މޫސުމަށް އަންނަ ބަދަލުގެ ސަބަބުން ދުނިޔެ ހޫނުވެ، މި ގަރުނު ނިމުމުގެ ކުރިން އެންޓާޓިކާގެ ގަނޑުފެންތައް ވިރި، ކަނޑުގެ ލޮނުގަނޑުގެ 20 ޕަސެންޓަށް އުފުލިދާނެ ކަމަށް ދިރާސާއަކުން ދައްކައިފި އެވެ.
އެންޓާޓިކާގެ ގަނޑުފެންތައް ހުއްޓުމެއް ނެތި ވިރެމުން ދާތީ އޭގެ އަސަރު ރާއްޖެ ފަދަ ކުދި ޖަޒީރާ ގައުމުތަކަށް ވަރަށް ބޮޑަށް ކުރާނެ ކަމަށް އެކި ފަހަރު މަތިން ސައިންސްވެރިން ވަނީ އިންޒާރު ދީފަ އެވެ.
"ސައިންސް އެޑްވާންސަސް" ޖާނަލްގައި ޝާއިއުކޮށްފައިވާ ދިރާސާގައި އެމެރިކާގެ ހާވާޑް ޔުނިވާސިޓީގެ ތަޖުރިބާކާރުން ގަނޑުފެން ވިރޭ މިންވަރު ދެނެގަތުމަށް ބޭނުން ކުރީ މުޅިން އާ "ކަލްކިއުލޭޝަނެކެވެ".
އެންޓާޓިކާގެ ގަނޑުފެންތަކަށް އަންނަމުންދާ ބަދަލަކީ "ވޯޓާ އެކްސްޕަލްޝަން މެކޭނިޒަމް" ގެ ގޮތުގައި އެ ދިރާސާގައި ސިފަކޮށްފައި ވެއެވެ. ނުވަތަ އެއީ ގަނޑުފެންފަނޑުން ފެން ބޭރު ކުރާ ނިޒާމެވެ.
އެކަން މެދުވެރިވަނީ ގަނޑުފެންގަނޑުގެ އެންމެ އަޑީގައިވާ ފަށަލަ މައްޗަށް އުފުލެން ފެށުމުން، މުޅި އެތީގެ ބަރުދަން ލުއިވެ، ކަނޑުގެ މައްޗަށް އެރުމުންނެވެ.
ސައިންޓިސްޓުން ހޯދި ހޯދުމުން އެނގުނީ މި ނިޒާމުގެ ސަބަބުން މި ގަރުނު ނިމުމުގެ ކުރިން ކަނޑުގެ ލޮނުގަނޑު 20 ޕަސެންޓަށް އުފުލުމުގެ ފުރުސަތު އޮތް ކަމެވެ.
