ކުރީގެ ނައިބު ރައީސް އަބްދުﷲ ޖިހާދު، ބޭސްފަރުވާއަށް ރާއްޖެއިން ބޭރަށް ވަޑައިގެންނެވުމަށް ހުއްދަ ދެވެން ނެތް ކަމަށް ކުރިމިނަލް ކޯޓުން މިއަދު ވެސް ނިންމައިފި އެވެ.
ބޭސްފަރުވާއާ ގުޅޭ ގޮތުން ގޮތެއް ނިންމުމަށް މިދިޔަ ބުރާސްފަތި ދުވަހު ވެސް އަޑުއެހުމެއް ބޭއްވި އެވެ. ނަމަވެސް އެ ދުވަހު ވެސް ގާޒީ ނިންމެވީ އެކަމާމެދު ގޮތެއް ނިންމުން ފަސްކުރުމަށެވެ.
ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރެއްވި ކަމުގެ ދައުވާ އުފުލާފައިވާ ޖިހާދަށް ފުރުމުގެ ހުއްދަ ނުދޭން މިއަދު ގާޒީ ނިންމެވީ، ބޭސްފަރުވާއަށް ފުރަން ޖެހޭ ކަމަށް ބާރު ލިބޭ ލިޔެކިޔުންތައް ހުށަހަޅާފައި ނެތް ކަމަށް ވިދާޅުވެ އެވެ.
ގާޒީ އެންގެވީ އެ ލިޔުންތައް ހުށަހެޅުމުން ބޭސްފަރުވާއަށް ފުރުމުގެ ފުރުސަތު ލިބިގެންދާނެ ކަމަށެވެ. ގާޒީ އިތުރަށް ވިދާޅުވެފައިވަނީ ޖިހާދަކީ ބޭސްފަރުވާއަށް ރާއްޖެއިން ބޭރަށް ފުރަން ޖެހޭ ބޭފުޅެއް ކަމާމެދު ސުވާލެއް ނެތް ކަމަށެވެ.
ޖިހާދަށް ބޭސްފަރުވާއަށް ފުރުމުގެ ހުއްދަ ދިނުމަށް ދައުލަތުން ވެސް މިހާރު އިއުތިރާޒެއް ނުކުރެ އެވެ.
ކުރިން ފިނޭންސް މިނިސްޓަރުކަން ވެސް ކުރެއްވި ޖިހާދުގެ ވަކީލް ވަނީ ކުރީގައި ވެސް ޖިހާދުގެ ބޭސްފަރުވާއާ ގުޅޭ ލިޔުންތައް ހުށަހަޅާފައިވާނެ ކަމަށް ވިދާޅުވެ އެއަށް ރިއާޔަތް ކުރެއްވުމަށް އެދިފަ އެވެ.
ގާޒީ ދެން ވިދާޅުވީ އެ ލިޔުންތަކަށް ރިއާޔަތް ކުރައްވާ ކަމާއި ނަމަވެސް ފުރުމުގެ ހުއްދަ އެދިފައިވާ ފޯމާއެކު އިތުރު އެހެން ލިޔެކިޔުމެއް ނެތުމުން އެ ފުރުސަތު ދެވެން ނެތީ ކަމުގަ އެވެ.
ފުށިދިއްގަރާ ގުޅޭ މައްސަލައެއްގައި ޖިހާދަށް އުފުލާފައިވާއިރު، ދައުލަތުގެ އެދުމަށް އޭނާގެ ޕާސްޕޯޓް ކުރިން އޮތީ ހިފަހައްޓާފަ އެވެ. ނަމަވެސް، ސުޕްރީމް ކޯޓުން ވަނީ އޭނާގެ ޕާސްޕޯޓް ހިފެހެއްޓުން ގާނޫނާ ހިލާފު ކަމުގައި ކަނޑައަޅާފަ އެވެ.
ކުރިމިނަލް ކޯޓުގައި ކުރިއަށްދާ ޖިހާދުގެ ޝަރީއަތުގައި އޭނާގެ މައްޗަށް މިހާރު ވަނީ ދައުވާ އުފުލާފަ އެވެ. އެ ދައުވާއަށް ޖިހާދު އިންކާރުކޮށްފައިވާއިރު ދައުލަތުން ވަނީ ދައުވާ ސާބިތު ކުރަން ހެކި ހުށަހަޅާފަ އެވެ. ހެކިންގެ ތެރޭގައި، ކުރީގެ ނައިބު ރައީސް އަހުމަދު އަދީބު ވެސް ހިމެނެ އެވެ.
