ސްރީލަންކާގައި ކުރިއަށް އޮތް ދެ ހަފްތާއަށް އެއްވެސް ހަފްލާއެއް ބޭއްވުން މަނާކޮށްފި އެވެ. އެގޮތަށް ނިންމާފައި ވަނީ ކޮވިޑުގެ ކޭސްތައް އިތުރުވާން ފަށާފައި ވާތީ އެވެ.
"ކުރިއަށް އޮތް ދެ ހަފްތާއަށް ރާވާފައިވާ ހުރިހާ ފެސްޓިވަލެއް ވަނީ މަޑުޖައްސާލާފައި. ސަރުކާރުން ނިންމާފައިވަނީ ޕްރައިވެޓް ސެކްޓާގެ ހަފްލާތަކާއި، ބައްދަލުވުންތަކާއި، ޕާޓީތައް ވެސް ކަރަންޓީނު އުސޫލުގެ ދަށުން މަނާކުރަން،" ރައީސް އޮފީހުގެ މީޑިއާއިން ނެރުނު ބަޔާނުގައި ވެއެވެ.
މި މަހުގެ ފަހުކޮޅު ހުޅުވަން އިއުލާނު ކުރި ޔުނިވާސިޓީތައް ވެސް ފަހުން ހުޅުވަން މިހާރު ވަނީ ނިންމާފަ އެވެ. ލަންކާގެ ސިއްހީ އިދާރާތަކުން ބުނަނީ އެ ގައުމުގައި ކޮވިޑުގެ އާ ވޭރިއެންޓެއް ފެތުރެމުންދާ ކަމަށާއި އެ ވޭރިއެންޓުގައި ޒުވާނުން ވެސް ހާލު ގޯސްވާ ކަމަށެވެ.
ޖޯން ހޮޕްކިންސް ޔުނިވާސިޓީގެ ތަފާސްހިސާބުން ދައްކާ ގޮތުގައި ލަންކާގައި މިހާތަނަށް 100،586 މީހުން ޕޮޒިޓިވްވެ، 642 މީހުން މަރުވެފައި ވެއެވެ.
ލަންކާ ސަރުކާރުން އާއްމުންނަށް ބާރު އަޅާފައިވަނީ ގޭގައި ތިބުމަށެވެ. އެ ގައުމުގެ ކޮވިޑް ހުއްޓުވާ ޓާސްކުފޯހުގެ ވެރިޔާ އަސްކަރީ ކޮމާންޑަރު ޝަވެންދްރަ ސިލްވާ ވިދާޅުވީ އިގްތިސާދު ކުރިއަށް ގެންދަން ޖެހޭތީ ލޮކްޑައުން ކުރަން ދަތި ކަމަށާއި ފަރުދީ ޒިންމާ އަދާ ކުރުން މުހިއްމު ކަމަށެވެ.
