ބޮޑެތި ސިނާއަތްތަކަށް އަމާޒުކޮށްގެން ވަޒީފާއަށް ޒުވާނުން ތަމްރީންކުރުމުގެ ޕްރޮގްރާމެއް ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ފައްޓަވައިދެއްވައިފި އެވެ.
ސްކިލް ފޯ ރެސިލިއެންޓް ވޯކްފޯސް ޕްރޮގަރާމް އިފްތިތާހު ކުރަން މޯލްޑިވްސް ޕޮލިޓެކްނިކް ގައި އިއްޔެ ބޭއްވި ރަސްމިއްޔާތުގައި މިނިސްޓަރު ވިދާޅުވީ އަމާޒަކީ އަހަރު 1،200 މީހުން ތަމްރީންކުރުން ކަމަށެވެ.
މިނިސްޓަރު ވިދާޅުވި ގޮތުގައި އެ ޕްރޮގްރާމް ހިންގަނީ ރާއްޖޭގެ ބޮޑެތި ސިނާއަތްތަކަށް އަމާޒު ކޮށްގެން މީހުންނަށް އެކިއެކި ވަޒީފާ އަދާކުރަން ބޭނުން ވާ ތަމްރީނާއި ގާބިލްކަން ހޯދައި ދިނުމަށެވެ. މި ޕްރޮގްރާމްގެ ތެރެއިން ހަތް ދާއިރާ އަކުން ވޮކޭޝަނަލް އަދި ޓެކްނިކަލް ކޯސްތަށް ފަށަން ވަނީ ހަމަޖައްސައިފަ އެވެ.
އަދި މައިގަނޑު ތިން ދާއިރާއަކުން މީހުން ތަމްރީނު ކުރާނެ އެވެ. އެއީ ޓޫރިޒަމާއި އައިސީޓީ އަދި ކޮންސްޓްރަކްޝަން ގެ އިތުރުން އެގްރިކަލްޗަރަލް ދާއިރާ އެވެ.
"އަޅުގަނޑުމެންގެ ޓާގެޓަކީ އަހަރަކު 1200 ޒުވާނުން ވަޒީފާގެ ބާޒާރަށް ތަމްރީނުކޮށްގެން ނެރުން،" މިނިސްޓަރު ވިދާޅުވި އެވެ.
މި ޕްރޮގަރާމް ގެ ތެރެއިން ތަމްރީނު ލިބިގެންދާ 33 އިންސައްތައަކީ އަންހެނުނަށް ވުމަކީ ޕްރޮގްރާމްގެ އެންމެ ބޮޑު އަމާޒެވެ.
މިނިސްޓަރު ވިދާޅުވި ގޮތުގައި ސަރުކާރާއި އަމިއްލަ ފަރާތްތައް ގުޅިގެން ނޫން ގޮތަކަށް އެންމެ ފުރިހަމައަށް މީހުން ބިނާ ކުރުމުގެ މަސައްކަތް ކުރިއަށް ނުގެންދެވޭނެ އެވެ.
ހަޔާ އެޑިއުކޭޝަންގެ ޑެޕިއުޓީ މިނިސްޓަރު އައިމިނަތް މުހައްމަދު ސަލީމް ވިދާޅުވި ގޮތުގައި އެ ޕްރޮގްރާމްތައް ގެންދާނީ ހިލެ އެވެ. އެ ކޯސްތަކުން 360 މީހުން ވަޒީފާގެ މާހައުލަށް ނުކުތުމަށް ތައްޔާރުވާނެ ކަމަށް ވިދާޅުވި އެވެ.
ބިޑް ކާމިޔާބުކޮށް މި ޕްރޮޖެކްޓްގެ ކޮންޓްރެކްޓް ހަވާލު ކޮށްފައިވަނީ ވިލާ ކޮލެޖާއި ޓެކްނިކަލް އެންޑް ވޮކޭޝަނަލް އެޑިއުކޭޝަން ސެންޓަރު އަދި މާލެ ފިޓްނެސް އެކަޑަމީއާ އެވެ.
ސްކިލްސް ފޯ އަ ރެޒީލިއެންޓް ވޯކްފޯސް ޕްރޮގްރާމް ހިންގުމުގައި ހަޔާ އެޑިޔުކޭޝަން އާއި ވޯލްޑްބޭންކްގެ މީރީ ޕޮޖެކްޓާއި ޓުއަރިޒަމް މިނިސްޓްރީ އާއި އިކޮނޮމިކް ޑިވެލޮޕްމެންޓާއި ޔޫތް މިނިސްޓްރީގެ އެހީތެރިކަން ލިބިގެން ދާނެ އެވެ.
