ސްޓޭޖު މަތީގައި ހިނގި ކުރިމަތިލުމެއްގެ ސަބަބުން ސްރީލަންކާގެ ރީތީގެ ރާނީ ހޮވާ އެންމެ ބޮޑު މުބާރާތުގެ ރަން ތާޖު ހޯދި ޕުޝްޕިކާ ޑެ ސިލްވާއަށް އަނިޔާވި މައްސަލާގައި "މިސިސް ވޯލްޑް" ހައްޔަރުކޮށްފި އެވެ.
"މިސިސް ސްރީލަންކާ" ގެ ލަގަބު ޕުޝްޕިކާއަށް އަރުވާފައި ވަނީ ގައުމީ ޓީވީ މެދުވެރިކޮށް މިދިޔަ އާދީއްތަ ދުވަހު ދެއްކި ހާއްސަ ރަސްމިއްޔާތެއްގަ އެވެ. އޭނާގެ ބޮލުގައި ތާޖު އަޅުވަން ޖެހުނީ އޭގެ ކުރިން އެ ލަގަބު ހޯދި އަދި މިހާރު "މިސިސް ވޯލްޑް" ކެރޮލިން ޖޫރީ އެވެ.
ނަމަވެސް ކެރޮލިން ވަނީ ޕުޝްޕިކާގެ ބޮލުގައި އިން ތާޖު ޖަހައިގަނެ، ޕުޝްޕިކާއަކީ މީހަކާ ކައިވެނިކޮށް، ވަރިވެފައިވާ މީހަކަށް ވާތީ އެފަދަ ލަގަބެއް އޭނާއަށް ހައްގު ނޫން ކަމަށް ބުނެފަ އެވެ.
"މިސިސް ސްރީލަންކާ" މުބާރާތުގެ ގަވާއިދު ބުނާ ގޮތުން މުބާރާތުގައި ބައިވެރިވެވޭނީ ކައިވެނިކޮށްގެން އުޅޭ މީހުންނަށެވެ. އެހެންކަމުން ވަރިވެފައިވާ މީހެއް ނަމަ ޑިސްކޮލިފައި ވާނެ އެވެ.
އެ ގަވާއިދަށް އިޝާރާތްކޮށް، ކެރޮލީން ވަނީ ޕުޝްޕިކާގެ ބޮލުގައި އިން ތާޖު ޖަހައިގަނެ، ދެވަނައަށް ދިޔަ ބައިވެރިޔާގެ ބޮލުގައި ތާޖު އަޅުވާފަ އެވެ. އެއާއެކު ރޮވިފައި ހުރި ޕުޝްޕިކާ ސްޓޭޖު މަތިން ފައިބައިގެންދާ މަންޒަރު ފެންނަ ވީޑިއޯއެއް ވަނީ އާއްމުވެފަ އެވެ.
ނަމަވެސް ޕުޝްޕިކާއަކީ ވަރިވެފައިވާ މީހެއް ނޫންކަން ކަށަވަރު ކުރުމަށް ފަހު މުބާރާތް އިންތިޒާމް ކުރި ފަރާތުން މިހާރު ވަނީ ތާޖު އަލުން އޭނާއާ ހަވާލުކޮށްފަ އެވެ. ޕުޝްޕިކާ ބުނެފައި ވަނީ އޭނާ އަދި ވަރި ނުވާ ކަމަށާއި ނަމަވެސް އޭނާ އާއި އޭނާގެ ފިރިމީހާ ދިރިއުޅެނީ ވަކިން ކަމަށެވެ.
"މިސިސް ސްރީލަންކާ" އަކީ ބައިނަލްއަގްވާމީ ރީތީގެ މުބާރާތެއް ކަމަށްވާ "މިސިސް ވޯލްޑް" ގެ ބައެކެވެ. އެ މުބާރާތުގެ ބައިވެރިންނަށް ވާން ޖެހެނީ ކައިވެނިކޮށްގެން އުޅޭ މީހުންނެވެ. ކޮންމެ ގައުމަކުން ވެސް ހޮވޭ ރީތީގެ ރާނީ "މިސިސް ވޯލްޑް" މުބާރާތުގައި ބައިވެރިވާނެ އެވެ.
އެ ހާދިސާއަށް ފަހު ފޭސްބުކްގައި ކުރި ޕޯސްޓެއްގައި ޕުޝްޕިކާ ބުނީ ބޮލަށް ލިބުނު ކުދި ޒަހަމްތަކަށް ފަރުވާ ހޯދަން ޖެހުނު ކަމަށެވެ. އަދި އޭނާއާ މެދު އަމަލު ކުރި ގޮތާ ގުޅިގެން ކޯޓަށް މައްސަލަ ހުށަހަޅާނެ ކަމަށް ވެސް ބުންޏެވެ.
އެކަމާ ގުޅިގެން ކެރޮލީން އާއި ޗޫލާ ޕަޑްމެންޑްރަ ނަމަކަށް ކިޔާ މޮޑެލްއެއް ހައްޔަރުކޮށްފައިވާ ކަމަށް ލަންކާ ފުލުހުންގެ ތަރުޖަމާނު އަޖިތް ރޮހާނާއާ ހަވާލަދީ ބީބީސީގައިި ވެއެވެ.
ޖޫރީ އާއި މުބާރާތް އިންތިޒާމް ކުރާ ޗަންދިމަލް ޖަޔަސިންގެއާ މިއަދު ފުލުހުން ސުވާލުކޮށްފައި ވާއިރު މުބާރާތުގެ ފަރާތުން ބުނީ ޕުޝްޕިކާގެ ކިބައިން ރަސްމީކޮށް މައާފަށް އެދޭނެ ކަމަށެވެ.
"މިސިސް ސްރީލަންކާ" މުބާރާތަކީ އެ ގައުމުގައި ބާއްވާ މުބާރާތްތަކުގެ ތެރެއިން އެންމެ ބޮޑު އެއް މުބާރާތެވެ. އާދީއްތަ ދުވަހުގެ ހަފްލާގައި ބޮޑުވަޒީރުގެ އަނބިކަނބަލުން ވެސް ބައިވެރިވެ ވަޑައިގެންނެވި އެވެ.
