ކުރީގެ ނައިބު ރައީސް އަބްދުﷲ ޖިހާދުއާމެދު ކޯޓުތަކުން އަމަލު ކުރާ ގޮތާ ގުޅޭ ގޮތުން އޭނާ ކަންބޮޑުވުން ފާޅު ކުރައްވައިފި އެވެ.
ކުރިން ފިނޭންސް މިނިސްޓަރުކަން ވެސް ކުރެއްވި ޖިހާދުގެ މައްޗަށް ފުށިދިއްގަރާ ގުޅޭ މައްސަލައެއްގައި ދައުވާ އުފުލައި ވަނީ ކުރިމިނަލް ކޯޓަށް ފޮނުވާފަ އެވެ. އެ މައްސަލާގެ ޝަރީއަތް މިހާރު ކުރިމިނަލް ކޯޓުގައި ކުރިއަށް ދާއިރު، ޖިހާދު ބޭސްފަރުވާއަށް ވަޑައިގެންނެވުމުގެ މައްސަލަ ވެސް އޭގެ ތެރެއިން ކުރިއަށްދެ އެވެ.
ނަމަވެސް ބޭސްފަރުވާއަށް ޖިހާދަށް ފުރޭ ގޮތް ނުވެ، ވަނީ ދިގުލާފަ އެވެ.
މިއަދު ވެސް ކުރިމިނަލް ކޯޓުގައި ޖިހާދު ބޭސްފަރުވާއަށް ފުރުމުގެ ހުއްދަ ދިނުމާ ގުޅޭ ގޮތުން ޝަރީއަތުގެ އަޑުއެހުމެއް ބޭއްވި އެވެ. ނަމަވެސް ލިޔެކިޔުން ނެތް ކަމަށް ބުނެ ގާޒީ ވަނީ އެ ފުރުސަތު ދެއްވުމަށް ދެކޮޅު ހައްދަވާފަ އެވެ. ޖިހާދުގެ ފަރާތުން އޭގެ ކުރިން ވެސް ބޭސްފަރުވާއާ ގުޅޭ ލިޔެކިޔުންތައް ހުށަހަޅާފައިވެ އެވެ.
އެކަން ފާހަގަ ކުރައްވަމުން ގާޒީ ވެސް ވިދާޅުވެފައިވަނީ އެ ލިޔެކިޔުންތައް އެބަހުރި ކަމާއި އެއަށް ރިއާޔަތް ކުރައްވާ ކަމަށެވެ. ނަމަވެސް "ސަޕޯޓިން ޑޮކިއުމެންޓް" ބޭނުންވާ ކަމަށެވެ.
އެއީ، ކޮން ލިޔެކިޔުންތަކެއްތޯ ޒިހާދުގެ ވަކީލް ސުވާލު ކުރެއްވުމުން ގާޒީ ވިދާޅުވެފައިވަނީ ވަކި ލިޔެކިޔުންތަކެއް ނޫން ކަމާއި ބޭސްފަރުވާއަށް ފުރަން ޖެހޭ ކަމުގެ ލިޔުންތައް ކަމަށެވެ.
"ޖިހާދަކީ ބޭސްފަރުވާއަށް ފުރަން ޖެހޭ މީހެއްކަމާމެދު ސުވާލެއް،" ކުރިމިނަލް ކޯޓުގައި މައްސަލަ ބައްލަވާ ގާޒީ މިއަދު ވިދާޅުވި އެވެ.
ކޯޓުގައި މިއަދު ކަންތައްވެގެން ދިޔަ ގޮތާ ގުޅޭ ގޮތުން "އަދަދު"އަށް ފޯނުން ގުޅުއްވައި ޖިހާދު ވިދާޅުވި ގޮތުގައި، އޭނާއާމެދު އަމަލު ކުރަމުން ދަނީ އަނިޔާވެރި ގޮތަކަށް ކަމެވެ.
"މިކަން މިހާރު ހެރެސްމެންޓަކަށް ވެއްޖެ،"
"އަޅުގަނޑަކީ ދައުލަތަށް ވަރަށް ގިނަ ދުވަހު ހިދުމަތް ކޮށްފައިވާ މީހެއް، ސިޔާސީ ގޮތުން މީހުންނާ ދިމާއަށް އެއްޗެހި ކިޔާ މީހެއް ނޫން، އެކަމަކު އަޅުގަނޑާމެދު އަމަލު މިކުރަނީ ތަންކޮޅެއް އަނިޔާވެރިކޮށް،" ހިތްހަމަނުޖެހި ހުންނަވައި ޖިހާދު ވިދާޅުވި އެވެ.
ޖިހާދު ވިދާޅުވި ގޮތުގައި، ޝަރުއީ ކޯޓުތަކުން އަމަލުތައް ބަހައްޓަން ޖެހޭނީ އިންސާފުވެރިކަމާއި ހަމަހަމަކަމާއެކު އެވެ. ނަމަވެސް ކޯޓުތަކުން ފެންނަނީ އެ މަންޒަރު ނޫން ކަމަށް ވިދާޅުވި އެވެ.
ޖިހާދުގެ ޕާސްޕޯޓް ހިފެހެއްޓުމަށް ކުރިމިނަލް ކޯޓުން ނެރުނު އަމުރު މިހާރު ވަނީ ސުޕްރީމް ކޯޓުން ބާތިލްކޮށްފަ އެވެ. އެ މައްސަލާގައި ވެސް ޖިހާދު ވަނީ ތިން މަރުހަލާ ކަޑަތުކުރައްވާފަ އެވެ. ދުވަހަކު ވެސް މައްސަލައެއްގައި މީގެކުރިން ކޯޓަށް ދާން ޖެހިފައި ނެތް ޖިހާދަށް، އޭނާ ވިދާޅުވި ގޮތުގައި އެއީ ވަރަށް ބޮޑު ތަކުލީފެކެވެ.
"އަޅުގަނޑަށް މި އަނިޔާ ލިބެން ހައްގެއް ނޫން، އަޅުގަނޑަށް ވެސް ގަދަރާއި އިއްޒަތުގައި އުޅުމުގެ ފުރުސަތު އޮންނަން ވާނެ، އާމްދަނީ ހޯދަން މަސައްކަތް ކުރަން ފުރުސަތު ލިބެން ވާނެ،" ޖިހާދު ވިދާޅުވި އެވެ.
"އަޅުގަނޑަށް މި ލިބެނީ ހިދުމަތް ކުރީމަ ޝަރަފެއް ނޫން، ޝަރަފުވެރި އަނިޔާ،"
