ފްރާންސްގެ ވެރިރަށް ޕެރިހުގެ ހުޅަނގު ދެކުނުގެ އަވަށެއްގައި ހުންނަ ޕޮލިސް ސްޓޭޝަނެއްގައި އަންހެން ފުލުހަކަށް ވަޅިން ހަމަލާދީ މަރާލައިފި އެވެ.
މިއީ ޓެރަރިސްޓް ހަމަލާއެއްގެ ގޮތުގައި ދެކިގެން ތަހުގީގު ވަނީ ފަށާފަ އެވެ. ހަމަލާ ދިން މީހާއަކީ މީގެ އަހަރުތަކެއް ކުރިން ޓިއުނީޝިއާއިން ފްރާންސަށް ދިޔަ މީހެއް ކަމަށް ރިޕޯޓުތައް ބުނެ އެވެ. ފުލުހުން ވަނީ އޭނާގެ ގަޔަށް ބަޑި ޖަހާ މަރާލާފަ އެވެ.
ހަމަލާ ދިން މީހާއާ ގުޅުން އޮތް ކަމަށް ބެލެވޭ ތިން މީހަކު މިހާތަނަށް ހައްޔަރުކޮށްފައި ވެއެވެ.
ރައީސް އިމޭނުއެލް މެކްރޯން ވަނީ މަރުވި އުމުރުން 49 އަހަރުގެ ފުލުސް މީހާގެ ހަނދާން އާ ކުރައްވާ، "އިސްލާމިސްޓް ޓެރަރިޒަމާ" ދެކޮޅު މަސައްކަތް ހުއްޓާ ނުލާނެ ކަމަށް ވިދާޅުވެފަ އެވެ.
މި ހަމަލާ ދިން ސަރަހައްދަކީ މީގެ ކުރިން ވެސް ޓެރަރިސްޓުން ހަރަކާތްތެރިވެފައިވާ ސަރަހައްދެކެވެ. އެގޮތުން 2016 ވަނަ އަހަރު ދެ ފުލުހަކު ގޭގައި ތިއްބާ ވަޅިން ހަމަލާދީ މަރާލާފައި ވެއެވެ.
އޭގެ ފަހުން އޮކްޓޯބަރު 2020 ގައި ޓެރަރިސްޓުން ވަނީ އެ ސަރަހައްދުގައި މަސައްކަތް ކުރާ ޓީޗަރަކަށް ހަމަލާދީ މަރާލާފަ އެވެ.
