ކޮވިޑާ ދެކޮޅަށް ވެކްސިން ނުޖަހާ ތިބި ކުވެއިތުގެ ރައްޔިތުންނަށް މޭ 22 އިން ފެށިގެން ގައުމުން ބޭރަށް ދަތުރު ކުރުން މަނާކޮށްފި އެވެ.
އެ ގައުމުގެ ކެބިނެޓުގެ މި ނިންމުމުގައި ވެކްސިނަށް ޝަރުތު ހަމަނުވާ މީހުން ނުހިމެނޭނެ އެވެ. ކުވެއިތުން މީގެ ކުރިން ވަނީ އެހެން ގައުމުތަކުގެ މީހުން އެ ގައުމަށް އެތެރެވުން ވެސް މަނާކޮށްފަ އެވެ.
ކުވެއިތުގެ ރައްޔިތުން ވެސް ގައުމަށް އެތެރެވުމަށް ފަހު ކަރަންޓީނުގައި އެއް ހަފުތާ ހޮޓަލެއްގައި އަދި ދެ ވަނަ ހަފުތާ ގޭގައި ހޭދަކުރުން މަޖުބޫރެވެ.
މި އަހަރު ފެށުނީއްސުރެ ކުވެއިތުގައި ކޭސްތައް ދަނީ އިތުރުވަމުންނެވެ. އެގޮތުން ދުވާލަކު 1500 އެއްހާ ކޭސް މިހާރު ފެނެ އެވެ. އެ ގައުމުގައި މިހާތަނަށް ޖުމްލަ 276،500 މީހުން ޕޮޒިޓިވްވެފައި ވެއެވެ.
