އިންޑިއާގެ ބޮޑުވަޒީރު ނަރެންދްރަ މޯދީ ބަންގްލަދޭޝަށް މިދިޔަ މަހު ކުރެއްވި ދަތުރުފުޅާ ދިމާކޮށް މުޒާހަރާ ކުރަން ހިތްވަރު ދިން ހިފާޒަތޭ އިސްލާމުގެ ލީޑަރު ހައްޔަރުކޮށްފި އެވެ.
މާމޫނުލް ހައްގުއާ ދެކޮޅަށް ތުހުމަތު ކުރަނީ ހަމަނުޖެހުމަށް ހިތްވަރު ދިން ކަމަށެވެ. ނަމަވެސް އެއީ މޯދީގެ ދަތުރުފުޅާ ދިމާކޮށް ހިންގި ހަމަނުޖެހުމާ ގުޅިގެން ކަމެއް ފުލުހުން ހާމަކޮށްފައެއް ނުވެ އެވެ.
އުމުރުން 47 އަހަރުގެ ހައްގު އަކީ ހިފާޒަތޭ އިސްލާމް ގްރޫޕުގެ އެއް ލީޑަރެވެ. އެއީ ސިޔާސީ ޕާޓީއެއް ނޫން ނަމަވެސް ސިޔާސީ ކަންކަމާ ގުޅޭ ވާހަކަތައް އެ ގްރޫޕުން ދައްކާ ހަދަ އެވެ.
އެ ގްރޫޕުން ގޮވާލަނީ 160 މިލިއަން މީހުން ދިރިއުޅޭ ބަންގްލަދޭޝަށް އިސްލާމީ އިންގިލާބެއް ގެނައުމަށެވެ. އަދި ގާނޫނު އަސާސީ އާއި ގާނޫނީ ނިޒާމު މިހާރު އޮތް ގޮތް ކަމުނުދާ ކަމަށް ބުނެ އެވެ.
މޯދީގެ ދަތުރުފުޅާ ދިމާކޮށް އެ ގްރޫޕުގެ ސަޕޯޓަރުން މަގުތަކަށް ނިކުތީ މޯދީއަކީ މުސްލިމުންނާ ދެކޮޅު ސިޔާސަތު ގެންގުޅޭ ވެރިއެއް ކަމަށް ބުނެ އެވެ.
އެ މީހުން ހިތްހަމަނުޖެހުނީ ބަންގްލަދޭޝްގެ 50 ވަނަ މިނިވަން ދުވަހުގެ ރަސްމިއްޔާތަށް މޯދީއަށް ދައުވަތު ދިނުމުންނެވެ. މަގުތަކަށް ނިކުމެ ބޭއްވި އެއްވުންތަކުގައި ހަމަނުޖެހުން ހިނގާ 17 މީހުން މަރުވި އެވެ.
