އެފްރިކާގެ ގައުމެއް ކަމަށްވާ ޗެޑްގެ ރައީސް އިދްރީސް ދެބީއަށް ހަނގުރާމައިގައި ލިބުނު ޒަހަމްތަކުގައި އަވަހާރަވެއްޖެ އެވެ.
މިދިޔަ ހަފްތާ ބަންދުގައި ގައުމުގެ އުތުރުގައި ހަނގުރާމަ ކުރާ ސަރަހައްދަށް އެމަނިކުފާނު ދިޔެއީ ހަނގުރާމައިގެ ކުރީ ސަފުގައި އުޅޭ ސިފައިިންނާ ބައްދަލު ކުރާށެވެ.
ނަމަވެސް ފްރަންޓް ފޯ ޗޭންޖް އެންޑް ކޮންކޯޑް އިން ޗެޑް ގްރޫޕުން ދިން ކުއްލި ހަމަލާއަކާ ދެކޮޅަށް އެމަނިކުފާނު ރައްދު ދެމުން ދަނިކޮށް އަވަހާރަވީ އެވެ.
ދެހާސް ސޯޅަ ވަނަ އަހަރު އުފެދުނު މި ގްރޫޕުގެ މެމްބަރުންނަކީ ސަރުކާރާ މެދު ހިތްހަމަނުޖެހޭ ކުރީގެ ސިފައިންނެވެ.
އަވަހާރަވިކަން އިއުލާނު ކުރީ އެންމެ ފަހުން ބޭއްވި އިންތިހާބުން ކާމިޔާބި ހޯއްދެވިތާ އެއް ދުވަހު ފަހުންނެވެ. މިއީ ދެބީ ރައީސްކަމަށް ވާދަކުރައްވާ ކާމިޔާބު ކުރެއްވި ހަ ވަނަ ފަހަރެވެ.
އެމަނިކުފާނު އަވަހާރަވުމާއެކު ސަރުކާރާއި މަޖިލިސް ވަނީ އުވާލަފަ އެވެ. ކާފިއު އިއުލާނުކޮށް، ގައުމުގެ ބޯޑަރުތައް ވެސް މިހާރު ވަނީ ބަންދުކޮށްފަ އެވެ.
އުމުރުން 68 އަހަރުގައި އަވަހާރަވި ދެބީ ވަނީ 30 އަހަރަށް ވުރެ ގިނަ ދުވަހު ރައީސްކަން ކުރައްވާފަ އެވެ. އަސްކަރީ ތަމްރީނު ހޯއްދަވާފައިވާ ދެބީ އެންމެ ފުރަތަމަ ވެރިކަމަށް ވަޑައިގެންނެވީ ބަގާވާތަކުންނެވެ.
ދެބީގެ ޖަނާޒާ އޮންނާނީ ހުކުރު ދުވަހު އެވެ.
އެމަނިކުފާނު އަވަހާރަވުމުން ކުރިއަށް އޮތް 18 މަސް ވެރިކަން ކުރައްވާނީ އުމުރުން 37 އަހަރުގެ ދަރިކަލުން މަހަމަތު އިދްރީސް ދެބީ އިތްނޯ ކަމަށް ވަނީ އިއުލާނުކޮށްފަ އެވެ.
އަސްކަރިއްޔާއިން ނެރުނު ބަޔާނެއްގައި ބުނީ 18 މަސް ފާއިތުވުމުން މިނިވަން އިންތިހާބެއް އޮންނާނެ ކަމަށެވެ. އަސްކަރީ އިސް އޮފިޝަލެއްގެ ގޮތުގައި އުޅުއްވާ މަހަމަތު ވަނީ ވެރިކަން ކުރާނެ ސަރުކާރަށް އިތުރު 14 އަސްކަރީ ޖެނެރަލުން ކަނޑައަޅުއްވާފަ އެވެ.
ދެބީގެ ދަރިކަލުން ވެރިކަން ކުރެއްވުން ގާނޫނު އަސާސީއާ ހިލާފު ކަމަށް ރިޕޯޓުތައް ބުނެ އެވެ. އެ ގައުމުގެ ގާނޫނު އަސާސީގައިވާ ގޮތުން ރައީސް އަވަހާރަވުމުން ވެރިކަމުގެ ބާރުތައް ލިބިވަޑައިގަންނަވާނީ މަޖިލީހުގެ ރައީސަށް ކަމަށެވެ.
