އިރާނުގެ ތާއީދާއެކު ހަރަކާތްތެރިވާ ހޫތީ ހަނގުރާމަވެރިން ޔަމަނުގެ މޮޑެލް އަދި އެކްޓްރެސް އިންތިސާރް އަލް ހައްމާދީ ރަހީނުކޮށްފި އެވެ.
"ހޫތީ ހަނގުރާމަވެރި ގްރޫޕުން ދަނީ ޔަމަނުގެ އަންހެނުންނަށް ބިރުދައްކަމުން،" ޔަމަނީ ފެމިނިސްޓް ވޮއިސްގެ ނަމުގައި ސޯޝަލް މީޑިއާގައި ހިންގާ ޕޭޖެއްގައި ބުނެފައި ވެއެވެ.
އަންހެނުންގެ ހައްގުތަކަށް މަސައްކަތް ކުރާ އެކްޓިވިސްޓުން ހިންގާ އެ ޕޭޖުގައި ބުނެފައި ވަނީ އިންތިސާރް ރަހީނުކުރީ އޭނާ އަދާކުރާ ވަޒީފާގެ ގޮތުން ކަމަށެވެ.
އޭނާ ރަހީނުކޮށްގެން ގެންދިޔަ ފަހުން މި ވަގުތު ހުރި ތަނެއް ނޭނގޭ ކަމަށް ވެސް އެކްޓިވިސްޓުން އަންނަނީ ސޯޝަލް މީޑިއާގައި ބުނަމުންނެވެ. އޭނާ ވީ ތަނެއް ހޯދަން ކުރާ މަސައްކަތަށް ތާއީދު ގިނަ ކުރުމަށް އެކްޓިވިސްޓުން އަންނަނީ ހޭޝްޓެގްތައް ވެސް ބޭނުން ކުރަމުންނެވެ.
އިންތިސާރްގެ ކެރިއަރު ފައްޓާފައިވަނީ ޔަމަނުގެ އެންމެ ފުރަތަމަ މޭކަޕް އާޓިސްޓުގެ ގޮތުގަ އެވެ. އޭގެ ފަހުން އޭނާ ވަނީ މޮޑަލް ކުރަން ފަށާ، އެކްޓިންގެ ތެރެއަށް ވެސް ތައާރަފުވެފަ އެވެ.
އެގޮތުން ޔަމަނުގައި މިދިޔަ އަހަރުގެ ރޯދަ މަހު ދެއްކި މަގްބޫލު ދެ ސީރީޒަކުން އޭނާ ފެނިފައި ވެއެވެ. އިންތިސާރް ރަހީނުކުރުމުން އެކްޓިވިސްޓުން ކަންބޮޑުވުން ފާޅުކުރަމުން ދާއިރު، ރަސްމީ ސިފައެއްގައި ޔަމަނުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
