ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލި އަމުރުގެ އިސްތިއުނާފް ހައި ކޯޓުން ބޭރުކޮށްލުމުން، އެ މައްސަލަ ދޫނުކޮށް ސުޕްރީމް ކޯޓަށް ހުށަހަޅަން ޕްރޮސިކިއުޓަ ޖެނެރަލް (ޕީޖީ)ގެ އޮފީހުން ނިންމައިފި އެވެ.
ޖިންސީ ފުރައްސާރައިގެ ގިނަ ދައުވާތަކެއް އުފުލާފައިވާ އަލީ ވަހީދުގެ ޕާސްޕޯޓް ދޫކޮށްލުމަށް ކުރިމިނަލް ކޯޓުން އަމުރު ކުރުމާ އެކު، އޭނާ ރާއްޖެއިން ބޭރަށް ވަޑައިގަތީ އެވެ. ކްރިމިނަލް ކޯޓުގެ އެ އަމުރު ޕީޖީން ހައިކޯޓަށް އިސްތިއުނާފަށް ހުށަހެޅީ އޭގެ ފަހުންނެވެ.
ނަމަވެސް، ހައި ކޯޓުގެ ޝަރީއަތަށް ހާޒިރުވުމަށް އަލީ ވަހީދަށް ޗިޓް ފޮނުވޭ ގޮތެއް ނުވި އެވެ. އެހެންވެ، ހައިކޯޓުން އަލީ ވަހީދު މިހާރު ދިރިއުޅޭ އެޑްރެހެއް ހޯދުމަށް ދައުލަތަށް އެންގި އެވެ. ކޯޓުން ދިން މުއްދަތުގައި ފުލުހުންނަށް ވެސް އެ އެޑްރެސް ހޯދޭ ގޮތް ނުވި އެވެ. އެހެންވެ، އިއްޔެ ހައިކޯޓުން ވަނީ އަލީ ވަހީދުގެ ޣައިރު ހާޒިރުގައި ޝަރީއަތް ނުހިންގޭނެ ކަމަށް ބުނެ މައްސަލަ ބޭރުކޮށްލައިފަ އެވެ.
ހައި ކޯޓުން މައްސަލަ ބޭރުކޮށްލި ނަމަވެސް، އަލީ ވަހީދުގެ އެޑްރެސް ދައުލަތަށް ހޯދިއްޖެ ނަމަ މައްސަލަ އަލުން ހައިކޯޓަށް ހުށަހުމުގެ ފުރުސަތު އޮތީ ދީފަ އެވެ. އެކަމަކު، ޕީޖީން ނިންމާފައިވަނީ އެ ފުރުސަތުގެ ބޭނުން ނުހިފައި، ސުޕްރީމް ކޯޓަށް ދިޔުމަށެވެ.
"ހައިކޯޓުގެ ނިންމުން ސުޕްރީމް ކޯޓުގައި އިސްތިއުނާފު ކުރާނެ،" ޕީޖީގެ އޮފިޝަލަކު "އަދަދު"އަށް ވިދާޅުވި އެވެ.
ޕީޖީން ގަބޫލުކުރާ ގޮތުގައި، ކޯޓުތަކުގެ ޝަރީއަތްތައް ދައުވާ ލިބޭ މީހުން ހާޒިރު ކުރުމަކީ އެ އޮފީހުގެ ޒިންމާއެއް ނޫން ކަމާއި އެކަން ކުރުމަކީ ކޯޓުތަކުގެ ޒިންމާއެއް ކަމެވެ. ޕީޖީ އޮފިޝަލް ވިދާޅުވި ގޮތުގައި ސުޕްރީމް ކޯޓުން މައްސަލަ ކާމިޔާބު ވާނެ ކަމުގެ ޔަގީންކަން އެބަ އޮތެވެ.
ޕްރޮސިކިއުޓާ ޖެނަރަލް އޮފީހުގެ ވަކީލް ފަރަހަނާޒު މުހައްމަދު ހައިކޯޓުގައި ވެސް ވިދާޅުވެފައިވާ ގޮތުގައި އަލީ ވަހީދުގެ ޣައިރު ހާޒިރުގައި ވެސް ޕާސްޕޯޓް މައްސަލަ ކުރިއަށް ގެންދެވޭނެ ކަމާއި އެކަމަކީ، އަދުލުއިންސާފު ގާއިމް ކުރުމަށް މުހިންމު ވެސް ކަމެއް ކަމަށެވެ.
ނަމަވެސް، އިއްޔެ ހައިކޯޓުން ނިންމި ނިންމުމުގައި ބުނީ ދައުވާ ރައްދުވާ ފަރާތުގެ ޣައިރު ހާޒިރުގައި މި މައްސަލަ ކުރިއަށް ގެންދިޔުމަކީ ގާނޫނީ ގޮތުން ކުރެވޭނެ ކަމެއް ނޫން ކަމަށެވެ.
ޓޫރިޒަމް މިނިސްޓްރީގެ މުވައްޒަފުންތަކަކަށް ފުރައްސާރަ ކުރި މައްސަލާގައި އަލީ ވަހީދުގެ މައްޗަށް ބޮޑެތި ދައުވާތަކެއް އުފުލާފައިވަނިކޮށް، އޭނާއަށް ފުރުމުގެ ހުއްދަ ދެއްވި ގާޒީ ހަސަން ސައީދުގެ ސުލޫކީ މައްސަލަ ވެސް ޖުޑީޝަލް ސާވިސް ކޮމިޝަން (ޖޭއެސްސީ)އިން ދަނީ ބަލަމުންނެވެ. ރައްޔިތުންގެ މަޖިލީހުން ވެސް އަލީ ވަހީދުގެ މައްސަލައަށް ފާރަވެރިވުމަށް ވަނީ ފާސްކޮށްފަ އެވެ.
މައުލޫމާތު ލިބިފައިވާ ގޮތުގައި، މައިބަދައިގެ އާލާސްކަންފުޅެއްގައި ކަމަށް ވިދާޅުވެ، އަލީ ވަހީދު ފުރަތަމަ ވަޑައިގެންފައިވަނީ ތުރުކީއަށެވެ. އޭނާ މަސައްކަތް ކުރެއްވީ ތުރުކީ މަގުން އިނގިރޭސިވިލާތަށް ވަޑައިގެންނެވުމަށް ކަމަށް ވެސް އެނގިފައިވެ އެވެ.
އަލީ ވަހީދުގެ އޭނާއަށް ކުރާ ތުހުމަތުތައް ދޮގުކުރައްވާފައިވީ ނަމަވެސް، ފުރައިގެން ވަޑައިގެންނެވި ފަހުން އެއްވެސް އެއްޗެއް ވިދާޅުވެފައެއް ނުވެ އެވެ.
މި މައްސަލައަކީ، އަލީ ވަހީދު ފްރޭމް ކުރުމުގެ ގޮތުން ފެންމަތިކޮށްގެން އުޅޭ މައްސަލައެއް ކަމަށް އަޑު ފަތުރާފައިވާއިރު އެފަދަ ކަމެއް ތަހުގީގަށް ފާހަގަވެފައި ނެތްކަން ރައީސް އިބްރާހިމް މުހައްމަދު ސޯލިހު ވެސް ވަނީ ވިދާޅުވެފަ އެވެ.
