މެޑްރިޑް (އޭޕްރީލް 22) - ސްޕެނިޝް ލީގުގައި މިރޭ 2-0 އިން ހުއެސްކާ ބަލިކޮށް އެތުލެޓިކޯ މެޑްރިޑް ލީގުގެ އެއް ވަނަ އަށް އަލުން ޖެހިލިއިރު، ލިއޮނަލް މެސީގެ ދެ ގޯލާ އެކު ބާސެލޯނާ އިން 5-2 އިން ގެޓަފޭ ބަލިކޮށް ލީގުގެ ތިން ވަނަ އަށް އަރައިފި އެވެ.
ރޭގެ މެޗުތަކަށް ފަހު އެތުލެޓިކޯ އަށް އެއް ވަނަ އަދި ބާސެލޯނާ އަށް ތިން ވަނަ އޮތީ ގެއްލިފަ އެވެ. މިރޭގެ ނަތީޖާތަކަށް ފަހު އެތުލެޓިކޯ އެއް ވަނައިގައި އޮތީ 32 މެޗުން 73 ޕޮއިންޓާ އެކު އެވެ. ދެ ވަަނައިގައި އޮތް ރެއާލަށް 32 މެޗުން 70 ޕޮއިންޓް ލިބިފައިވާއިރު، އެތުލެޓިކޯ އާއި ރެއާލަށް ވުރެ އެއް މެޗު މަދުން ކުޅެގެން ބާސެލޯނާ ތިން ވަނައިގައި އޮތީ 31 މެޗުން 68 ޕޮއިންޓް ހޯދައިގެންނެވެ.
އެތުލެޓިކޯ އިން މަސައްކަތްކުރަނީ 2014 ވަނަ އަހަރަށް ފަހު ލީގުގެ ތަށި އުފުލާށެވެ. ލީގުގެ ރޭހުގައި އެތުލެޓިކޯ އަށް އޮތް އެންމެ ހާއްސަ މެޗަކީ އަންނަ މަހު އަށް ވަނަ ދުވަހު ބާސެލޯނާއާ ކުޅޭ މެޗެވެ.
އެތުލެޓިކޯގެ ދަނޑުގައި ކުޅުނު މެޗުގެ ދެ ހާފްގައި އެ ޓީމުން ދެ ގޯލު ޖެހިއިރު، މި ދެ ގޯލަށް ވެސް ފުރުސަތު ތަނަވަސްކޮށްދިނީ މާކޯސް ލޮރެންޓޭ އެވެ. އެތުލެޓިކޯ އިން މެޗުގެ 39 ވަނަ މިނިޓްގައި ލީޑުނެގީ އެންހެލް ކޮރޭއާ ޖެހި ގޯލުންނެވެ. މެޗު ނިމެން 10 މިނިޓަށް ވެފައި ހުއްޓައި އެތުލެޓިކޯ އަށް ޕޮއިންޓްތައް ކަށަވަރުކޮށްދިން ގޯލު ޖެހީ ޔަނިކް ކަރާސްކޯ އެވެ.
ބާސެލޯނާ އިން މެޗުގެ އަށް ވަނަ މިނިޓްގައި މެސީ ވައްދާލި ގޯލުން ލީޑުނެގި ނަމަވެސް މެޗުގެ 12 ވަނަ މިނިޓްގައި އެ ޓީމުގެ ކްލެމެންޓް ލޯންގްލޭ އަތުން ބައިކޮޅަށް ވަން ގޯލަކުން ގެޓަފޭ އިން އެއްވަރުކުރި އެވެ. މެޗުގެ 28 ވަނަ މިނިޓްގައި ބާސެލޯނާ އިން އަލުން ލީޑުނެގީ ގެޓަފޭގެ ސޯފިއަން ޗަކްލާ އަތުން ބައިކޮޅަށް ވަން ގޯލަކުންނެވެ. އޭގެ ފަސް މިނިޓް ފަހުން މެސީ ވަނީ އިތުރު ގޯލެއް ޖަހައި ބާސެލޯނާ އަށް ދެ ގޯލުގެ ލީޑެއް ނަގައިދީފަ އެވެ.
މެޗުގެ 69 ވަނަ މިނިޓްގައި ގެޓަފޭ އިން ވަނީ އެނެސް އުނިއާލްގެ ޕެނަލްޓީން އުއްމީދެއް ހޯދައިފަ އެވެ. އެކަމަކު މެޗުގެ ފަހު ކޮޅުގައި މެސީ ތަނަވަސްކޮށްދިން ބޯޅައަކުން ރޮނާލްޑް އަރައުހޯ ގޯލެއް ޖެހިއިރު، އިތުރު ވަގުތުގައި އެންޓޮއިން ގްރީޒްމަން ވަނީ ޕެނަލްޓީ އަކުން ބާސެލޯނާގެ ފަސް ވަނަ ގޯލު ޖަހައިފަ އެވެ. ގްރީޒްމަން އެ ޕެނަލްޓީ ޖަހަން ދިނީ މެސީ އެވެ. މެސީ އަށް އެ ޕެނަލްޓީ ކާމިޔާބުކޮށް ހެޓްރިކެއް ހެދުމުގެ ފުރުސަތު އޮތެވެ.
