ސްރީ ލަންކާގަައި ކޮވިޑު ކޭސްތައް ފެންނަ މިންވަރު ފާއިތުވި ފަސް ދުވަހު ވެސް ރިކޯޑް މިންވަރަށް އިތުރުވާން ފަށައިފި އެވެ.
އެގޮތުން އޭޕްރިލް 27 އިން ފެށިގެން ކޭސްތައް އުޅެނީ 1000 އިން މަތީގަ އެވެ. އޭޕްރިލް 18 ގެ ކުރިން ދުވާލަކު އެވްރެޖުކޮށް 200 އެއްހާ ކޭސް ފެންނަމުން ދިޔަ ލަންކާގައި އިއްޔެ ވަނީ 1716 ކޭސް ފެނިފަ އެވެ. މިއީ އެއް ދުވަސް ތެރޭގައި އެންމެ ގިނަ ކޭސް ފެނުނު ދުވަހެވެ.
ނަމަވެސް އެ ގައުމުގެ ޕަބްލިކް ހެލްތު އިންސްޕެކްޓާޒް ޔޫނިއަނުން ބުނީ މިހާރު އާއްމު ކުރާ ތަފާސްހިސާބުން ހަގީގަތުގައި ބަލި ފެތުރިފައި އޮތް މިންވަރު ނޭނގޭ ކަމަށެވެ. އެއީ ޕީސީއާރް ޓެސްޓުތަކުގެ ނަތީޖާ ލިބުން ލަސްވާތީ ކަމަށް އެ ޔޫނިއަނުން ބުންޏެވެ.
ޔޫނިއަން ރައީސް އުޕުލް ރޮހާނާ ވިދާޅުވީ މިހާރު އާއްމު ކުރަނީ ހަތަރު ދުވަސް ކުރިން ނަގާފައިވާ ސާމްޕަލުގެ ނަތީޖާ ކަމަށެވެ. ބަލި ފެތުރޭ ހަގީގީ މިންވަރު ހޯދޭނީ ޕީސީއާރް ޓެސްޓުގެ ނަތީޖާ އަވަސްކޮށްގެން ކަމަށް އޭނާ ވިދާޅުވި އެވެ.
ލަންކާގައި ކޭސްތައް އިތުރުވަމުން ދާނީ ސަރުކާރުން ވަނީ ފިޔަވަޅުތައް ހަރުކަށިކޮށްފަ އެވެ. އެގޮތުން އެއްވެ އުޅުމާއި ހަފްލާތައް ވަނީ މަނާކޮށްފަ އެވެ.
ކޭސްތައް އިތުރުވާއިރު ލަންކާ ސަރުކާރުގެ އެންމެ ބޮޑު ކަންބޮޑުވުމަކީ އެކަށީގެންވާ ސިއްހީ މަސައްކަތްތެރިންނާއި ވަސީލަތްތައް ނެތިދާނެ ކަމުގެ ބިރު އޮތުމެވެ.
ލަންކާގައި މިހާތަނަށް 110،000 އަށް ވުރެ ގިނަ މީހުންނަށް ކޮވިޑް ޖެހިފައި ވާއިރު 687 މީހުން ވަނީ މަރުވެފަ އެވެ.
އާ ވޭރިއެންޓެއްގެ ބިރު
ހަލުވިކަމާއެކު ފެތުރޭ ކޮވިޑުގެ އާ ވޭރިއެންޓެއް ސްރީލަންކާގައި ފެތުރެމުންދާ ކަމަށް އެ ގައުމުގެ ސިއްހީ އިދާރާތަކުން މިދިޔަ ހަފްތާގައި ބުންޏެވެ.
ސްރީ ޖަޔަވަރްދެނަޕޫރާ ޔުނިވާސިޓީގެ ޑިޕާޓްމަންޓް އޮފް އިމިއުނޮލޮޖީ އެންޑް މޮލެކިއުލާ ސައިންސަސްގެ ވެރިޔާ ނީލިކާ މަލަވިގޭ ވިދާޅުވީ މި ވޭރިއެންޓު ވައިގެ ތެރޭގައި ގަޑިއެއް ހާއިރު އުޅޭ ކަމަށެވެ.
"ކޮރޯނާވައިރަހުގެ މީ ވޭރިއެންޓަކީ މީގެ ކުރިން ލަންކާއިން ފެނުނު ވޭރިއެންޓުތަކަށް ވުރެ ހަލުވިކަމާއެކު ފެތުރޭ ވޭރިއެންޓެއް،" އޭނާ ވިދާޅުވި އެވެ.
މިދިޔަ ހަފްތާގައި ލަންކާގައި ސިންހަޅަ އާ އަހަރު ފާހަގަކުރުމާ ގުޅިގެން ބާރު ދުވެއްޔެއްގައި ބަލި ފެތުރޭ ކަމަށް ލަންކާ ސަރުކާރުން ގަބޫލުކުރެ އެވެ. އަދި މިހާރު ގިނަ ޒުވާނުންނަށް އަސަރު ކުރާ ކަމަށް ވެސް ފާހަގަކޮށްފައި ވެއެވެ.
ޕަބްލިކް ހެލްތު އިންސްޕެކްޓާޒް އިދާރާގެ ފަރާތުން އުޕުލް ރޮހާނާ ވިދާޅުވީ މި ވޭރިއެންޓުގެ ސަބަބުން ތިން ވަނަ ރާޅަކާ ކުރިމަތިލާން ޖެހިދާނެ ކަމަށާއި، ވައިރަސް ފެތުރިފައި އޮތް ހަގީގީ މިންވަރު ޔަގީންވާނީ ދެ ތިން ހަފްތާ ފަހުން ކަމަށެވެ.
