ދުނިޔޭގެ އެކި ކަންކޮޅުތަކުގައި އުޅޭ ރެފިއުޖީންނަށް ކޮވިޑް ވެކްސިން ފޯރުކޮށްދިނުމަށް 100 މިލިއަން ޑޮލަރުގެ ޕްރޮގްރާމެއް ފަށަން ގަތަރުގެ ރެޑް ކްރެސެންޓުން ނިންމައިފި އެވެ.
މިއަދު ފަށަން ތަވާލުކޮށްފައިވާ ޕްރޮގްރާމު ތިން އަހަރު ވަންދެން ކުރިއަށް ގެންދާނެ އެވެ. އެ ޕްރޮގްރާމުގެ ދަށުން ވެކްސިން ދޭނީ އެފްރިކާ، އޭޝިއާ އަދި މެދުއިރުމަތީގެ 20 ގައުމެއްގައި އުޅޭ ރެފިއުޖީންނަށެވެ.
"އެކަކުވެސް ބާކީ ނުކުރުމާ" މޮޓޯގެ ދަށުން ހިންގާ އެ ޕްރޮގްރާމުގައި ގަތަރު ރެޑް ކްރެސެންޓަށް އެހީތެރިކަން ފޯރުކޮށްދެނީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިންނެވެ.
"ޕްރޮގްރާމު ތަންފީޒު ކުރާނީ ޑަބްލިއުއެޗްއޯ މެދުވެރިކޮށް، ވަކިވަކި ގައުމުތަކުން އަމަލު ކުރާ އުސޫލުތަކާ އެއް ގޮތަށް، އެ ގައުމެއްގެ ކަމާ ބެހޭ އިދާރާތަކާ ގުޅިގެން،" ގަތަރު ރެޑް ކްރެސެންޓުގެ ބަޔާނެއްގައި ވެއެވެ.
އެ ޕްރޮގްރާމުގެ މަގްސަދުގެ ގޮތުގައި ފާހަގަކޮށްފައިވަނީ 3.6 މިލިއަން ރެފިއުޖީންނަށް ކޮވިޑް ވެކްސިން ދިނުމެވެ. އޭގެ އިތުރުން ކޮވިޑާ ދެކޮޅަށް ވެކްސިން ޖެހުމުގެ މުހިއްމުކަން ކުރިއެރުވުމަކީ ވެސް އެއް މަގްސަދެވެ.
ރެފިއުޖީންނަށް ވެކްސިންދޭ ޕްރޮގްރާމުގައި އެންމެ ބޮޑު އިސްކަމެއް ދޭނީ އުމުރުން ދުވަސްވީ މީހުންނާއި، ބޮޑެތި ބަލިތައް ތަހައްމަލު ކުރަމުންދާ މީހުންނަށެވެ.
ރެފިއުޖީންގެ މައްސަލަ އެންމެ ބޮޑު ކަމަށް ފާހަގަވާ އަފްގާނިސްތާނާއި، ބަންގްލަދޭޝް އަދި އުތުރު ސީރިއާ އާއި ފަލަސްތީނާއި ޔަމަނަށް އެ ޕްރޮގްރާމުގައި ބޮޑު ސަމާލުކަމެއް ދޭނެ އެވެ. އެ ތަނުން ކޮންމެ ގައުމެއްގައި މަދުވެގެން 400،000 ރެފިއުޖީންނަށް ވެކްސިން ދިނުމަށް ވަނީ ރާވާފަ އެވެ.
