ދުނިޔޭގެ އެންމެ ބޮޑެތި މުއްސަނދިންގެ ތެރޭގައި ހިމެނޭ މައިކްރޯސޮފްޓުގެ ބާނީ ބިލް ގޭޓްސް އާއި މެލިންޑާ ގޭޓްސްގެ 27 އަހަރުވީ ކައިވެނި ނިމުމަކަށް ގެންނަން ނިންމައިފި އެވެ.
"ވަރަށް ގިނަ ވިސްނުންތަކާއި ދެ މީހުންގެ ގުޅުން ރަނގަޅު ކުރަން ގިނަ މަސައްކަތްތައް ކުރުމަށް ފަހު، މި ނިންމީ ކައިވެނި ނިމުމަކަށް ގެންނަން،" އެ ދެ މީހުން ޓްވީޓު ކުރި އެވެ.
އެ މީހުން ބުނީ "ޖޯޑެއްގެ ގޮތުގައި އެކުގައި ކުރިއަށް ނުދެވޭނެކަން" އެނގިފައިވާ ކަމަށެވެ.
އުމުރުން 65 އަހަރުގެ ބިލް އާއި 56 އަހަރުގެ މެލިންޑާ އެންމެ ފުރަތަމަ ދިމާވީ 1987 ގައި ބިލްގެ މައިކްރޯސޮފްޓް ކުންފުނީގެ ވަޒީފާއަކަށް މެލިންޑާ ގުޅުނު ހިސާބުންނެވެ.
މެލިންޑާ މައިކްރޯސޮފްޓާ ގުޅުނީ ޕްރޮޑަކްޓް މެނޭޖަރުގެ ގޮތުގަ އެވެ. އެ މީހުން ކައިވެނި ކުރީ 1994 ގައި ހަވާއީގެ ރަށެއްގަ އެވެ.
އެ ދެ މީހުންގެ ތިން ދަރިން ތިބެ އެވެ. އަދި އެކި ގޮތް ގޮތުން ބޮޑެތި އެހީތައް ފޯރުކޮށްދޭ ބިލް އެންޑް މެލިންޑާ ގޭޓްސް ފައުންޑޭޝަން ހިންގަނީ އެކުގަ އެވެ.
އެ ޖަމިއްޔާއިން ވަނީ ނުރައްކާތެރި ބަލިތައް ފެތުރުން ހުއްޓުވުމާއި ކުޑަކުދިންނަށް ވެކްސިން ދިނުން ފަދަ ކަންކަމަށް އެތައް ބިލިއަން ޑޮލަރެއް ހޭދަކޮށްފަ އެވެ.
ބިލިއަނަރުންގެ މުއްސަނދިކަމުގެ ބޮޑު ބައި ހެޔޮ ކަމަކަށް ހޭދަ ކުރަން ބާރު އަޅާ "ގިވިންގް ޕްލެޖް" ގެ ފަހަތުގައި ވަނީ އިންވެސްޓަރު ވޮރެން ބަފެޓްސް އާއެކު ބިލް ގޭޓްސް އެވެ.
ފޯބްސް މަޖައްލާއިން ބުނާ ގޮތުގައި ބިލް ގޭޓްސް އަކީ މިހާރު ދުނިޔޭގެ ހަތަރު ވަނައަށް އެންމެ މުއްސަނދި މީހާ އެވެ. އޭނާގެ މުއްސަނދިކަމުގެ އަގު 124 ބިލިއަން އެމެރިކާ ޑޮލަރަށް އަރަ އެވެ.
އޭނާ ބިލިއަނަރަކަށް ވެފައި ވަނީ 1970 ގެ އަހަރުތަކުގައި އޭނާ އުފެއްދި ސޮފްޓްވެއާ ކުންފުނި މައިކްރޯސޮފްޓުންނެވެ. އެއީ ދުނިޔޭގެ އެންމެ ބޮޑު ސޮފްޓްވެއާ ކުންފުންޏެވެ.
އެ މީހުން ބުނީ ވަރިވި ނަމަވެސް ފައުންޑޭޝަނުގެ މަސައްކަތް އެކުގައި ކުރާނެ ކަމަށެވެ. ބިލް މިދިޔަ އަހަރު ވަނީ މައިކްރޯސޮފްޓުގެ ބޯޑުން ދުރަށް ޖެހިފަ އެވެ. އެއީ އެހީވުމުގެ މަސައްކަތަށް ވަގުތު ހުސްކުރުމަށެވެ.
