ހުޅުމާލޭގެ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކުގެ އެޕާޓްމަންޓުތައް ބެހުމަށް ނަގާ ގުރުއަތުލުން އަންނަ ބުރާސްފަތި ދުވަހު ފަށާނެ ކަމަށް ހައުސިން ޑިވެލޮޕްމެންޓް ކޯޕަރޭޝަނުން ބުނެފި އެވެ.
އެޗްޑީސީން މިއަދު ކުރި އިއުލާނެއްގައި ބުނީ އެންމެ ފުރަތަމަ ގުރު ނަގާނީ ހާއްސަ އެހީއަށް ބޭނުންވާ މީހުންގެ ކެޓަގަރީން ކަމަށެވެ. ގުރުއަތު ނަގާނީ އެ ކެޓަގަރީއަކުން ފްލެޓް ލިބިފައިވާ މީހުންގެ އައިޑީކާޑް ނަމްބަރުގެ ތަރުތީބުން ކަމަށް އިއުލާންގައި ބުނެފައިވެ އެވެ.
އެ ދުވަހުގެ ހެނދުނު 9:00 ޖަހާއިރު ގުރުއަތުލުން ފަށާއިރު ޕީއެސްއެމްއިން ލައިވް ކުރާނެ ކަމަށް ވެސް އެޗްޑީސީން ބުނެ އެވެ. ގުރުއަތު ނަގާ ހޯލަށް ދައުވަތު ލިބިގެން އޮބްޒާވަރުންނަށް ވަދެވޭނެ ކަމަށް ވެސް އެޗްޑީސީން ބުނެ އެވެ.
ގުރު ނަގާއިރު ނެގުނު ފްލެޓާއި ފްލޯއާއި ޓަވަރު އެނގޭގޮތަށް ޓީވީ ސްކްރީނުން ދެއްކުމަށް ވަނީ ނިންމައިފަ އެވެ. އަދި އެސްއެމްއެސް މެދުވެރިކޮށް ފްލެޓްގެ ވެރި ފަރާތަށް އެ މައުލޫމާތު ދޭނެ ކަމަށް ވެސް އެޗްޑީސީން ބުނެ އެވެ.
ފްލެޓްގެ އެގްރީމެންޓްގައި ސޮއި ކުރުމާއި ތަޅުދަނޑި ހަވާލު ކުރާ ތާރީހެއް ފަހުން އިއުލާން ކުރާނެ ކަމަށް ވެސް އެޗްޑީސީން ބުނެ އެވެ.
އެޗްޑީސީގެ މެނޭޖިން ޑިރެކްޓަރު އަހްމަދު ސުހެއިލް، މިދިޔަ ހަފްތާގައި "އަދަދު" އަށް ވިދާޅުވީ ޓީވީން ލައިވްކޮށްގެން ބާއްވާ އެ ގުރުއަތުލުން ހަފްތާއަކަށް ދެމިގެންދާނެ ކަމަށް ބެލެވޭ ކަމަށެވެ.
ލިބޭ ފްލެޓެއް ކަނޑައެޅުމަށް ގުރުއަތު ލާން ފަށާއިރު ހައުސިން މިނިސްޓްރީން އަންނަނީ ހިޔާ ފްލެޓް ލިބޭ ދާއިމީ ލިސްޓް އިއުލާންކޮށް, އިތުރަށް ބެލުމަށް ކޮމިޓީން ޝަރުތުކޮށްފައިވާ ކަންކަން ބަލަމުންނެވެ.
ކުރީގެ ސަރުކާރުގައި ފެށި ހިޔާ މަޝްރޫއުގެ 16 ޓަވަރުން 6,720 ފްލެޓް އަޅާފައިވެ އެވެ. އެ މީހަކަށް ލިބޭނެ ފްލެޓެއް ކަނޑައަޅަން ގުރުއަތު ނަގާނީ ނުކުޅެދުންތެރިކަން ހުންނަ މީހުންނަށް ތިރީ ފްލޯތަކުން ފްލެޓް ހަމަޖެއްސުމަށް ފަހު އެވެ.
