ރާއްޖޭގައި ކޮވިޑް-19 ފެތުރެން ފެށިފަހުން 24 ގަޑިއިރުގެ ތެރޭގައި 386 ކޭސްއާ އެކު އެންމެ ގިނަ ބަޔަކު ޕޮޒިޓިވްވީ އިއްޔެ ކަން ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ހިސާބުތަކުން ދައްކައިފި އެވެ.
ކޮވިޑުގެ ދެ ވަނަ ރާޅާއެކު އެންމެ ހާލަތު ގޯސްވިއިރު ވެސް އެއް ދުވަހުން ޕޮޒިޓިވް އަދަދު މިހާ މައްޗެއް ނުވެ އެވެ.
އެޗްޕީއޭ އިން އެންމެ ފަހުން އާއްމުކުރި ހިސާބުތަކުން ދައްކާ ގޮތުގައި 386 މީހުން ޕޮޒިޓިވްވީ ޓެސްޓްކުރި 3،289 ސާމްޕަލްގެ ތެރެއިންނެވެ. މާލެއަށް ވުރެން ރަށްރަށުން ޕޮޒިޓިވްވާ މީހުންގެ އަދަދު މި ދުވަސްކޮޅު އިތުރެވެ. މާލެ އިން އިއްޔެ 105 މީހުން ޕޮޒިޓިވްވި އިރު ރަށްރަށުގެ އަދަދު އުޅެނީ 198 ގަ އެވެ.
ރާއްޖޭގައި މި ބަލި ޖެހިފައި ތިބި އަދަދު 4،000 ގައި އުޅޭއިރު 119 މީހަކަށް ފަރުވާދެނީ ހޮސްޕިޓަލްގަ އެވެ.
ރަށްރަށުގައި ކޮވިޑުގެ ހާލަތު ގޯސްވާން ފެށީ މިދިޔަ މަހުގެ ފަހުކޮޅުން ފެށިގެންނެވެ. އެންމެ ބޮޑަށް ބަލި ފެތުރިފައިވާ އަތޮޅުތަކުގެ ތެރޭގައި އއ، އދ، ބ، ޅ. އަދި ކ. އަތޮޅު ހިމެނެ އެވެ.
އަވަށްޓެރި އިންޑިއާގައި ކޮވިޑު ބާރު މިނުގައި ފެތުރެމުންދާއިރު ރާއްޖެއަށް ނުރައްކާ ބޮޑުވެދާނެތީވެ އެ ގައުމުން ރާއްޖެ އަންނަ ޓޫރިސްޓުންނަށް ރަށްރަށުގައި ޗުއްޓީ ހޭދަނުކުރެވޭ ގޮތަށް އެޗްޕީއޭ އިން ވަނީ ނިންމައިފަ އެވެ. އެކަމަކު ރިސޯޓްތަކަށް ދިއުމުގައި ހުރަހެއް ނެތެވެ.
ކޮވިޑު ކޭސްތައް ކުއްލިއަކަށް އަތޮޅުތަކުގައި މިހާ މަތިވި ސަބަބެއް އެޗްޕީއޭ އިން މިހާތަނަށް ހާމަކޮށްފައެއް ނުވެ އެވެ. މި ބަލިން އަރައިގަތުމަށް ރާއްޖޭގައި އަންނަނީ ވެކްސިންގެ ދެ ވަނަ ޑޯޒު ދެމުންނެވެ.
