ސްޓޭޖު މަތީގައި ހިނގި ކުރިމަތިލުމެއްގެ ސަބަބުން ސްރީލަންކާގެ ރީތީގެ ރާނީ ހޮވާ އެންމެ ބޮޑު މުބާރާތުގެ ރަން ތާޖު ހޯދި ޕުޝްޕިކާ ޑެ ސިލްވާއަށް އަނިޔާވެއްޖެ އެވެ.
"މިސިސް ސްރީލަންކާ" ގެ ލަގަބު ޕުޝްޕިކާއަށް އަރުވާފައި ވަނީ ގައުމީ ޓީވީ މެދުވެރިކޮށް މިދިޔަ އާދީއްތަ ދުވަހު ދެއްކި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި ޕުޝްޕިކާއަށް ލަގަބު އެރުވިތާ ކުޑައިރުކޮޅެއް ފަހުން 2019 ވަނަ އަހަރު އެ ތާޖު ހޯދި ކެރޮލީން ޖޫރީ ވަނީ ޕުޝްޕިކާގެ ތާޖު ޖަހައިގަނެފަ އެވެ.
ސްޓޭޖު މަތީގައި ހުރެ ތާޖު ޖަހައިގަތުމަށް ފަހު ކެރޮލީން ބުނެފައި ވަނީ ޕުޝްޕިކާއަކީ މީހަކާ ކައިވެނިކޮށް، ވަރިވެފައިވާ މީހަކަށް ވާތީ އެފަދަ ލަގަބެއް އޭނާއަށް ހައްގު ނޫން ކަމަށެވެ.
"މިސިސް ސްރީލަންކާ" މުބާރާތުގެ ގަވާއިދު ބުނާ ގޮތުން މުބާރާތުގައި ބައިވެރިވޭނީ ކައިވެނިކޮށްގެން އުޅޭ މީހުންނަށެވެ. އެހެންކަމުން ވަރިވެފައިވާ މީހެއް ނަމަ ޑިސްކޮލިފައި ވާނެ އެވެ.
އެ ގަވާއިދަށް އިޝާރާތްކޮށް، ކެރޮލީން ވަނީ ޕުޝްޕިކާގެ ބޮލުގައި އިން ތާޖު ޖަހައިގަނެ، ދެވަނައަށް ދިޔަ ބައިވެރިޔާގެ ބޮލުގައި ތާޖު އަޅުވާފަ އެވެ. އެއާއެކު ރޮވިފައި ހުރި ޕުޝްޕިކާ ސްޓޭޖު މަތިން ފައިބައިގެންދާ މަންޒަރު ފެންނަ ވީޑިއޯއެއް ވަނީ އާއްމުވެފަ އެވެ.
ނަމަވެސް ޕުޝްޕިކާއަކީ ވަރިވެފައިވާ މީހެއް ނޫންކަން ކަށަވަރު ކުރުމަށް ފަހު މުބާރާތް އިންތިޒާމް ކުރި ފަރާތުން މިހާރު ވަނީ ތާޖު އަލުން އޭނާއާ ހަވާލުކޮށްފަ އެވެ. ޕުޝްޕިކާ ބުނެފައި ވަނީ އޭނާ އަދި ވަރި ނުވާ ކަމަށާއި ނަމަވެސް އޭނާ އާއި އޭނާގެ ފިރިމީހާ ދިރިއުޅެނީ ވަކިން ކަމަށެވެ.
އެ ހާދިސާއަށް ފަހު ފޭސްބުކްގައި ކުރި ޕޯސްޓެއްގައި ޕުޝްޕިކާ ބުނީ ބޮލަށް ލިބުނު ކުދި ޒަހަމްތަކަށް ފަރުވާ ހޯދަން ޖެހުނު ކަމަށެވެ. އަދި އޭނާއާ މެދު އަމަލު ކުރި ގޮތާ ގުޅިގެން ކޯޓަށް މައްސަލަ ހުށަހަޅާނެ ކަމަށް ވެސް ބުންޏެވެ.
"މިސިސް ސްރީލަންކާ" މުބާރާތަކީ އެ ގައުމުގައި ބާއްވާ މުބާރާތްތަކުގެ ތެރެއިން އެންމެ ބޮޑު އެއް މުބާރާތެވެ. އާދީއްތަ ދުވަހުގެ ހަފްލާގައި ބޮޑުވަޒީރުގެ އަނބިކަނބަލުން ވެސް ބައިވެރިވެ ވަޑައިގެންނެވި އެވެ.
