ބިލްބާއޯ (އޭޕްރީލް 26) - ސްޕެނިޝް ލީގުގެ އެއް ވަނައިގައި އޮތް އެތުލެޓިކޯ މެޑްރިޑް މިރޭ ކުޅުނު މެޗުން 2-1 އިން އެތުލެޓިކް ބިލްބާއޯ އަތުން ބަލިވުމުން ލީގުގެ ތިން ވަަނައިގައި މި ވަގުތު އޮތް ބާސެލޯނާ އަށް ލީގުގެ ރޭހުގައި ކުރިއަށް އެރުމުގެ ފުރުސަތު ލިބިއްޖެ އެވެ.
އެތުލެޓިކޯ އެއް ވަނައިގައި އޮތީ 33 މެޗުން 73 ޕޮއިންޓާ އެކު އެވެ. ދެ ވަނައިގައި ރެއާލް މެޑްރިޑް އޮތީ 33 މެޗުން 71 ޕޮއިންޓް ހޯދައިގެންނެވެ. މިރޭ ވިޔަރެއާލް އަތުން 2-1 އިން މޮޅުވެ ތިން ވަނައިގައި އޮތް ބާސެލޯނާ އިން ވަނީ 32 މެޗުން 71 ޕޮއިންޓް ހަމަކޮށްފަ އެވެ. ރެއާލް މި ވަގުތު ބާސެލޯނާ އަށް ވުރެ ކުރީގައި އޮތީ ހެޑް ޓު ހެޑް ގަވައިދުންނެވެ. ގްރަނާޑާ އަތުން މިރޭ މޮޅުވި ސެވިއްޔާ ހަތަރު ވަނައިގައި އޮތީ 33 މެޗުން 70 ޕޮއިންޓް ހޯދައިގެންނެވެ.
މޮޅަކާ އެކު އަންނަ ހަފްތާގައި ބާސެލޯނާ އިން މެޗު ހަމަކުރާއިރު ލީގުގެ އެއް ވަނައިގައި އެއް ޕޮއިންޓަށް ލީޑުފުޅާކުރެވޭނެ އެވެ. ލީގުގެ ރޭހުގައި ދެން އެންމެ ބޮޑު މެޗަކަށް ވާނީ އަންނަ މަހު އެތުލެޓިކޯ އާއި ބާސެލޯނާގެ ކުރިމަތިލުމެވެ.
ވިޔަރެއާލާ ދެކޮޅަށް ކުޅުނު މެޗުގައި ބާސެލޯނާ އަށް ލީޑު ނަގައިދޭން ފްރެންކީ ޑި ޔޯން ޖެހި ބޯޅަ ވިޔަރެއާލް ކީޕަރު ސާޖިއޯ އަސެންހޯ ވަނީ މަތަކޮށްފަ އެވެ. އޭގެ ފަހުން ބާސެލޯނާގެ ކެޕްޓަން ލިއޮނަލް މެސީ ޖެހި ޝޮޓް ވެސް އަސެންހޯ ވަނީ ހުއްޓުވައިފަ އެވެ. ވިޔަރެއާލަށް ލިބުނު ފުރަތަމަ ފުރުސަތުގައި ސެމިއުލް ޗުކުވޭޒީ ވަނީ ބާސެލޯނާގެ ކީޕަރު ޓާ ސްޓެގެން ކައިރިން ނައްޓާފައި ގޯލެއް ޖަހައި ވިޔަރެއާލަށް ލީޑުނަގައިދީފަ އެވެ.
އެކަމަކު ވިޔަރެއާލަށް ލީޑު ހިފަހައްޓައިލެވުނީ ދެ މިނިޓެވެ. ބާސެލޯނާގެ އެންޓޮއިން ގްރީޒްމަން ޖެހި ހިތްގައިމު ގޯލުން އެ ޓީމުން ވަނީ ނަތީޖާ ހަމަހަމަކޮށްފަ އެވެ. އޭނާ މި ގޯލު ޖެހީ ކީޕަރު އަސެންހޯ ބޯމަތިން އޮއްސާލައިގެންނެވެ. މެޗުގެ 35 ވަނަ މިނިޓްގައި ވިޔަރެއާލްގެ ފަހަތަށް ކުޅޭ ހުއާން ފޮއިތު ހެދި ގޯހެއްގެ ފައިދާނަގައި ގްރީޒްމަން އިތުރު ގޯލެއް ޖަހަައި ބާސެލޯނާ އަށް ލީޑުނަގައިދިނެވެ.
ވިޔަރެއާލުން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ މެޗުގެ 65 ވަނަ މިނިޓްގައި ވިޔަރެއާލްގެ މަނޫ ޓްރިގޭރޯސް ބާސެލޯނާގެ މެސީ އަށް ކުރި ނުރައްކާތެރި ފައުލަކަށް ރަތް ކާޑެއް ދެއްކުމުންނެވެ.
އެތުލެޓިކޯ ކޮޅަށް އަލެކްސް ބެރެންހުއޭ ޖެހި ގޯލުން މެޗުގެ އަށް ވަނަ މިނިޓްގައި ބިލްބާއޯ އިން ލީޑުނެގި އެވެ. މެޗުގެ 77 ވަނަ މިނިޓްގައި ޔަނިކް ކަރާސްކޯ ދިން ބޯޅަ އަކުން އެތުލެޓިކޯ އަށް އެއްވަރުކޮށްދިނީ ސްޓެފަން ސަވިޗް އެވެ. މެޗު ނިމެން ފަސް މިނިޓަށް ވެފައި ވަނިކޮށް ބިލްބާއޯ މޮޅުކޮށްދިނީ އިނީގޯ މާޓިނޭޒް ޖެހި ގޯލުންނެވެ.
އަނިޔާ އަށް ފަހު އެތުލެޓިކޯގެ ލުއިސް ސުއަރޭޒާއި ޔާއޯ ފެލިކްސް މި މެޗުގައި ކުޅުނު ނަމަވެސް އެންމެ ރަނގަޅު ކުޅުމެއް ނުދެއްކި ދެ ވަަނަ ހާފްގައި ވަނީ ބަދަލުކޮށްފަ އެވެ.
