ޖާމިނުވި އަޑޭއަށް ވެސް އަލީ ވީ ތަނެއް ނޭނގޭ!

އަލީ ވަހީދަށް އަޑޭ ޖާމިނުވި؛ އެކަމަކު އޭނާ އުޅޭ އެޑްރެހެއް އަޑޭއަކަށް ނޭނގުނު - ފޮޓޯ: ހުސެއިން ވަހީދު | އަދަދު

އަލީ ވަހީދަށް އަޑޭ ޖާމިނުވި؛ އެކަމަކު އޭނާ އުޅޭ އެޑްރެހެއް އަޑޭއަކަށް ނޭނގުނު - ފޮޓޯ: ހުސެއިން ވަހީދު | އަދަދު

އޭނާއަށް ވެސް އަލީ ވަހީދު ވީ ތަނެއް އެނގުނު ކަމަކަށް ނުހެދި އެވެ؛

ޖިންސީ ފުރައްސާރައިގެ ދައުވާ ކުރެވޭ، ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލަން ކުރިމިނަލް ކޯޓުން އަމުރު ނެރުނީ، ޖާމިނުވާނެ ނުވަތަ ޒިންމާވާނެ ފަރާތެއްގެ ގޮތުގައި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑޭ)، އަލީ ވަހީދު ހުށަހެޅުމުންނެވެ.

އަލީ ވަހީދު ފުރުން މަނާކޮށްފައި އޮތް އަމުރު ކުރިމިނަލް ކޯޓުން ބާތިލްކުރިއިރު، އަޑޭ ވަނީ ހަތަރު މަސް ފަހުން އޭނާ ކޯޓަށް ހާޒިރުވާނެ ކަމުގެ ޔަގީންކަން ދެއްވާފަ އެވެ. ގޮތަކަށް ބުނާނަމަ، އަޑޭ ވަނީ އަލީ ވަހީދާ ހަވާލުވެފަ އެވެ.

ހުނަރުވެރި ފުޓްބޯޅަ ކުޅުންތެރިޔާ އަޑޭގެ ގާތް އެކުވެރިޔާ އަލީ ވަހީދަށް ފުރުމުގެ އަމުރު ލިބުމާއެކު، އޭނާ ރާއްޖެ ދޫކޮށް ވަނީ ވަޑައިގެންފަ އެވެ. މައުލޫމާތު އެނގޭ ފަރާތްތަކުން ބުނާ ގޮތުގައި، އަލީ ވަހީދުވީ ތުރުކީގަ އެވެ. އެކަމަކު، ރަސްމީ އެއްވެސް ފަރާތަކަށް މިކަމެއް ނޭނގެ އެވެ.

އަލީގެ ޕާސްޓްޕޯޓް ދޫކޮށްލި މައްސަލަ، ޕީޖީގެ ފަރާތުން ހައިކޯޓުގައި އިސްތިނާފު ކުރުމުން އޭނާ މިހާރު ދިރިއުޅޭ އެޑްރެހެއް ހޯދުމަށް އެ ކޯޓުން މަސައްކަތްތަކެއް ކުރި އެވެ. ޕީޖީއިން ދީފައި އޮތީ މާލޭގެ އެޑްރެހެކެވެ. އެ ގެއަކު އޭނާއެއް ނޫޅެ އެވެ. މެއިލް، ވަޓްސްއެޕް އަދި ވައިބާއިން ވެސް ހައިކޯޓުން ޗިޓް ފޮނުވި އެވެ. އެކަމަކު، "ސީން" ކަނޑާލާފައި ހުރުމުން ރައްދުވީ ކަމެއް، ނުވާ ކަމެއް ޔަގީނެއް ނުކުރެވުނެވެ.

ހައިކޯޓުން ޕީޖީ އޮފީހަށް އެންގީ، އަލީ ވަހީދު މިހާރު އުޅޭ އެޑްރެހެއް ހޯދުމަށެވެ. އެކަމަށް ދިން މުއްދަތުގައި ޕީޖީ އޮފީހުން ވަނީ ފުލުހުންނަށް އެ މައުލޫމާތު އެނގޭތޯ ސާފުކޮށްފަ އެވެ. ފުލުހުންނަށް ވެސް އަލީ ވަހީދު އުޅުއްވާ އެޑްރެހެއް ނުހޯދުނެވެ.

ދެން، ހައިކޯޓުން ގޮސްފައިވަނީ ޒިންމާ އުފުލާފައިވާ އަޑޭ ގާތަށެވެ؛

އަލީ ވަހީދު އުޅުއްވާ ތަނެއް ދިވެހި ދައުލަތަށް ނޭނގުމުގެ ސަބަބުން ހައިކޯޓުން ވަނީ އޭނާގެ ޕާސްޕޯޓާ ގުޅޭ މައްސަލަ އެ ކޯޓުން ބޭރުކޮށްފަ އެވެ. އެއީ، ޣައިރު ހާޒިރުގައި ޖިނާއީ މައްސަލައެއްގައި ޝަރީއަތް ކުރިއަށް ނުގެންދެވޭނެ ކަމަށް ބުނެ އެވެ.

އެހެން ބުނެ، އިއްޔެ ހައިކޯޓުން ނެރުނު ނިންމުމުގައި އަޑޭގެ ވާހަކަ ވެސް އޮތެވެ. ހައިކޯޓުގެ އެ ނިންމުމުގައި އޮތީ މިހެނެވެ؛

"އައްސަދު އަލީއަށް ގުޅައި އަލީ ވަހީދު ދިރިއުޅޭ އެޑްރެސް ސާފު ކުރުމަށް އެދުމުން އޭނާއަށް ވެސް އަލީ ވަހީދު ދިރިއުޅޭ ތަނެއް ނޭނގޭ ކަމަށް ބުނެފައިވޭ،"

ޖާމިނުވުމާއި އޭގެ ގާނޫނީ ޒިންމާ!

އަލީ ވަހީދު ވީތަނެއް ނޭނގޭކަން ޝަރުއީ ކޯޓަކަށް އޭނާއާ ޖާމިނުވީ އަޑޭ އަންގާފައިވާއިރު، މިކަމުގައި ހުރި ގާނޫނީ ނުކުތާތައް އެނގުން މުހިންމެވެ؛

ޖާމިނުވުމަކީ ޖިނާއީ އިޖުރާއަތުގެ ގާނޫނުގެ ތެރެއިން އައިސްފައިވާ ކަމެކެވެ. އެ ގާނޫނުގެ 64 ވަނަ މާއްދާ ހާއްސަކޮށްފައި އޮތީ މިކަމަށެވެ. އެ މާއްދާގައި އޮތީ ބަންދުކޮށްފައި ހުރި މީހަކަށް އެހެން މީހަކު ޔަގީންކަންދީ ޖާމިނު ވެއްޖެނަމަ އޭނާ ކަފާލާތުގެ ދަށުން ދޫކޮށްލެވިދާނެ ކަމެވެ.

މިހެން ޖާމިނުވާ މީހުން ކޯޓުގައި އެއްބަސްވުމެއްގައި ސޮއިކުރަން ޖެހޭއިރު އޭގައި، ހަވާލުވާ މީހަކު ކުށް ކުރިޔަ ނުދީ ބަލަހައްޓާނެ ކަމާއި ތަހުގީގީ އިދާރާތަކާއި ކޯޓުތަކަށް ހާޒިރުވާން އެންގުމުން ގަޑިއަށް ހާޒިރު ކުރާނެ ކަމަށް އިގުރާރުވާން ޖެހެ އެވެ. އަޑޭ ވެސް ވަނީ އަލީ ވަހީދާ ޖާމިނުވުމުގެ ގޮތުން އެފަދަ އިގުރާރެއްގައި ސޮއި ކުރައްވާފަ އެވެ.

ނަމަވެސް، މި ހާލަތުގައި އަލީ ވަހީދު ހުންނެވީ ބަންދުގައި ނޫން ކަމުން މި މާއްދާއަށް ސީދާ ނުފެތެވެ. އަލީ ވަހީދުގެ ހާލަތާ ގުޅޭ މާއްދާއެއް އޮތީ، ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދުގަ އެވެ. އެ ގަވާއިދުގެ 26 ވަނަ މާއްދާގައި ހާއްސަކޮށްފައިވަނީ މީހަކު ޖާމިނުވުމުން ފުރުމުގެ ހުއްދަ ދިނުމާ އެވެ.

"ޕާސްޕޯޓް ހިފަހައްޓައި ރާއްޖެއިން ފުރައިގެން ދިޔުން މަނާކޮށްފައިވާ މީހަކު ރާއްޖެއިން ބޭރަށް ދާން ބޭނުންވެގެން އެހެން މީހަކު ޖާމިނުވެ، ޕާސްޕޯޓް ދޫކުރެވޭ މީހާ ނުފިލާނެ ކަމާއި ކަނޑައެޅިފައިވާ ދުވަހަށް ރާއްޖެއަށް އަނބުރާ ގެންނާނެ ކަމަށް ޖާމިނުވާ މީހާ އިގުރާރުވުމުން ޕާސްޕޯޓް ދޫކުރުމުގެ އިހުތިޔާރު ކޯޓަށް ލިބިގެންވެ އެވެ،" އެ މާއްދާގައި އޮތީ މިހެނެވެ.

ދެން، އެ މާއްދާގައި ބުނަނީ ޖާމިނުވާ މީހާ އިގުރާރާ ހިލާފުވެއްޖެނަމަ، އޭނާގެ މައްޗަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ އަދަބުތަކުގެ ތެރެއިން އަދަބެއް ކަނޑައެޅުމުގެ އިހްތިޔާރު ކޯޓަށް އޮތް ކަމެވެ.

ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގެ (ޅ)ގައި ޖާމިނުވާ މީހާ، އިގުރާރާ ހިލާފުވެއްޖެނަމަ ދެވޭނެ އަދަބުތައް ކަނޑައަޅާފައިވަނީ ތިރީގައި މިއޮތް ތަރުތީބަށެވެ.

  • އެއް އަހަރު ދުވަހަށްވުރެ ދިގުނޫން މުއްދަތަކަށް ޖަލަށްލުން؛
  • ދެ އަހަރު ދުވަހަށްވުރެ ދިގުނޫން މުއްދަތަކަށް ގޭގައި ބަންދުކުރުން؛
  • 15,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރުން؛
  • ބަންދުގައި ހުރި މީހަކު ކަފާލާތުގެ އުސޫލުން ދޫކުރުމުގައި، ވަކި މުއްދަތެއް ވަންދެން ޖާމިނު ނުވެވޭނެކަމަށް ކަނޑައެޅުން.

މިއިން ކޮންމެ އަދަބެއް ވެސް އިގުރާރާ ހިލާފުވާ މީހާގެ މައްޗަށް ކޯޓަށް ކަނޑައެޅިދާނެ އެވެ.

އަލީ ވަހީދާ ގުޅުވައި އަޑޭ އިގުރާރާ ހިލާފުވެއްޖެ ކަމެއް ނުވަތަ ނޫން ކަމެއް ކަނޑައަޅާނީ ކޯޓުންނެވެ. އޭނާ އިގުރާރުގައި ސޮއި ކުރައްވާފައިވަނީ ހަތަރު މަސް ފަހުން އަލީ ވަހީދު ކޯޓަށް ހާޒިރުވާނެ ގޮތަށް ކަމަށް މައުލޫމާތު ލިބިފައިވެ އެވެ.

އަދި، އަލީ ވަހީދު ބޭރަށް ވަޑައިގެންނެވިތާ ހަތަރު މަސް ވެފައި ނުވާއިރު، އޭގެ ކުރިން އަލީ ވަހީދަށް ކޯޓަށް ހާޒިރުވާން އެންގި ނަމަވެސް، އެއަަށް އިޖާބު ނުދިނުމަކީ އަޑޭ ޒިންމާ އުފުލަން ޖެހޭނެ ކަމެއް ނުވަތަ ނޫން ކަމެއް އަދި ކޯޓަކުން ކަނޑައެއް ނާޅަ އެވެ.

އެހެންނަމަވެސް، ހައިކޯޓުން ވެސް މިވަނީ އަޑޭގެ ނަން އެ ކޯޓުގެ ނިންމުމަކަށް ތިރިކޮށްފަ އެވެ.

ޕީޖީ ބުނާ ގޮތުން އަޑޭގެ ބޭނުމެއް ނެތް

ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވާ ގޮތުގައި، އަލީ ވަހީދު މައްސަލާގައި މީހަކު ޖާމިނުކޮށްފައިވަނީ ކިހިނެއް ކަމެއް ނޭނގޭ ކަމެވެ.

އޭނާ އެހެން ވިދާޅުވަނީ ކުރިމިނަލް ކޯޓުން ޖިނާއީ އިޖުރާއަތުގެ ގާނޫނުގެ 64 ވަނަ މާއްދާއަށް ރިއާޔަތްކޮށް އަލީ ވަހީދުގެ ޕާސްޕޯޓް ދޫކޮށްލުމަށް އަޑޭ ޖާމިނުކޮށްފައިވާތީ އެވެ.

ރައްޔިތުންގެ މަޖިލީހުގެ ކޮމިޓީއަށް އަލީ ވަހީދުގެ މައްސަލާގައި ޝަމީމް ހާޒިރުކުރުމުން އޭނާ ވިދާޅުވެފައިވާ ގޮތުގައި، ބަންދުގައި ނެތް މީހަކު، ރާއްޖެއިން ބޭރަށް ދިޔުމަށް މީހަކު ޖާމިނުވުމަކީ ގާނޫނު ދަންނަ އުސޫލެއް ނޫން ކަމަށެވެ.

"މާއްދާގެ ސޮދުރުގައި މި އޮންނަނީ ބަންދުކޮށްފައި ހުރި މީހަކު ބަންދުން ދޫކޮށްލުމަށް ޖާމިނުކުރާ ވާހަކަ، ބަންދުގަ ހުންނަ މީހެއްގެ ވާހަކަ، ބަންދުގައި ނެތް މީހަކު ޖާމިނު ކުރާ އުސޫލެއް ޖިނާއީ އިޖުރާއަތުގެ ގާނޫނެއް ނުދަނޭ،" އޭނާ ވިދާޅުވެފައިވެ އެވެ.

ކޮންމެއަކަސް އަލީ ވަހީދު އުޅުއްވާ ތަނެއް ނޭނގި، ކޯޓުތަކުގައި އޭނާގެ މައްސަލަތައް ހުއްޓިގެން ދިޔުމަކީ ކަންބޮޑުވުމެކެވެ. އޭނާގެ މައްޗަށް ކުރެވޭ ސީރިއަސް ތުހުމަތުތަކާއެކު، އުފުލާފައިވަނީ ބޮޑެތި ދައުވާތަކެކެވެ. އެ ދައުވާތައް ސާބިތު ކުރެވޭނެ ކަމުގެ ޔަގީންކަން ޕީޖީއިން ދޭއިރު، ޕީޖީގެ ވަކީލުން ވަނީ އަލީ ވަހީދުގެ މައްޗަށް ޝަރީއަތް ހިންގުމަކީ އަދުލުއިންސާފު ގާއިމް ކުރުމަށް ނުހަނު މުހިންމު ކަމެއް ކަމަށް ވިދާޅުވެފަ އެވެ. ހައިކޯޓުގައި އަލީ ވަހީދުގެ ޣައިރު ހާޒިރުގައި ޝަރީއަތް ހިންގަން ވެސް އެދުނީ އެހެންވެ އެވެ.

"އަދުލުއިންސާފު ގާއިމް ކުރުމަށްޓަކައި މި މައްސަލަ ކުރިއަށް ގެންދިޔުން މުހިންމު،" ޕީޖީގެ ވަކީލް ފަރަހަނާޒު މުހައްމަދު ހައިކޯޓުގައި ވިދާޅުވެފައިވެ އެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox