ސްރީލަންކާގެ ކޮވިޑު ފެތުރުން އިތުރުވެފައި ވާތީ އަޅާ ފިޔަވަޅެއްގެ ގޮތުން ކުރިއަށް އޮތް ދެ ހަފްތާއަށް އެއް ފްލައިޓެއްގައި އެތެރެވެވޭނީ ގިނަވެގެން 75 މީހުންނަށް ކަމަށް ކަނޑައަޅައިފި އެވެ.
"އެއް ފްލައިޓެއްގައި އެތެރެ ވެވޭނީ ގިނަވެގެން 75 ޕަސެންޖަރުންނަށް ކަމަށް ވަނީ ކަނޑައަޅާފައި،" ސިވިލް އޭވިއޭޝަން އޮތޯރިޓީއާ ހަވާލަދީ ކޮލޮމްބީ ޕޭޖުން ރިޕޯޓުކުރި އެވެ.
އެ ނިންމުމަށް އަމަލު ކުރާނީ މިއަދުން ފެށިގެން ކުރިއަށް އޮތް 14 ދުވަސް ވަންދެނެވެ. ސިވިލް އޭވިއޭޝަން އޮތޯރިޓީން ބުނީ ހުރިހާ އެއާލައިނަކަށް އެކަން އަންގާފައިވާ ކަމަށެވެ.
ދެ ހަފުތާ ފާއިތުވުމުން ހާލަތު އޮތް ގޮތަށް ރިއާޔަތްކޮށް އެ ނިންމުން މުރާޖައާ ކުރާނެ އެވެ. ސިވިލް އޭވިއޭޝަނުން ބުނީ ހާލަތު ގޯސް ނަމަ ފިޔަވަޅު ހަރުކަށި ކުރަން ޖެހޭނެ ކަމަށެވެ.
ލަންކާގައި ވެސް ކޮވިޑުގެ ކޭސްތައް ދަނީ ހިފެހެއްޓުމެއް ނެތި އިތުރުވަމުންނެވެ. އެގޮތުން ފާއިތުތި ހަފްތާގައި ކޮންމެ ދުވަހަކު ވެސް ރިކޯޑް ޕޮޒިޓިވް ކޭސްތައް އައެދެ. އިއްޔެ 1،800 އަށް ވުރެ ގިނަ ކޭސް ފެނުނެވެ.
އާ ވޭރިއެންޓެއްގެ ބިރު
ހަލުވިކަމާއެކު ފެތުރޭ ކޮވިޑުގެ އާ ވޭރިއެންޓެއް ސްރީލަންކާގައި ފެތުރެމުންދާ ކަމަށް އެ ގައުމުގެ ސިއްހީ އިދާރާތަކުން މިދިޔަ ހަފްތާގައި ބުންޏެވެ.
ސްރީ ޖަޔަވަރްދެނަޕޫރާ ޔުނިވާސިޓީގެ ޑިޕާޓްމަންޓް އޮފް އިމިއުނޮލޮޖީ އެންޑް މޮލެކިއުލާ ސައިންސަސްގެ ވެރިޔާ ނީލިކާ މަލަވިގޭ ވިދާޅުވީ މި ވޭރިއެންޓު ވައިގެ ތެރޭގައި ގަޑިއެއް ހާއިރު އުޅޭ ކަމަށެވެ.
"ކޮރޯނާވައިރަހުގެ މީ ވޭރިއެންޓަކީ މީގެ ކުރިން ލަންކާއިން ފެނުނު ވޭރިއެންޓުތަކަށް ވުރެ ހަލުވިކަމާއެކު ފެތުރޭ ވޭރިއެންޓެއް،" އޭނާ ވިދާޅުވި އެވެ.
މިދިޔަ ހަފްތާގައި ލަންކާގައި ސިންހަޅަ އާ އަހަރު ފާހަގަކުރުމާ ގުޅިގެން ބާރު ދުވެއްޔެއްގައި ބަލި ފެތުރޭ ކަމަށް ލަންކާ ސަރުކާރުން ގަބޫލުކުރެ އެވެ. އަދި މިހާރު ގިނަ ޒުވާނުންނަށް އަސަރު ކުރާ ކަމަށް ވެސް ފާހަގަކޮށްފައި ވެއެވެ.
ޕަބްލިކް ހެލްތު އިންސްޕެކްޓާޒް އިދާރާގެ ފަރާތުން އުޕުލް ރޮހާނާ ވިދާޅުވީ މި ވޭރިއެންޓުގެ ސަބަބުން ތިން ވަނަ ރާޅަކާ ކުރިމަތިލާން ޖެހިދާނެ ކަމަށާއި، ވައިރަސް ފެތުރިފައި އޮތް ހަގީގީ މިންވަރު ޔަގީންވާނީ ދެ ތިން ހަފްތާ ފަހުން ކަމަށެވެ.
