރުން ދުނިޔޭގެ ހުރިހާ ގައުމަކުން އެ ގައުމަށް ދިހަ ދުވަހުގެ މުއްދަތަކަށް މީހުން އެތެރެވުން މަނާކޮށްފަ އެވެ. އެކަމަކު މި މުއްދަތުގެ ތެރޭގައި ލަންކާއިން ބޭރަށް ދާން ބޭނުންވާ މީހުންނަށް ދަތުރު ކުރެވޭނެ އެވެ.
ކޮވިޑުން ރައްކާތެރިވާން އަޅާފައިވާ ފިޔަވަޅުތައް އިތުރަށް ވަރުގަދަ ކުރަން ލަންކާ ސަރުކާރުން ނިންމީ ލަންކާގައި ހަލުވިކަމާއެކު ކޮވިޑް ފެތުރޭތީ އެވެ. އިއްޔެއަކީ އެ ގައުމުން ފުރަތަމަ ފަހަރަށް ދުވާލެއްގެ މައްޗަށް 3000 އަށް ވުރެ ގިނަ ކޭސް ރިޕޯޓް ކުރެވުނު ދުވަހެވެ. އެ ގައުމުގައި މަރުވާ މީހުންގެ އަދަދުތައް ވެސް ވަނީ އުފުލިފަ އެވެ.
މީގެ ދެ ތިން ހަފުތާއެއް ކުރިން އެ ގައުމަށް އައި ސާޖަކީ، ރާއްޖެ ހިމެނޭ ގޮތަށް ދެކުނު އޭޝިއާގެ ގިނަ ގައުމުތަކަށް އައިސްފައިވާ ކޮވިޑުގެ ރާޅާ ގުޅިގެން އައި ސާޖެކެވެ.
މީގެ ކުރިން އެ ގައުމުން ވަނީ އެ ގައުމަށް އެތެރެވާން އަންނަ މީހުން ކަރަންޓީނު ވާން އެޅި ފިޔަވަޅުތައް އަލުން ތަންފީޒުކޮށް، އިންޑިއާއިން އެ ގައުމަށް އެތެރެވުން މަނާކޮށްފަ އެވެ.
ލަންކާ ސަރުކާރުން އެ ގައުމުގެ އެތެރޭގައި ވެސް ކޮވިޑުން ރައްކާތެރިވާން ގިނަ މީހުން އެއްވެ އުޅުން ފަދަ ކަންކަން މަނާކޮށްފަ އެވެ.
ރާއްޖެއިން ލަންކާއަށް ދަތުރުކުރުން މަނާކުރި އިރު މީގެ ކުރިން ރާއްޖެއަށް އައުން މަނާކުރެވުނު ދެކުނު އޭޝިއާގެ ގައުމުތަކުގެ ލިސްޓުގައި ލަންކާ ހިމެނެ އެވެ. އެހެންކަމުން ރާއްޖެއިން ލަންކާއަށް ނުދެވޭ މުއްދަތުގެ ތެރޭގައި އެ ގައުމުން ރާއްޖެއަކަށް ނާދެވޭނެ އެވެ.
