މަތީ ތައުލީމު ހާސިލުކުރަމުންދާ މަރުކަޒުތަކުން ފުރިހަމަ ކުރަން ދޭ މަސައްކަތެއް ދަރިވަރަކު އަމިއްލައަށް ނަހަދައި، އަގުދީގެން ނުވަތަ އެހެން ފަރާތެއް މެދުވެރިކޮށް ކުރުމަކީ ކުށެއް ކަމަށް ކަނޑައަޅައި، މަތީ ތައުލީމުގެ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ސަރުކާރުގެ ފަރާތުން ވެލިދޫ ދާއިރާގެ އެމްޑީޕީ މެމްބަރު މުހައްމަދު އަބްދުﷲ ޝަފީގު ހުށަހެޅުއްވި ބިލުގައި މަތީ ތައުލީމު ދޭ މަރުކަޒުތައް މޮނީޓާކޮށް އެ ތަންތަނުގެ ފެންވަރު ހިފެހެއްޓުމަށާއި ދިރާސާ ކުރުމާއި އަދި އެކި ޓްރެއިނިންތައްތައް ކުރިއަށްދާނެ ގޮތްތައް ބަޔާންކޮށްފައިވެ އެވެ.
އެ ބިލު ގައުމީ ތަރައްގީ އާއި ތަރިކައިގެ ކޮމިޓީން ދިރާސާ ކުރިއިރު ކަމާގުޅޭ ގިނަ ފަރާތްތަކެއްގެ ހިޔާލާއި މަޝްވަރާ ހޯދުމަށްފަހު ވަނީ އެ ބިލަށް ބައެއް ބަދަލުތައް ގެނެސްފަ އެވެ.
އޭގެ ތެރޭގައި ގެނެވުނު އެންމެ ބޮޑު ބަދަލަކީ ދަރިވަރު ކުރަންޖެހޭ މަސައްކަތެއް އެހެން ފަރާތެއް ލައްވައި ކުރުވުން ނުވަތަ ކޮށްދޭން ހުށަހެޅުން އެއީ ކުށެއް ކަމެއް ހިމެނުމެވެ.
މިގޮތުން، އެ ކުށުގެ އަދަބެއްގެ ގޮތުން 5،000ރ. ގެ ޖޫރިމަނާއެއް ބިލުގައި ވަނީ ހިމަނައިފަ އެވެ.
އޭގެ އިތުރުން، އެހެން ދަރިވަރުންގެ އެސައިންމަންޓު ފަދަ މަސައްކަތްތައް ވިޔަފާރި އުސޫލުން އަގު ނަގައިގެން ކޮށްދިނުމަކީ ކުށަކަށް ހަދައި، އެކަމުގެ އަދަބެއްގެ ގޮތުން 10،000ރ. ގެ ޖޫރިމަނާއެއް ކުރަން ބިލުގައި ހިމަނަފައިވެ އެވެ.
އެފަދަ އަމަލުތަކަށް ފާރަވެރިވުމަށް ތައުލީމުދޭ މަރުކަޒުތަކުގައި ހަރުދަނާ ނިޒާމެއް ގާއިމުކުރަންޖެހޭ ކަމަށް އެ ބިލުގައި ބަޔާންކޮށްފައިވާއިރު، ޖޫރިމަނާގެ އިތުރުން ވެސް އެކަށީގެންވާ ފިޔަވަޅު އެޅުމަށް ހުރަހެއް ނެތް ކަމަށް ބުނެފައިވެ އެވެ.
އެ މާއްދާ ހިމެނި ސަބަބެއް ކަމަށް ކޮމިޓީން ބުނީ މަތީ ތައުލީމު ހޯދާ ދަރިވަރުން އަމިއްލައަށް ފުރިހަމަ ކުރަންޖެހޭ އެސައިންމެންޓް ފަދަ މަސައްކަތްތައް އެހެން ފަރާތްތައް މެދުވެރިކޮށް ކުރުވުން އާއްމު ވެފައިވާއިރު، އެކަމުގެ ސަބަބުން ދަރިވަރަށް ލިބެންޖެހޭ ހަގީގީ މަންފާ ގެއްލޭ ކަމަށެވެ.
މަތީ ތައުލީމުގެ ބިލު ކޮމިޓީން ގެނައި ބަދަލުތަކާއެކު މިއަދުގެ ޖަލްސާގައި ފާސްކޮށްފައިވަނީ، އެ ވޯޓުގައި ބައިވެރިވެވަޑައިގެންނެވި 49 މެމްބަރުންގެ އިއްތިފާގުންނެވެ.
