މާދަމާ އޮންނަ ލޯކަލް ކައުންސިލް އިންތިހާބަކީ ގައުމުގެ މިނިވަންކަން ގެއްލުވާލަން ސަރުކާރުން ކުރަމުންދާ މަސައްކަތް ހުއްޓުވަން ރައްޔިތުންނަށް ލިބޭ ފަހު ފުރުސަތު ކަމަށާއި، ގައުމު އަނބުރާ ހޯދުމަށްޓަކައި، ގައުމީ ވިސްނުމުގައި ވޯޓު ދިނުމަށް އެދެމުން، އިދިކޮޅު ކޯލިޝަންގެ ކެމްޕޭން ނިންމާލައިފި އެވެ.
ކައުންސިލް އިންތިހާބުގައި އިދިކޮޅު ޕީޕީއެމް/ޕީއެންސީ ކެމްޕޭނު ނިންމާލުމަށް ޕާޓީ އޮފީސް ކުރިމަތީގައި ބޭއްވި ހަރަކާތުގައި އެ ކޯލިޝަންގެ ލީޑާޝިޕްގެ ގިނަ ބޭފުޅުން ވަނީ ރައްޔިތުންނަށް ގިނަ އިލްތިމާސްތަކެއް ކުރައްވައިފަ އެވެ.
އެ ޖަލްސާގައި ކުރީގެ ރައީސް އަބްދުﷲ ޔާމީންގެ ރަނިންމޭޓަކަށް 2013 ގެ ރިޔާސީ އިންތިހާބު ވާދަކުރެއްވި ޑރ. މުހައްމަދު ޝަހީމް އަލީ ސައީދު ވިދާޅުވީ މާދަމާ އޮންނަ އިންތިހާބަކީ ގައުމުގެ ގިނަ ކަންތައްތަކެއް ތަރުތީބުވެގެންދާނެ ވޯޓެއް ކަމަށެވެ.
"ކީއްވެގެންތޯ މިއިންތިހާބު މުހިއްމުވަނީ؟ އަމާޒުތައް ހާސިލު ކުރުމަށްޓަކައި. އިސްލާމް ދީންގެ މަތިވެރި އުސޫލުތައް ހިމާޔަތް ކުރަން. މި އިންތިހާބުގެ އަގުލަބިއްޔަތު ލިބުމުގެ މާނައަކީ ކުރިމަގު އުޖާލާވުން. މި އިންތިހާބު ކާމިޔާބު ކުރުމަކީ ރައީސް ޔާމީން މިނިވަންކުރަން ލިބޭ ހިތްވަރެއް،" ޑރ. ޝަހީމް ވިދާޅުވި އެވެ.
އިދިކޮޅުގެ ފަރާތުން މާލޭގެ މޭޔަރުކަމަށް ވާދަކުރައްވާ ޑރ. މުހައްމަދު މުއިއްޒު މާދަމާ ރައްޔިތުން ނުކުމެލާ ވޯޓަކީ ގައުމީ ވޯޓެއް ކަމަށެވެ.
މުއިއްޒު އިތުރަށް ވިދާޅުވީ ވަކި ޕާޓީއަކަށް ބެލުމެއްނެތި، ހަމަ ހަމަކަމާއެކު ރައްޔިތުންގެ ހިދުމަތުގައި މަސައްކަތް ކުރައްވާނެ ކަމަށެވެ.
އިދިކޮޅުގެ ކެމްޕޭނު ނިންމުމުގެ ޖަލްސާގައި ޑރ. މުއިއްޒު ވާހަކަ ދައްކަވަނީ. -- ފޮޓޯ: ހުސެއިން ވަހީދު/އަދަދު
"ތަފާތު ކުރުމެއްނެތި ހަމަހަމަކަމާ އެކީގައި އަޅުގަނޑުމެން މަސައްކަތް ކުރާނީ. އެހެންވީމާ، ޕާޓީގެ ފިކުރު ދޫކޮށް، ގައުމީ ވިސްނުމުގައި ހުރިހާ ރައްޔިތުންވެސް ވޯޓު ދެއްވާ،" މުއިއްޒު އެދިވަޑައިގެންނެވި އެވެ.
އެ ހަރަކާތުގައި ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު ވެސް ވިދާޅުވީ މި އިންތިހާބުގައި އެމްޑީޕީއަށް ނޫނެކޭ ބުނެ، އިދިކޮޅަށް މެޖޯރިޓީ ދިނުމަކީ ރައީސް ޔާމީން މިނިވަންކުރަން ލިބޭ ފުރުސަތެއް ކަމަށެވެ.
"ކީއްވެގެންތޯ ރައީސް ޔާމީން މިނިވަންކުރަންވީ؟ މި ގައުމު ސަލާމަތް ކުރުމަށްޓަކައި. މި ގައުމު އަނބުރާ ހޯދުމަށްޓަކައި. މި ސަރުކާރުން ސޮއި ކުރަމުންދާ އެއްބަސްވުންތަކުގެ ތަފްސީލް ހޯދުމަށްޓަކައި،" ޝިޔާމް ވިދާޅުވި އެވެ.
އިދިކޮޅު ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ ޕީޕީއެމްގެ ސިޔާސަތަކީ ބޭރުގެ ނުފޫޒަށް ބޯލެނބުމެއް ނެތި ގައުމު ތަރައްގީކޮށް، ހިންގުން ކަމަށެވެ.
"ވޯޓު ކަރުދާސް އަތަށް ލިބުނީމާ އޭގައި އިން ނަމަކަށް ބަލާނެ ކަމެއް ނެތް އެއްވެސް ބޭފުޅަކު. ބަލަންވީ ކޮން ދިމާއެއްގައިތޯ ރުކެއް އިނީ. ގައުމުގެ މިނިވަންކަން ހިމާޔަތްކުރަން ރުކައް ވޯޓު ދެއްވާ،" އަދުރޭ ވިދާޅުވި އެވެ.
އަދުރޭ އިތުރަށް ވިދާޅުވީ ގައުމު ސަލާމަތް ކުރުމަށްޓަކައި ރައީސް ޔާމީންގެ ނަންފުޅު 2023 ވަނަ އަހަރު އޮންނަ ރިޔާސީ އިންތިހާބުގެ ވޯޓު ކަރުދާހުގައި އޮންނާނެކަން ކަށަވަރުކުރަންޖެހޭ ކަމަށެވެ.
އެއީ ގައުމު ސަލާމަތްކޮށް، އިގުތިސޯދު އަލުން ކޮޅަށް ޖެހޭނީ ރައީސް ޔާމީނަށް ކަމަށާއި އެހެންކަމުން މާދަމާ އޮންނަ އިންތިހާބުގައި އެމްޑީޕީ ބަލި ކުރުމަކީ އެކަމަށް އެޅޭ އެންމެ ބޮޑު ފިޔަވަޅުގެ ގޮތުގައި އަދުރޭ ވަނީ ސިފަ ކުރައްވައިފަ އެވެ.
