ސްރީ ލަންކާގައި ކޮވިޑުގެ ހާލަތު ކޮންޓްރޯލުން ނައްޓައިގެން ދިޔުމުގެ ބިރު ވަރަށް ބޮޑު ކަމަށް ލަންކާ މެޑިކަލް އެސޯސިއޭޝަނުގެ ރައީސް ޑރ. ޕަޑްމާ ގުނަރަތްނެ ވިދާޅުވެއްޖެ އެވެ.
ގުނަރަތްނެ ވިދާޅުވީ މި ހާލަތު ސީރިއަސްކޮށް ނަގަން ޖެހޭ ކަމަށާއި ވަގުތުން ވަގުތަށް ފިޔަވަޅު ވެސް އަޅަން ޖެހޭ ކަމަށެވެ.
"ދުވާލަކު 1،800 އަށް ވުރެ ޕޮޒިޓިވް ކޭސް ފެންނަމުން ދާއިރު، ޓެސްޓު ނުކުރެވި އޭގެ ތިން ގުނަ، ހަތަރު ގުނަ މުޖުތަމައުގެ ތެރޭގައި އެބަ އުޅޭ،" އޭނާ ވިދާޅުވި އެވެ.
އޭނާ ވިދާޅުވީ ހޮސްޕިޓަލްތައް ވަނީ ގާތްގަނޑަކަށް ފުރިފައި ކަމަށާއި ނަތީޖާއެއްގެ ގޮތުން ބައެއް ބަލި މީހުންނަށް ހޮސްޕިޓަލުގައި ފަރުވާ ދޭނެ ޖާގަ ނެތި، ގޭގައި މަޑު ކުރަން ޖެހޭނެ ކަމަށެވެ.
ގުނަރަތްނެ ސަރުކާރަށް ގޮވާލެއްވީ އެ ހާލަތަށް ދިޔުމުގެ ކުރިން ގޭގައި ފަރުވާ ދޭނެ ގޮތްތަކާ މެދު އާއްމުން ހޭލުންތެރި ކުރުވުމަށެވެ.
އިއްޔެ ޕޮޒިޓިވްވި 1860 މީހުންނާއެކު ލަންކާގެ ޖުމްލަ ކޭސްތައް ވަނީ 115،536 އަށް އަރާފަ އެވެ. އަދި ޖުމްލަ 709 މީހުން ވަނީ މަރުވެފަ އެވެ.
ޑަބްލިއުއެޗްއޯގެ އިންޒާރު
ލަންކާގެ ހާލަތު ގޯސްވަމުން ދިޔުމާއެކު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ އެ ގައުމުގެ ރައްޔިތުން ސީރިއަސްވުމަށް އިންޒާރު ދީފަ އެވެ.
ޑަބްލިއުއެޗްއޯއިން ލަންކާއަށް ކަނޑައަޅާފައި ހުންނަވާ އޮފިސާ އިން ޗާޖް ޑރ. އޮލިވިއާ ނިވެރާސް ވިދާޅުވީ އެންމެ އުނދަގޫ ދަނޑިވަޅު މި ކުރިމަތީ ކަމަށެވެ.
ޑަބްލިއުއެޗްއޯ އާއި އދ. އިން ލަންކާއަށް އެހީވަމުންދާ ކަމަށާއި ސިއްހީ އޮފިޝަލުންގެ ބުރަ މަސައްކަތަށް އެއްބާރުލުން ދިނުމުގެ ގޮތުން އާއްމު ފަރުދުން ޒިންމާ ނަގަން ޖެހޭ ކަމަށް އޭނާ ވިދާޅުވި އެވެ.
"[ބަލި ފެތުރުން] ކޮންޓްރޯލް ކުރަން އަޅުގަނޑުމެންނަށް ލިބިފައި ވަނީ ހެކީގެ މައްޗަށް ބިނާކޮށްފައިވާ ފިޔަވަޅުތަކެއް،" ނިވެރާސް ވިދާޅުވި އެވެ.
އެގޮތުން އޭނާ ލަންކާ ރައްޔިތުންނަށް ގޮވާލެއްވީ ބޭރަށް ނުނިކުތުމަށާއި މާސްކު އެޅުމަށާއި، ގައިދުރުކަން ބެހެއްޓުމާއި، އަތް ދޮވުން ފަދަ ކަންކަމަށް ސަމާލުކަން ދިނުމަށެވެ.
