ސްރީލަންކާގައި މަގު މަތީގައި އުޅޭ އިރު މޫނު ފޮރުވައިގެން އުޅުނު މަނާ ކުރަން ހުށަހެޅި ހުށަހެޅުން ކެބިނެޓުން ފާސްކޮށްފި އެވެ.
ގައުމީ ސަލާމަތަށް ނުރައްކާވެދާނެ ކަމަށް ބުނެ އެ ހުށަހެޅުން ހުށަހެޅީ މުސްލިމް އަންހެނުންނަށް މޫނު ބުރުގާ ވެސް ނޭޅޭނެ ކަމަށް ބަޔާންކޮށްފަ އެވެ.
އެކަމަށް ހުއްދަ ދޭން ކެބިނެޓުން ފާސްކުރި އިރު، އދ. އިން ބުނެފައި ވަނީ މިއީ ބައިނަލްއަގްވާމީ ގާނޫނާ ހިލާފު ކަމެއް ކަމަށެވެ.
ކެބިނެޓުން ހުއްދަ ދިނުމާއެކު އެ ހުށަހެޅުން ދެން ފޮނުވާނީ ބަންޑާރަ ނައިބުގެ އޮފީހަށެވެ. އެއަށްފަހު ގާނޫނު ހަދާ މަޖިލީހަށް ފޮނުވައިގެން ގާނޫނެއްގެ ގޮތުގައި ފާސްކުރަން ޖެހޭނެ އެވެ.
ގާނޫނު ހަދާ މަޖިލީހުގެ މެޖޯރިޓީ ލިބިފައިވަނީ ސަރުކާރަށް ކަމަށް ވާތީ، މި ހުށަހެޅުން ވަރަށް ފަސޭހަކަމާއެކު ފާސްވެ ގާނޫނަކަށް ވާނެ ކަމަށް ބެލެވެ އެވެ.
ނަސާރާ ދީނުގެ މީހުން ފާހަގަކުރާ އީސްޓާ ސަންޑޭއާ ދިމާކޮށް 2019 ވަނަ އަހަރު ދިން ހަމަލާތަކުގައި 260 މީހުން މަރުވުމާ ގުޅިގެން ވެސް ވަގުތީ ގޮތުން މޫނު ބުރުގާ އެޅުން މަނާކުރި އެވެ.
އެ ހަމަލާތައްދީފައި ވަނީ އިސްލާމިކް ސްޓޭޓް (އައިއެސް) އަށް ބައިއަތު ހިފައިގެން މަސައްކަތް ކުރި ލަންކާގެ ދެ މުސްލިމް ގްރޫޕަކުންނެވެ.
މޫނު ބުރުގާ އެޅުން މަނާ ކުރުމަކީ މުސްލިމުންގެ ޝުއޫރުތަކަށް އަސަރު ކުރާނެ ކަމެއްގެ ގޮތުގައި ޕާކިސްތާނުން ލަންކާއަށް ކަނޑައަޅާފައި ހުންނަ ސަފީރު މިދިޔަ މަހު ސިފަކުރެއްވި އެވެ.
ދީނީ މިނިވަންކަމަށް ކަނޑައަޅާފައިވާ އދ. ގެ ހާއްސަ ރެޕަޓުއާ އަދި ރާއްޖޭގެ ކުރީގެ ފޮރިން މިނިސްޓަރު އަހްމަދު ޝަހީދު ވެސް ވަނީ އެކަމަށް ފާޑުވިދާޅުވެފަ އެވެ.
ޝަހީދު ވިދާޅުވީ މޫނު ބުރުގާ މަނާ ކުރުމަކީ ބައިނަލްއަގްވާމީ ގާނޫނާ ހިލާފު އަދި ދީނީ މިނިވަންކަމަށް ހުރަސްއެޅޭނެ ނިންމުމެއް ކަމަށެވެ.
ލަންކާގެ 22 މިލިއަން މީހުންގެ ނުވަ ޕަސެންޓަކީ މުސްލިމުންނެވެ. އެ ގައުމުގެ އާބާދީގެ 70 ޕަސެންޓަކީ ބުދިސްޓުންނެވެ. ތަމަޅައިންނާއި، ހިންދޫން ހިމެނޭ ގޮތަށް އެހެން ދީންތަކުގެ 15 ޕަސެންޓު މީހުން ވެސް އުޅެ އެވެ.
