ނޯވޭގެ ބޮޑުވަޒީރު އާނާ ސޮލްބާގްގެ އުފަންދުވަސް ފާހަގަކުރަން އާއިލާއާ އެކު ބޭއްވެވި ޕާޓީގައި ކޮވިޑުން ރައްކާތެރިވުމަށް އެކުލަވާލާފައިވާ އުސޫލުގައި ހިމެނޭ ގައިދުރުކަމުގެ ފިޔަވަޅާ ހިލާފުވުމުން ޖޫރިމަނާކޮށްފި އެވެ.
އެކަމަނާ ޖޫރިމަނާކޮށްފައި ވަނީ 2،352 އެމެރިކާ ޑޮލަރުން ކަމަށް މިއަދު އޮތް ނޫސްވެރިންގެ ބައްދަލުވުމެއްގައި ފުލުހުންގެ ވެރިޔާ އޯލޭ ސެވެރުޑް ވިދާޅުވި އެވެ.
ދެވަނަ ދައުރަކަށް ބޮޑުވަޒީރުކަން ކުރައްވަމުންދާ ސޮލްބާގް މިދިޔަ މަހު ވަނީ އުސޫލާ ހިލާފަށް ޕާޓީ ބޭއްވެވި މައްސަލާގައި ރައްޔިތުންގެ ކިބައިން މައާފަށް އެދިވަޑައިގެންފަ އެވެ.
އެކަމަނާގެ 60 ވަނަ އުފަންދުވަހުގެ ޕާޓީ އޮތީ ފަރުބަދަ މަތީ ރިސޯޓެއްގައި ފެބްރުއަރީ މަހުގެ ފަހު ކޮޅެވެ. އެ ޕާޓީގައި އާއިލާގެ 13 މެމްބަރުން ބައިވެރިވި އެވެ. އޭރު ސަރުކާރުން އޮތީ 10 މީހުންނަށް ވުރެ ގިނައިން އެއްވުންތައް ބޭއްވުން މަނާކޮށްފަ އެވެ.
މި އުސޫލާ ހިލާފުވުމުން އާއްމު ގޮތެއްގައި ޖޫރިމަނާ ނުކުރެ އެވެ. ނަމަވެސް މި ހާލަތުގައި ޖޫރިމަނާ ކުރަން ނިންމީ ފިޔަވަޅުތައް ތަންފީޒު ކުރެއްވުމަށް އެންމެ ކުރީގައި އުޅުއްވާ އެއް ބޭފުޅަކީ ބޮޑުވަޒީރު ކަމަށް ވާތީ އެވެ.
އަންނަ ސެޕްޓެމްބަރު މަހު ނޯވޭގެ އިންތިހާބު ބާއްވަން ރާވާފައި ވާއިރު، މި ވަގުތު ޔޫރަޕުގައި ކޮވިޑް އެންމެ ބޮޑަށް ކޮންޓްރޯލްވެފައި އޮތީ އެ ގައުމުގަ އެވެ.
