ހަލުވިކަމާއެކު ފެތުރޭ ކޮވިޑުގެ އާ ވޭރިއެންޓެއް ސްރީލަންކާގައި ފެތުރެމުންދާ ކަމަށް އެ ގައުމުގެ ސިއްހީ އިދާރާތަކުން ބުނެފި އެވެ.
ސްރީ ޖަޔަވަރްދެނަޕޫރާ ޔުނިވާސިޓީގެ ޑިޕާޓްމަންޓް އޮފް އިމިއުނޮލޮޖީ އެންޑް މޮލެކިއުލާ ސައިންސަސްގެ ވެރިޔާ ނީލިކާ މަލަވިގޭ ވިދާޅުވީ މި ވޭރިއެންޓު ވައިގެ ތެރޭގައި ގަޑިއެއް ހާއިރު އުޅޭ ކަމަށެވެ.
"ކޮރޯނާވައިރަހުގެ މީ ވޭރިއެންޓަކީ މީގެ ކުރިން ލަންކާއިން ފެނުނު ވޭރިއެންޓުތަކަށް ވުރެ ހަލުވިކަމާއެކު ފެތުރޭ ވޭރިއެންޓެއް،" އޭނާ ވިދާޅުވި އެވެ.
މިދިޔަ ހަފްތާގައި ލަންކާގައި ސިންހަޅަ އާ އަހަރު ފާހަގަކުރުމާ ގުޅިގެން ބާރު ދުވެއްޔެއްގައި ބަލި ފެތުރޭ ކަމަށް ލަންކާ ސަރުކާރުން ގަބޫލުކުރެ އެވެ. އަދި މިހާރު ގިނަ ޒުވާނުންނަށް އަސަރު ކުރާ ކަމަށް ވެސް ފާހަގަކޮށްފައި ވެއެވެ.
ޕަބްލިކް ހެލްތު އިންސްޕެކްޓާޒް އިދާރާގެ ފަރާތުން އުޕުލް ރޮހާނާ ވިދާޅުވީ މި ވޭރިއެންޓުގެ ސަބަބުން ތިން ވަނަ ރާޅަކާ ކުރިމަތިލާން ޖެހިދާނެ ކަމަށާއި، ވައިރަސް ފެތުރިފައި އޮތް ހަގީގީ މިންވަރު ޔަގީންވާނީ ދެ ތިން ހަފްތާ ފަހުން ކަމަށެވެ.
ލަންކާގައި ކޭސްތައް އިތުރުވަމުން ދާނީ ސަރުކާރުން ވަނީ ފިޔަވަޅުތައް ހަރުކަށިކޮށްފަ އެވެ. އެގޮތުން އެއްވެ އުޅުމާއި ހަފްލާތައް ވަނީ މަނާކޮށްފަ އެވެ. މި މަހުގެ މެދު ތެރޭގައި ދުވާލަކު 150 މީހުން ޕޮޒިޓިވްވި ނަމަވެސް މިހާރު ދުވާލަކު 600 މީހުން ދަނީ ޕޮޒިޓިވްވަމުންނެވެ.
ކޭސްތައް އިތުރުވާއިރު ލަންކާ ސަރުކާރުގެ އެންމެ ބޮޑު ކަންބޮޑުވުމަކީ އެކަށީގެންވާ ސިއްހީ މަސައްކަތްތެރިންނާއި ވަސީލަތްތައް ނެތިދާނެ ކަމުގެ ބިރު އޮތުމެވެ.
ޖޯން ހޮޕްކިންސް ޔުނިވާސިޓީގެ ތަފާސްހިސާބަށް ބަލާއިރު އެ ގައުމުގައި މިހާތަނަށް 100،586 މީހުން ޕޮޒިޓިވްވެފައި ވާއިރު 642 މީހުން މަރުވެފައި ވެއެވެ.
