ޗައިނާގެ ސައިނޯފާމް ވެކްސިނުގެ ރައްކާތެރިކަން ކަށަވަރު ނުވަނީސް އެ ވެކްސިން އާއްމުންނަށް ދޭން ނުފަށާނެ ކަމަށް ސްރީލަންކާގެ ހެލްތު މިނިސްޓަރު ޕަވިތްރަ ވަންނިއަރައްޗީ ވިދާޅުވެއްޖެ އެވެ.
މިދިޔަ ބުރާސްފަތި ދުވަހު ލަންކާގެ ގާނޫނު ހަދާ މަޖިލީހުގައި ވާހަކަދައްކަވަމުން ޕަވިތްރަ ވިދާޅުވީ ކަމާ ބެހޭ އިދާރާތަކުން އެ ވެކްސިނުގެ ރައްކާތެރިކަން ކަށަވަރު ކުރުމުގެ މަސައްކަތް ކުރަމުންދާ ކަމަށެވެ.
މި ވަގުތު އެ ވެކްސިން ދެނީ ލަންކާގައި ދިރިއުޅޭ ޗައިނާގެ ރައްޔިތުންނަށް އެކަނި ކަމަށާއި ލަންކާ ރައްޔިތުންނަށް އެ ވެކްސިން ދޭން ފަށާނީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހުއްދަ ދިނުމުން ކަމަށް އޭނާ ވިދާޅުވި އެވެ.
ޑަބްލިއުއެޗްއޯގެ ހުއްދަ ނުލިބެނީސް އެ ވެކްސިން ލަންކާއަށް ގެނައުމުން ބައެއް ސިޔާސީ ފަރާތްތަކުން ދަނީ ސަރުކާރަށް ފާޑުކިޔަމުންނެވެ. އެގޮތުން އެއީ ފަރުވާ ކުޑަ އަމަލެއްގެ ގޮތުގައި ސިފަކޮށްފައި ވެއެވެ.
އޭގެ އިތުރުން ޑަބްލިއުއެޗްއޯގެ ހުއްދަ ނުލިބެނީސް ލަންކާގައި ސައިނޯފާމް ވެކްސިން ޖަހަން ނުވާނެ ކަމަށް ބުނެފައި ވާތީ އެ ގައުމުގެ ބޭސް ރެގިއުލޭޓް ކުރާ އިދާރާގެ ހަތަރު މުވައްޒަފަކު މިހާރު ވެސް އިސްތިއުފާ ދޭން މަޖުބޫރުކުރުވާފައިވާ ކަމަށް އިދިކޮޅުން ތުހުމަތު ކުރެ އެވެ.
