މާދަމާ އޮންނަ ލޯކަލް ކައުންސިލް އިންތިހާބުގައި، ޕާޓީ ފިކުރަށް ނުބަލައި، ގައުމުގެ މުސްތަގުބަލަށް ވޯޓު ދިނުމަށް ރައްޔިތުންގެ ކިބައިން އިދިކޮޅުގެ ފަރާތުން މާލޭގެ މޭޔަރު ކަމަށް ވާދަކުރައްވާ ޑރ. މުހައްމަދު މުއިއްޒު މިއަދު އެދިވަޑައިގެންފި އެވެ.
ކައުންސިލް އިންތިހާބުގައި އިދިކޮޅު ޕީޕީއެމް/ޕީއެންސީ ކެމްޕޭނު ނިންމާލުމަށް ޕާޓީ އޮފީސް ކުރިމަތީގައި ބޭއްވި ހަރަކާތުގައި ވާހަކަ ދައްކަވަމުން، މުއިއްޒު ވިދާޅުވީ ގައުމުގެ ހާލަތު މިހާރު ބޮއްސުންލާފައިވާއިރު، މާދަމާ ރައްޔިތުން ނުކުމެލާ ވޯޓަކީ ގައުމީ ވޯޓެއް ކަމަށެވެ.
މާލޭ ސަރަހައްދަށް ވޯޓުލެވޭ މީހުންނަށް ނިސްބަތް ކުރައްވައި، ކުރީ ސަރުކާރުގައި ހައުސިން މިނިސްޓަރުކަން ކުރެއްވި މުއިއްޒު ވިދާޅުވީ މާލޭގެ ރައްޔިތުން މިހާރު ތިބީ ވަރަށް ނިކަމެތި ހާލަތެއްގައި ކަމަށެވެ.
"ރައްޔިތުންނަށް ފުދުންތެރި ދިރިއުޅުމެއް ލިބިދީފައިނުވޭ. މާލޭގެ ވެއްޓަކީ ސާފުތާހިރުކަމެއް ނެތް ތަނަކަށް ވަނީ ވެފައި،" މުއިއްޒު ވިދާޅުވި އެވެ.
މާލެ ސަރަހައްދުގެ ގޮނޑިތަކަށް ކުރިމަތިލާ އިދިކޮޅުގެ ކެންޑިޑޭޓުންނާއެކު ރައްޔިތުންގެ އަޑު އަހައިގެން، އެއް އަމާޒަކަށް މަސައްކަތްކޮށްގެން ރައްޔިތުން އެދި އެދި ތިބި ނަތީޖާ ނެރެވޭނެކަމަށް އޭނާ ވިދާޅުވި އެވެ.
އިދިކޮޅުގެ ކެމްޕޭން ނިންމާލަން ބޭއްވި ޖަލްސާގައި އިދިކޮޅު ސަޕާޓަރުން. -- ފޮޓޯ: ހުސެއިން ވަހީދު/އަދަދު
އޭނާ އިތުރަށް ވިދާޅުވި ގޮތުގައި، ވަކި ޕާޓީއަކަށް ބެލުމެއްނެތި، ހަމަ ހަމަކަމާއެކު ރައްޔިތުންގެ ހިދުމަތުގައި މަސައްކަތް ކުރައްވާނެ އެވެ.
"ތަފާތު ކުރުމެއްނެތި ހަމަހަމަކަމާ އެކީގައި އަޅުގަނޑުމެން މަސައްކަތް ކުރާނީ. އެހެންވީމާ، ޕާޓީގެ ފިކުރު ދޫކޮށް، ގައުމީ ވިސްނުމުގައި ހުރިހާ ރައްޔިތުންވެސް ވޯޓު ދެއްވާ،" މުއިއްޒު އެދިވަޑައިގެންނެވި އެވެ.
ކެމްޕޭނު ނިންމަން ބޭއްވި ހަރަކާތުގައި އިދިކޮޅު ކޯލިޝަންގެ ލީޑަޝިޕުގެ ގިނަ ބޭފުޅުން ވާހަކަ ދެއްކެވިއިރު، އެ ހުރިހާ ބޭފުޅުން މައިގަނޑު ގޮތެއްގައި ވިދާޅުވީ ރާއްޖޭގެ މިނިވަންކަމާއި އިސްތިގުލާލު ހިމާޔަތް ކުރުމަށް މިއީ ރައްޔިތުންނަށް ލިބޭ ފަހު ފުރުސަތު ކަމަށެވެ.
އެހެންކަމުން، ގައުމުގެ މުސްތަގުބަލަށްޓަކައި ކައުންސިލް އިންތިހާބު މެޖޯރިޓީ އިދިކޮޅު ކޯލިޝަނަށް ހޯދައި ދިނުމަށް ވަނީ އެދިފަ އެވެ.
