ނަސާރާއިން ފާހަގަކުރާ އީސްޓާ ސަންޑޭއާ ދިމާކޮށް މީގެ ދެ އަހަރު ކުރިން ސްރީ ލަންކާގައި ދިން 279 މީހުން މަރުވި ބޮމުގެ ހަމަލާތަކުގެ ތަހުގީގު ސަރުކާރުން ލަސްކުރާ ކަމަށް އެ ގައުމުގެ ރޯމަން ކެތޮލިކް ފައްޅީގެ ވެރިޔާ ތުހުމަތު ކުރައްވައިފި އެވެ.
ހޮޓަލްތަކާއި ފައްޅިތަކަށް ދިން ބޮމުގެ ހަމަލާތަކާ ގުޅިގެން މަދު ދުވަސްކޮޅެއްގެ ތެރޭގައި ޝައްކު ކުރެވޭ 200 އެއްހާ މީހުން ހައްޔަރު ކުރި އެވެ. އެކަމަކު މިހާތަނަށް ވެސް އެއްވެސް މީހަކާ ދެކޮޅަށް ދައުވާއެއް ކޮށްފައެއް ނުވެ އެވެ.
ބޮމުގެ ހަމަލާތަކަށް ދެ އަހަރު ފުރުމާ ދިމާކޮށް ކޮލޮމްބޯ ކާޑިނަލްގެ އާޗްބިޝިޕް މެލްކަމް ރަންޖީތު ވިދާޅުވީ ތަހުގީގު ލަސްވާތީ ދެރަވާ ކަމަށެވެ. އަދި ސަރުކާރުން ތަހުގީގަށް އަޅާލުމެއް ނުދޭ ކަމަށާއި ރަނގަޅަށް ތަހުގީގު ނުވެސް ކުރާ ކަމަށް ތުހުމަތު ކުރެއްވި އެވެ.
ތަހުގީގު ކުރިއަށް ނުދަނީ ސިޔާސީ ނުފޫޒުގެ ސަބަބުން ކަމަށް އޭނާ ވިދާޅުވި އެވެ. މީގެ ކުރިން ވެސް ރަންޖީތު ވަނީ މި މައްސަލާގައި ސަރުކާރަށް ފާޑުވިދާޅުވެފަ އެވެ. އެގޮތުން ހަމަލާގެ އިންޒާރު ލިބުމުން ވެސް ފިޔަވަޅު އަޅުއްވާފައި ނުވާތީ ކުރީގެ ރައީސް މައިތްރިޕާލާ ސިރިސޭނާއަށް ދައުވާ ކުރުމަށް ގޮވާލެއްވި އެވެ.
ހަމަލާތަކަށް ފަހު ސިރިސޭނާ އަމުރު ކުރައްވައިގެން ފެށި ތަހުގީގަކުން އެނގިފައިވާ ގޮތުގައި ހަމަލާ ދިނުމުގެ 17 ދުވަސް ކުރިން އިންޑިއާ ސަރުކާރުން ވަނީ ލަންކާ ސަރުކާރަށް ހަމަލާއާ ގުޅޭ ސިއްރު ޖާސޫސީ މައުލޫމާތު ހިއްސާކޮށްފަ އެވެ.
ނަމަވެސް ލަންކާ ސަރުކާރު އެ މައުލޫމާތުގެ މައްޗަށް ބިނާކޮށް އެއްވެސް ކަމެއް ނުކުރެ އެވެ. ދެހާސް ނަވާރަ ވަނަ އަހަރު އިންތިހާބުގައި ވާދަކުރެއްވުމުގެ ބަދަލުގައި ސިރިސޭނާއަކީ މިހާރުގެ ރައީސް ގޮތަބަޔަ ރާޖަޕަކްސަގެ ޕާޓީ ތަމްސީލް ކުރާ ގާނޫނު ހަދާ މަޖިލީހުގެ މެމްބަރެކެވެ.
ހަމަލާގެ ތުހުމަތުގައި ހައްޔަރު ކުރި 200 މީހުންގެ ތެރެއިން އެއްވެސް މީހެއްގެ މައްޗަށް މިހާތަނަށް ކުށް ސާބިތުވި ނުވި ނަމަވެސް، އޭގެ ތެރެއިން 16 މުސްލިމުންނާ ދެކޮޅަށް މިދިޔަ އަންގާރަ ދުވަހު ވަނީ ދައުވާ އުފުލާފަ އެވެ. އެކަމަކު އެ މީހުންގެ މައްޗަށް ދައުވާ ކުރީ ޑިސެމްބަރު 2018 ގައި ބުދުތަކަކަށް ހަމަލާ ދިން ކަމަށެވެ.
ލަންކާގެ ފުލުހުން ބުނީ ބުދުތަކަށް ހަމަލާ ދިން ހާދިސާއަކީ އީސްޓާ ސަންޑޭ ހަމަލާ ފެށުނު ހިސާބު ކަމަށެވެ. އީސްޓާ ސަންޑޭ ހަމަލާ ދީފައި ވަނީ ބުދުތަކަށް ހަމަލާދިންތާ ހަތަރު މަސް ފަހުންނެވެ.
