ފެބްރުއަރީ އެއް ވަނަ ދުވަހު މިޔަންމާގައި ހިންގި ބަގާވާތާ ގުޅިގެން އެ ގައުމުގެ އަސްކަރިއްޔާގެ 10 ލީޑަރުންނާ ދެކޮޅަށް ދަތި ކުރުމުގެ ފިޔަވަޅު އަޅަން ޔޫރަޕިއަން ޔޫނިއަން (އީޔޫ) އިން ނިންމައިފި އެވެ.
އެ ނިންމުމާއެކު އީޔޫގެ މެމްބަރު ގައުމުތަކުން އެ ފަރާތްތަކުގެ މުދާ ހިފަހައްޓާ ދަތުރު ކުުރުން ހުއްޓުވާނެ އެވެ. އީޔޫއިން ބުނީ އެ 10 މީހުންނަކީ މިޔަންމާގެ ޑިމޮކްރަސީ އާއި ގާނޫނަށް ބެލުމެއް ނެތި އިންސާނީ ހައްގުތަކާ ދެކޮޅު އަމަލު ހިންގަމުންދާ ބަޔެއް ކަމަށެވެ.
އޭގެ އިތުރުން އަސްކަރިއްޔާއިން ކޮންޓްރޯލް ކުރާ ދެ ކުންފުންޏަކާ ދެކޮޅަށް ފިޔަވަޅު އަޅަން ވެސް އީޔޫއިން ނިންމި އެވެ. އެއީ މިޔަންމާ އިކޮނޮމިކް ހޯލްޑިންގްސް އަދި މިޔަންމާ އިކޮނޮމިކް ކޯޕޮރޭޝަނެވެ. އެ ދެ ކުންފުނީގެ ދަށުން ގިނަ ޝޮޕިން މޯލްތަކާއި، މުނިފޫހިލިފުވުމުގެ މަރުކަޒުތައް ހިންގާ ދުންފަތް ވިއްކުން ފަދަ ކަންކަން ކުރެވެ އެވެ. މިޔަންމާ އަސްކަރިއްޔާއަށް އެ ދެ ކުންފުނި މެދުވެރިކޮށް ބޮޑު އާމްދަނީއެއް ލިބެ އެވެ.
އީޔޫއިން ފިޔަވަޅު އަޅާފައި ވާއިރު، މީގެ ކުރިން އެމެރިކާ އާއި އިނގިރޭސި ވިލާތުން ވެސް ވަނީ މި ދެ ކުންފުންޏާ ދެކޮޅަށް ދަތިކޮށްފަ އެވެ.
އަސްކަރީ ބަގާވާތާ ގުޅިގެން މެދުކެނޑުމެއް ނެތި މިޔަންމާގައި ހިންގަމުން އަންނަ މުޒާހަރާތަކުގައި ލޭއޮހޮރުވުން ބޮޑުވެ 700 އަށް ވުރެ ގިނަ މީހުން މަރުވެފައި ވެއެވެ. އޭގެ އިތުރުން 4000 އަށް ވުރެ ގިނަ މީހުން ހައްޔަރުކޮށްފައި ވެއެވެ.
