މޫސުމަށް އަންނަ ބަދަލު ކުޑަ ކުރަން ވަގުތު ކުޑަތަން ވަމުންދާ ކަމަށް އދ. ގެ ވޯލްޑް މީޓިއޮރޮލިޖަކް އޯގަނައިޒޭޝަނުން ނެރުނު ރިޕޯޓުގައި އިންޒާރުކޮށްފި އެވެ.
ދުނިޔޭގެ މޫސުމާ ބެހޭ ޖަމިއްޔާގެ އެ ރިޕޯޓުގައި ބުނީ ކޮވިޑު ބަލިމަޑުކަމުގެ ސަބަބުން މޫސުމީ ބަދަލު ކުޑަ ކުރުމުގެ މަސައްކަތަށް އަސަރުކޮށްފައިވާ ކަމަށެވެ.
އެ ރިޕޯޓުގައި ބުނެފައިވަނީ 2021 ވަނަ އަހަރު ވާން ޖެހޭނީ ކަންކަން ކުރުމުގެ އަހަރަކަށް ކަމަށާއި މޫސުމަށް އަންނަ ބަދަލުތަކުގެ ނޭދެވޭ އަސަރުން މީހުން ރައްކާތެރި ކުރަން ޖެހޭނެ ކަމަށެވެ.
މޫސުމާ ބެހޭ ޖަމިއްޔާގެ ރިޕޯޓު ނެރެފައި ވާއިރު، އަންނަ ބުރާސްފަތި ދުވަހާއި ހުކުރު ދުވަހު މޫސުމާ ބެހޭ ބޮޑު ބައްދަލުވުމެއް ދުނިޔޭގެ ލީޑަރުންގެ މެދުގައި ވާޗުއަލްކޮށް ކުރިއަށް ދާނެ އެވެ.
އެމެރިކާގެ ރައީސް ޖޯ ބައިޑެންގެ އިސް ނެންގެވުމުގެ މަތިން 40 ގައުމެއްގެ އެންމެ އިސް ވެރިން އެ ސަމިޓުގައި ބައިވެރިވެ ވަޑައިގެން ކުރެވޭނެ ކަންކަމާ ގުޅޭ މަޝްވަރާ ކުރާނެ އެވެ.
"އަޅުގަނޑުމެން މި ތިބީ ވަޅުގަނޑަކަށް ވެއްޓުމުގެ ތުންފަތް މަތީގައި،" މޫސުމާ ބެހޭ ޖަމިއްޔާގެ "ސްޓޭޓް އޮފް ދަ ގްލޯބަލް ކްލައިމެޓް" ރިޕޯޓު ނެރެދެއްވަމުން އދ.ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވިދާޅުވި އެވެ.
އެ ރިޕޯޓުގެ ހޯދުންތަކުން ދައްކާ ގޮތުގައި 2020 ވަނަ އަހަރަކީ މިހާތަނަށް ރިކޯޑު ކުރި އެންމެ ހޫނު އެއް އަހަރެވެ. މީގެ ކުރިން އެ މިންވަރަށް ހޫނުވެފައި ވަނީ 2016 އަދި 2019 ގައެވެ.
ދުނިޔެ ހޫނު ކުރަން މަގުފަހިކޮށްދޭ ވިހަ ގޭސްތައް ކަމަށްވާ ކާބަންޑައި އޮކްސައިޑް، މީތޭން އަދި ނައިޓްރަސް އޮކްސައިޑް ދަނީ އަދިވެސް އިތުރުވަމުން ކަމަށް އެ ރިޕޯޓުގައިވެ އެވެ. ނަމަވެސް ކޮވިޑު ބަލިމަޑުކަމާ ގުޅިގެން ވަގުތީ ގޮތުން ގޭސް ބޭރު ކުރުމަށް ހުއްޓުމެއް އަ އެވެ.
