ކޮވިޑުން ރައްކާތެރިވުމަށް ވެކްސިން ޖެހުމަށް މިހާރުން ފެށިގެން ކިޔު ހަދަން ފަށައިފި އެވެ.
ސޯޝަލް ސެންޓަރު ކައިރީގައި މި ވަގުތު ވެސް ގިނަ އަދަދެއްގެ ބިދޭސީން ވެކްސިން ކިޔު ހަދާފައިިމިވަނީ ވެކްސިން ކިޔުތައް އިންތިހާއަށް ދިގުވެ، ތޮއްޖެހުމުގެ ކަންބޮޑުވުން އޮތް ދަނޑިވަޅެއްގަ އެވެ.
ވެކްސިން ޖަހަން ފަށަނީ ކޮންމެ ރެއެއްގެ ވެސް 9:00 ގަ އެވެ. ނަމަވެސް، މިފަހުން ހަވީރު 5:00 ހާއިރު ކިޔުއަށް މީހުން އަރާއިރު، ރޯދަ ވެސް ވީއްލަނީ ކިޔުގައި ތިބެގެންނެވެ.
މިއަދު، 11:30 ވީއިރު މީހުން ކިޔުގައި ޖެހެން ފެށިއިރު، މިއީ މިހާ އަވަހަށް ވެކްސިން ކިޔު ހަދަން ފެށި ދުވަހެވެ.
ރޭ އަދި އޭގެ ކުރީ ރޭ ވެސް ވަނީ ވެކްސިން ކިޔުގައި މީހުން ތިއްބައި، ވެކްސިން ދިނުން ހުއްޓާލާފަ އެވެ. އޭގެ ސަބަބުން، އެ ސަރަހައްދުގައި ހިތްހަމަނުޖެހުންތައް އޮތެވެ. ވެކްސިންގައި ގިނަ ބަޔަކު އެތައް އިރަކު ތިބެން ޖެހުމުގެ ސަބަބުން ގައިދުރުކަން ގެއްލި، ރައްކާތެރިކަމުގެ ފިޔަވަޅުތަކަށް ވެސް ސަމާލު ކަމެއް ނުދެވެ އެވެ.
ވެކްސިން ކިޔުތައް ދިގުވުމުގެ ސަބަބުން، މިހާރު ދެވަނަ ޑޯޒް ދެމުން ދަނީ ހަމައެކަނި މިދިޔަ މަހުގެ ތެރޭގައި ފުރަތަމަ ޑޯޒް ދިން މީހުންނަށް އެކަންޏެވެ.
ވެކްސިން ކިޔުއަށް މިއަދު މީހުން އަރާ: މިއީ މިހާ އަވަހަށް ކިޔު ހަދަން ފެށި ދުވަސް - ފޮޓޯ: ހުސެއިން ވަހީދު | އަދަދު
މީގެކުރިން އޮންލައިންކޮށް ކިޔު ނަންބަރު ދޫކުރި ނަމަވެސް، އެކަން ވެސް ވަނީ ހުއްޓާލާފަ އެވެ. އޭގެ ސަބަބެއް ކަމަށް ބުނީ އޮންލައިންކޮށް ކިޔު ނަންބަރު ނަގާ މީހުން މަދު ކަމެވެ.
ކިޔު ދިގުވެ، އިންތިޒާމްތައް ބޮންސުންލާފައި އޮތުމުން ގިނަ ފާޑުކިޔުންތަކެއް އެޗްޕީއޭއަށް އަމާޒުވެފައިވާއިރު އެންމެންނަށް ދެވޭ މިންވަރަށް ވެކްސިން ނުލިބިދާނެ ކަމުގެ ކަންބޮޑުވުން ވެސް އެބަ އޮތެވެ. ގިނަ ބަޔަކު ފުރަތަމަ ޑޯޒްގެ ގޮތުގައި ކޮވިޝީލްޑް ވެކްސިން ޖަހާފައިވާއިރު، އޭގެ ސްޓޮކް މަދުކަން ރޭ ވަނީ ހާމަކޮށްފަ އެވެ.
ނަމަވެސް، ވެކްސިން ޖަހަން ޖެހޭ އެންމެންނަށް މަދު ނުވާނެ ވަރަށް ވެކްސިން ލިބޭނެ ކަމުގެ ޔަގީންކަން ސަރުކާރުންދެ އެވެ.
މާލެ އާއި ރަށްރަށުން ކޮވިޑްގެ ކޭސްތައް ފެންނަ މިންވަރު، މީގެކުރިން މަތިނުވާ މިންވަރަށް މައްޗަށް ގޮސްފައިވާއިރު ބައެއް ފިޔަވަޅުތައް ވެސް ވަނީ ވަރުގަދަކޮށްފަ އެވެ. އެގޮތުން، ވެހިކަލް ކާފިއު ގަޑިއެއް އިއުލާންކޮށް ސްކޫލްތަކާއި ސަރުކާރު އޮފީސްތައް ވަނީ ބަންދުކޮށްފަ އެވެ. މިސްކިތްތަކުގައި ގައިދުރުކޮށް ނަމާދު ކުރަން އަންގާފައިވާއިރު ވެކްސިންގެ ދެ ޑޯޒަށްފަހު ދޭން ނިންމި ދަތުރުކުރުމުގެ ލުއި ވެސް ވަނީ މެދުކަނޑާލާފަ އެވެ.
